RSS Route March : સુપ્રીમ કોર્ટે તમિલનાડુ સરકારને આપ્યો ઝટકો ! RSS માર્ચ સામેની અરજી ફગાવી
મદ્રાસ હાઈકોર્ટના નિર્ણય સામે તમિલનાડુ સરકારે સુપ્રીમ કોર્ટમાં અરજી કરી હતી. હવે સુપ્રીમ કોર્ટે પણ તમિલનાડુ સરકારને આંચકો આપ્યો છે અને RSS સામે કરવામાં આવેલી અરજી ફગાવી દીધી છે.
તમિલનાડુ સરકારને ઝટકો આપતા સુપ્રીમ કોર્ટે મદ્રાસ હાઈકોર્ટના નિર્ણય સામેની તેની અરજીને ફગાવી દીધી છે. મદ્રાસ હાઈકોર્ટે તમિલનાડુમાં રાષ્ટ્રીય સ્વયંસેવક સંઘ (RSS)ના રૂટ માર્ચને મંજૂરી આપી હતી. મદ્રાસ હાઈકોર્ટના આ નિર્ણયને તમિલનાડુ સરકારે સુપ્રીમ કોર્ટમાં પડકાર્યો હતો.
આ પણ વાચો: સુપ્રીમ કોર્ટનો મોટો આદેશ, તમામ શાળાઓ અને શૈક્ષણિક સંસ્થાઓ વિદ્યાર્થિનીઓને આપે ફ્રી સેનેટરી પેડ
તમિલનાડુમાં ભાજપ મજબૂત થશે
મહત્વનું છે કે RSSની માર્ચથી તમિલનાડુમાં ભાજપને ફાયદો થઈ શકે છે, થોડા સમયમાં તમિલનાડુમાં વિઘાનસભાની ચુંટણી છે અને ભાજપ પ્રયત્ન કરી રહી છે કે તેમની સરકાર બને થોડા દિવસો પહેલા જ PM મોદીએ ચેન્નઈ એરપોર્ટ પર એક નવા ટર્મીનલનું ઉદ્ધાટન કર્યું હતું.
મદ્રાસ હાઈકોર્ટની ડિવિઝન બેન્ચના એક જજ દ્વારા RSS રૂટ માર્ચ પર લાદવામાં આવેલી શરતોને રદ્દ કરી હતી. તેના વિરોધમાં તમિલનાડુ સરકાર સુપ્રીમ કોર્ટ પહોંચી હતી. સુપ્રીમ કોર્ટે, તે દરમિયાન, આરએસએસને માર્ચ કાઢવાની મંજૂરી આપતા, સપ્ટેમ્બર 2022માં હાઇકોર્ટના એક જ ન્યાયાધીશ દ્વારા આપવામાં આવેલા આદેશને પડકારતી રાજ્ય સરકાર દ્વારા દાખલ કરવામાં આવેલી એક અલગ અરજીને પણ ફગાવી દીધી હતી.
શું છે સમગ્ર મામલો?
ઓક્ટોબર 2022માં, RSSએ તમિલનાડુ સરકાર પાસે રાજ્યમાં ‘સ્વતંત્રતાના અમૃત મહોત્સવ’ અને ગાંધી જયંતિની ઉજવણી માટે માર્ચ કાઢવાની પરવાનગી માંગી હતી. સંઘની આ વિનંતીને રાજ્ય સરકારે ફગાવી દીધી હતી, ત્યારબાદ RSSએ હાઈકોર્ટનો સંપર્ક કર્યો હતો.
4 નવેમ્બરના રોજ એક જ ન્યાયાધીશે આરએસએસને કેટલીક શરતો સાથે માર્ચ કાઢવાની મંજૂરી આપી હતી. આ શરતોમાં ઇન્ડોર જગ્યામાં કૂચ કરવાનો સમાવેશ થાય છે. ત્યારબાદ, 10 ફેબ્રુઆરીએ, હાઇકોર્ટની એક ડિવિઝન બેન્ચે, આ શરતોને દૂર કરતી વખતે, સ્વસ્થ લોકશાહીમાં વિરોધના મહત્વ પર ભાર મૂક્યો હતો.
સુપ્રીમ કોર્ટમાં આ વકીલોએ આરએસએસનું પ્રતિનિધિત્વ કર્યું
RSSની તરફેણમાં ચુકાદો આવ્યા બાદ તમિલનાડુ સરકાર સુપ્રીમ કોર્ટમાં ગઈ હતી. વરિષ્ઠ વકીલ મહેશ જેઠમલાણી, ગુરુ કૃષ્ણ કુમાર અને મેનકા ગુરુસ્વામીએ સુપ્રીમ કોર્ટમાં આરએસએસનું પ્રતિનિધિત્વ કર્યું હતું. તમિલનાડુ સરકાર તરફથી વરિષ્ઠ વકીલ મુકુલ રોહતગી હાજર રહ્યા હતા.
આ મામલાને મુલતવી રાખ્યો હતો
મંગળવારે સવારે સુપ્રીમ કોર્ટના જસ્ટિસ વી રામસુબ્રમણ્યમ અને જસ્ટિસ પંકજ મિત્તલની બેન્ચે તમિલનાડુ સરકારની અરજીને ફગાવી દીધી હતી. અગાઉ, સુપ્રીમ કોર્ટે તમિલનાડુ સરકારની રજૂઆત પર આ મામલાને મુલતવી રાખ્યો હતો કે પક્ષકારો સમાધાન પર પહોંચવા માટે યોગ્ય માર્ગો પર ચર્ચા કરશે.