Breaking News : PM મોદીને મળ્યું ઉઝબેકિસ્તાનનું સર્વોચ્ચ સન્માન, યુરેનિયમ સહિત અનેક મહત્વપૂર્ણ કરારો પર સહમતિ

વડાપ્રધાન નરેન્દ્ર મોદી હાલ ઉઝબેકિસ્તાનની મુલાકાતે છે. તેમની આ મુલાકાત દરમિયાન ભારત અને ઉઝબેકિસ્તાન વચ્ચે દ્વિપક્ષીય સંબંધોને વધુ મજબૂત બનાવવા માટે અનેક મહત્વપૂર્ણ મુદ્દાઓ પર ચર્ચા કરવામાં આવી. વડાપ્રધાન મોદીએ ઉઝબેકિસ્તાનના રાષ્ટ્રપતિ શવકત મિર્ઝીયોયેવ સાથે મુલાકાત કરી અને બંને નેતાઓ વચ્ચે પ્રતિનિધિમંડળ સ્તરની વાટાઘાટો પણ યોજાઈ.

આ મુલાકાત દરમિયાન બંને દેશો વચ્ચે વિવિધ ક્ષેત્રોમાં સહયોગ વધારવા માટે મહત્વપૂર્ણ કરારો થયા હોવાનું જણાવાયું છે. યુરેનિયમ સહિતના વ્યૂહાત્મક અને આર્થિક ક્ષેત્રોમાં સહકાર વધારવા પર પણ ચર્ચા થઈ. આ સાથે ઉઝબેકિસ્તાને વડાપ્રધાન નરેન્દ્ર મોદીને દેશનું સર્વોચ્ચ સન્માન પણ એનાયત કર્યું.

વડાપ્રધાન મોદીએ ઉઝબેકિસ્તાનની સ્વતંત્રતાની 35મી વર્ષગાંઠ નિમિત્તે રાષ્ટ્રપતિ શવકત મિર્ઝીયોયેવ અને ઉઝબેકિસ્તાનના નાગરિકોને શુભેચ્છાઓ પાઠવી હતી. તેમણે કહ્યું કે, આગામી બે દિવસમાં ઉઝબેકિસ્તાન પોતાના સ્વતંત્રતા દિવસની 35મી વર્ષગાંઠની ઉજવણી કરશે અને આ ખાસ પ્રસંગે તેઓ ઉઝબેકિસ્તાનના લોકો માટે શુભકામનાઓ વ્યક્ત કરે છે.

પીએમ મોદીએ જણાવ્યું કે, આ વર્ષ ભારત અને ઉઝબેકિસ્તાન વચ્ચેની વ્યૂહાત્મક ભાગીદારી માટે પણ ખાસ છે, કારણ કે બંને દેશો તેમની વ્યૂહાત્મક ભાગીદારીની 15મી વર્ષગાંઠની ઉજવણી કરી રહ્યા છે. તેમણે ખુશી વ્યક્ત કરી કે આ ખાસ અવસરે બંને દેશો પોતાના સંબંધોને હવે ‘વ્યાપક વ્યૂહાત્મક ભાગીદારી’ના સ્તરે લઈ જઈ રહ્યા છે.

વડાપ્રધાન મોદીએ વધુમાં કહ્યું કે, આ નવા માળખા હેઠળ બંને દેશો ચોક્કસ અને નક્કર લક્ષ્યો નક્કી કરીને આગળ વધશે. ભારત અને ઉઝબેકિસ્તાન વચ્ચે રાજકીય, આર્થિક, સાંસ્કૃતિક અને વ્યૂહાત્મક ક્ષેત્રોમાં સહયોગને વધુ મજબૂત બનાવવાની દિશામાં કામ કરવામાં આવશે.

રાષ્ટ્રપતિ શવકત મિર્ઝીયોયેવે શું કહ્યું?

વડાપ્રધાન નરેન્દ્ર મોદી સાથે યોજાયેલી પ્રતિનિધિમંડળ સ્તરની વાટાઘાટો દરમિયાન ઉઝબેકિસ્તાનના રાષ્ટ્રપતિ શવકત મિર્ઝીયોયેવે ભારતને વિશ્વસનીય વ્યૂહાત્મક ભાગીદાર ગણાવ્યું હતું. તેમણે જણાવ્યું કે છેલ્લા કેટલાક વર્ષોમાં બંને દેશો વચ્ચેના સંબંધોમાં નોંધપાત્ર પ્રગતિ થઈ છે.

તેમણે કહ્યું કે, ગયા વર્ષે ભારત અને ઉઝબેકિસ્તાન વચ્ચેનો દ્વિપક્ષીય વેપાર પ્રથમ વખત એક અબજ ડોલરને વટાવી ગયો હતો. તાજેતરના વર્ષોમાં બંને દેશો વચ્ચેના સંયુક્ત સાહસોની સંખ્યામાં પણ નોંધપાત્ર વધારો થયો છે અને તેમાં સાત ગણો વધારો નોંધાયો છે.

રાષ્ટ્રપતિ મિર્ઝીયોયેવે બંને દેશો વચ્ચે વધતી કનેક્ટિવિટીનો પણ ઉલ્લેખ કર્યો હતો. હાલમાં ભારત અને ઉઝબેકિસ્તાન વચ્ચે દર અઠવાડિયે 14 સીધી ફ્લાઇટ્સનું સંચાલન થાય છે, જેના કારણે પ્રવાસન, વેપાર અને લોકો વચ્ચેના સંપર્કોને વેગ મળ્યો છે.

PM Modi-Uzbekistan Talks: Uranium Supply Deal, Sister Cities & GIFT City Connection | TV9Gujarati#PMModi #Uzbekistan #IndiaUzbekistan #Tashkent #NarendraModi #TV9Gujarati pic.twitter.com/g33sANpAPX

— Tv9 Gujarati (@tv9gujarati) August 30, 2026

તેમણે લાલ બહાદુર શાસ્ત્રી સેન્ટર ફોર ઇન્ડિયન કલ્ચર અને મહાત્મા ગાંધી સેન્ટર ફોર ઇન્ડિયન સ્ટડીઝની ભૂમિકાની પણ પ્રશંસા કરી હતી. તેમના જણાવ્યા અનુસાર, આ સંસ્થાઓ ભારત અને ઉઝબેકિસ્તાન વચ્ચેના સાંસ્કૃતિક અને માનવીય સંબંધોને વધુ મજબૂત બનાવવામાં મહત્વપૂર્ણ યોગદાન આપી રહી છે.

રાષ્ટ્રપતિએ ઉઝબેકિસ્તાનમાં યોગની વધતી લોકપ્રિયતાનો પણ ઉલ્લેખ કર્યો હતો. તેમણે જણાવ્યું કે 2018થી દેશમાં એક સમર્પિત યોગ ફેડરેશન કાર્યરત છે. આ વર્ષે જૂન મહિનામાં ઉઝબેકિસ્તાનમાં રાષ્ટ્રવ્યાપી યોગ મહોત્સવનું પણ આયોજન કરવામાં આવ્યું હતું.

તેમણે ભારતીય નાગરિકો માટે 30 દિવસની વિઝા-મુક્ત વ્યવસ્થા શરૂ કરવાના નિર્ણયને પણ મહત્વપૂર્ણ ગણાવ્યો હતો. તેમના મતે, આ નિર્ણયથી બંને દેશોના લોકો વચ્ચેના સંપર્કો વધશે તેમજ પ્રવાસન અને વેપારિક આદાન-પ્રદાનને પણ નવી ગતિ મળશે.

વિદેશથી વૈજ્ઞાનિકો પરત ફરી રહ્યા છે, PM મોદીએ ભારતના સ્પેસ ક્ષેત્રની પ્રગતિ માટે કરી મોટી વાત