લો બોલો…કન્યા ના શોધી આપી તો મેટ્રિમોની પોર્ટલને ફટકાર્યો 60 હજારનો દંડ, ગ્રાહક કોર્ટે આપ્યો આ આદેશ
આજકાલ ઘણા લોકો તેમના જીવનસાથીને શોધવા માટે મેટ્રિમોની પોર્ટલનો સહારો લઈ રહ્યા છે. આ પોર્ટલ અને સાઇટ્સ તમને તમારી પસંદગી અને જરૂરિયાત મુજબ ભાગીદાર શોધવામાં મદદ કરે છે. આ પોર્ટલ પર પ્રોફાઇલ બનાવવા માટેની મૂળભૂત સેવા મફત હોઈ શકે છે, પરંતુ પ્રીમિયમ સુવિધાઓ ભારે સબ્સ્ક્રિપ્શન ફી વસૂલ કરે છે. આ ફી સામાન્ય રીતે વધુ સારી વિઝિબિલિટી, વિશિષ્ટ મેચમેકિંગ સેવાઓ અને સંપર્ક સુવિધાઓની ઍક્સેસ પ્રદાન કરવા માટે હોય છે.
Matrimony Portal fined for failing to find bride : બેંગલુરુમાં કન્ઝ્યુમર કોર્ટે મેટ્રિમોની પોર્ટલ પર કન્યા ન શોધી આપવા બદલ 60,000 રૂપિયાનો દંડ ફટકાર્યો છે. ગ્રાહક અદાલતે પોર્ટલને પીડિત ગ્રાહકને વળતર ચૂકવવાનો નિર્દેશ આપ્યો છે. કોર્ટે આ નિર્ણય ત્યારે આપ્યો જ્યારે ફરિયાદી પાસેથી ફી લીધા પછી તે નિર્ધારિત સમયમાં કન્યા શોધવાનું વચન આપવામાં નિષ્ફળ ગયો અને પછી ફી પરત કરવાનો પણ ઇનકાર કર્યો.
તમને જણાવી દઈએ કે મેટ્રિમોની પોર્ટલનો મુખ્ય ઉદ્દેશ્ય એવા લોકોને જોડવાનો છે જેઓ લગ્ન કરવા ઈચ્છે છે. આ પોર્ટલ સંભવિત લાઈફ પાર્ટનરને શોધવા માટે વિકલ્પો આપે છે અને લોકોને તેમની પસંદ અને જરૂરિયાતો અનુસાર મેચ શોધવામાં મદદ કરે છે. આ પોર્ટલ પર યુઝર્સ તેમની પ્રોફાઇલ બનાવે છે. જેમાં તેમની વ્યક્તિગત માહિતી, પસંદગીઓ, જાતિ, ધર્મ, શિક્ષણ, વ્યવસાય વગેરેની વિગતો હોય છે. આ માટે પોર્ટલ તેમના યુઝર્સ પાસેથી તગડી ફી પણ વસૂલે છે.
શું હતી બાબત ?
બેંગલુરુના એમએસ નગરમાં રહેતા વિજય કુમાર પોતાના પુત્ર માટે જીવનસાથીની શોધમાં હતા. આ સમય દરમિયાન તેને કલ્યાણ નગર સ્થિત દિલમિલ મેટ્રિમોનીની ઓફિસ વિશે જાણ થઈ અને તેમનો સંપર્ક કર્યો.
પોર્ટલે તેમની પાસેથી 30,000 રૂપિયાની ફી માંગી અને તેમને મૌખિક ખાતરી આપી કે તેઓ 45 દિવસમાં તેમના પુત્ર માટે કન્યા શોધી લેશે. આ પછી વિજય કુમારે તરત જ ફી અને તમામ જરૂરી ડોક્યુમેન્ટ મેટ્રિમોની પોર્ટલમાં જમા કરાવ્યા.
ઓફિસના કર્મચારીઓએ તેમની સાથે ગેરવર્તન કર્યું
વિજય કુમાર કહે છે કે, નિર્ધારિત સમય વીતી ગયા પછી પણ પોર્ટલે એક પણ યોગ્ય પ્રોફાઇલ આપી નથી. આ દરમિયાન તેણે ઘણી વખત પોર્ટલની મુલાકાત લીધી અને ઘણી વખત રાહ જોવાનું કહેવામાં આવ્યું. આ હોવા છતાં પોર્ટલ તેમને સેવા પ્રદાન કરવામાં નિષ્ફળ રહ્યું.
આ પછી 30 એપ્રિલના રોજ વિજય કુમાર ફરીથી પોર્ટલની ઓફિસમાં ગયા અને ચૂકવેલી ફી પરત કરવા કહ્યું. પરંતુ પોર્ટલે તેમને પૈસા પરત કરવાની ના પાડી હતી એટલું જ નહીં ઓફિસના કર્મચારીઓએ પણ તેમની સાથે ગેરવર્તન કર્યું હતું અને વાંધાજનક ભાષાનો ઉપયોગ કર્યો હતો.
કોર્ટે મેટ્રિમોની પોર્ટલને આ આદેશ આપ્યો
આ પછી 9 મેના રોજ, વિજય કુમારે દિલમિલ મેટ્રિમોનીને કાનૂની નોટિસ મોકલી, પરંતુ પોર્ટલે તેનો જવાબ આપ્યો ન હતો. આખરે બેંગલુરુ ગ્રાહક અદાલતે સુનાવણી બાદ પોર્ટલને દોષિત ઠેરવ્યું હતું. ગ્રાહક અદાલતે તેના આદેશમાં જણાવ્યું હતું કે, પોર્ટલ ફરિયાદીને કોઈ યોગ્ય પ્રોફાઇલ આપતું કરતું નથી અને સેવામાં સ્પષ્ટ ઉણપ છે.
કોર્ટે પોર્ટલને સેવાઓમાં ઉણપ માટે રૂપિયા 20,000, માનસિક યાતના માટે રૂપિયા 5,000 અને મુકદ્દમાના ખર્ચ માટે રૂપિયા 5,000 ચૂકવવા ઉપરાંત રૂપિયા 30,000ની ફી પરત કરવાનો નિર્દેશ આપ્યો હતો. આ રીતે કોર્ટે મેટ્રિમોની પોર્ટલ પર 60 હજાર રૂપિયાનો દંડ ફટકાર્યો છે.
