AC Monsoon Tips : વરસાદની સિઝનમાં આ રીતે ચલાવો AC, ભેજથી મળશે રાહત અને વીજળીનું બિલ પણ થશે ઓછું !

વરસાદની ઋતુ ગરમીથી રાહત આપે છે. પરંતુ તેની સાથે હવામાં ભેજનું પ્રમાણ પણ વધી જાય છે. તેથી ઘણી વખત તાપમાન ઓછું હોવા છતાં ચીકાશનો અનુભવ થઈ શકે છે. આવી સ્થિતિમાં લોકો ACનો ઉપયોગ કરે છે. પરંતુ જો ચોમાસામાં તેનો યોગ્ય રીતે ઉપયોગ ન કરવામાં આવે તો વીજળીનું બિલ પણ વધારી શકે છે. જો તમે ઈચ્છો છો કે વરસાદની સિઝનમાં રૂમ ઠંડો રહે, ભેજ પણ દૂર થાય અને વીજળીનો ખર્ચ પણ ઓછો આવે તો AC ચલાવતી વખતે નીચેની સરળ બાબતોનું ધ્યાન આપવું જરૂરી છે.

AC ચાલુ હોય ત્યારે રૂમ બંધ રાખવી

ઘણા લોકો AC ચાલુ હોય ત્યારે વારંવાર દરવાજા કે બારીઓ ખોલે છે. આનાથી બહારથી ભેજવાળી હવા રૂમમાં પ્રવેશ કરે છે. પરિણામે રૂમ ઠંડુ થવામાં ટાઈમ લાગે છે અને AC પર લોડ પડે છે. તેથી AC ચાલુ હોય ત્યારે દરવાજા અને બારીઓ બંધ રાખવાનો પ્રયાસ કરવો.

AC યોગ્ય તાપમાન પર સેટ કરવું

ઘણા લોકો માને છે કે AC ને 18થી 20 ડિગ્રી પર સેટ કરવાથી રૂમ ઝડપથી ઠંડી જાય છે. જો કે આ વધુ વીજળી વાપરે છે. સાથે મશીન પર વધારાનો લોડ પડે છે. ચોમાસા દરમિયાન 24થી 26 ડિગ્રી સેલ્સિયસ તાપમાન AC માટે શ્રેષ્ઠ માનવામાં આવે છે. આ રૂમને ઠંડક પ્રદાન કરે છે અને વીજળી બચાવે છે.

ડ્રાય મોડનો ઉપયોગ કરવો

ચોમાસાની ઋતુ દરમિયાન ભેજ એક મોટી સમસ્યા હોય છે. તેથી હંમેશા કૂલ મોડનો ઉપયોગ કરવાને બદલે ડ્રાય મોડનો ઉપયોગ વધુ ફાયદાકારક હોય છે. આ મોડ હવામાં વધારાનો ભેજ ઘટાડે છે. તે સામાન્ય કૂલિંગ મોડ કરતાં ઓછી વીજળીનો ઉપયોગ કરે છે.

AC ફિલ્ટરને નિયમિતપણે સાફ કરવું

વરસાદના દિવસોમાં ધૂળ અને ભેજને કારણે ACનું એર ફિલ્ટર ઝડપથી ગંદુ થઈ શકે છે. ગંદુ ફિલ્ટર હવાના પ્રવાહને ઘટાડે છે. જેના કારણે કૂલિંગ પર અસર પડે છે. તેથી દર થોડા અઠવાડિયે ફિલ્ટર સાફ કરવું જોઈએ. તેનાથી AC વધુ સારી રીતે કામ કરશે. સાથે વીજળીની બચત પણ થશે.

આઉટડોર યુનિટની સંભાળ રાખવી

ઘણા લોકો માત્ર ઘરની અંદર લાગેલા AC પર ધ્યાન આપે છે. જ્યારે બહાર લાગેલી યુનિટની સફાઈ પણ એટલી જ જરૂરી હોય છે. વરસાદ અને પવનને કારણે તેની આસપાસ પાંદડા, માટી અને કચરો એકઠો થઈ શકે છે. તેનાથી હવાનો પ્રવાહ અટકે છે. કોમ્પ્રેસર પર વધારાનો ભાર પડે છે. તેથી સમયાંતરે આઉટડોર યુનિટની સફાઈ કરવી જોઈએ.

આ બાબતોનું પણ રાખો ધ્યાન

જો તમારા ACનું સર્વિસિંગ સમયસર કરવામાં આવે અને યોગ્ય ઓપરેટિંગ મોડનો ઉપયોગ કરવામાં આવે તો તે ચોમાસાની ઋતુ દરમિયાન પણ ઠંડક પ્રદાન કરી શકે છે. વધુમાં તમારા વીજળી બિલમાં નોંધપાત્ર ઘટાડો થઈ શકે છે. આ સરળ સાવચેતીઓ લઈને તમે સમગ્ર વરસાદની ઋતુ દરમિયાન તમારા ACનો આરામથી ઉપયોગ કરી શકો છો.

આ પણ વાંચો, કપડાથી ચશ્મા સાફ કરવાનું આજે જ બંધ કરો, આ સરળ રીતથી લેન્સ રહેશે કાચ જેવી ચમકદાર