Iran War Breaking News: Air India એ 31 મે સુધી ઈઝરાયેલની ફ્લાઇટ્સ સ્થગિત કરી, નવી દિલ્હી-તેલ અવીવ રૂટની પણ ફ્લાઇટ્સ પર થઈ અસર

પશ્ચિમ એશિયામાં વધતા યુદ્ધ અને તણાવપૂર્ણ પરિસ્થિતિને ધ્યાનમાં રાખીને એર ઇન્ડિયાએ ઈઝરાયેલ માટેની પોતાની તમામ ફ્લાઇટ્સ 31 મે સુધી માટે સ્થગિત કરવાનો મહત્વપૂર્ણ નિર્ણય લીધો છે. ખાસ કરીને નવી દિલ્હીથી તેલ અવીવ સુધીની સીધી ઉડાનો પર આ પ્રતિબંધ લાગુ કરવામાં આવ્યો છે. એરલાઇનના એક અધિકારીએ જણાવ્યું હતું કે હાલની સુરક્ષા પરિસ્થિતિને ધ્યાનમાં રાખીને આ નિર્ણય લેવામાં આવ્યો છે.

ઈઝરાયેલમાં ભારતીય નાગરિકો ફસાયા

આ નિર્ણયનો સીધો અસર ઈઝરાયેલમાં રહેતા 40,000થી વધુ ભારતીય નાગરિકો પર પડ્યો છે. આ લોકો વિવિધ કારણોસર, જેમ કે નોકરી, અભ્યાસ અથવા વ્યક્તિગત કામ માટે ઈઝરાયેલમાં રહે છે અને હાલના તણાવને કારણે તેઓ ભારત પરત ફરવા માંગે છે. ફ્લાઇટ્સ બંધ થવાથી તેમની મુશ્કેલીઓ વધી ગઈ છે.

હાલની પરિસ્થિતિમાં, જે ભારતીયો ઈઝરાયેલ છોડવા ઈચ્છે છે, તેઓને જમીન માર્ગ દ્વારા જોર્ડન અથવા ઇજિપ્ત તરફ જવું પડે છે અને ત્યારબાદ ત્યાંથી ભારત માટે ફ્લાઇટ લેવી પડે છે. તેલ અવીવ સ્થિત ભારતીય દૂતાવાસ દ્વારા આ પ્રક્રિયામાં લોકોને માર્ગદર્શન અને મદદ પૂરી પાડવામાં આવી રહી છે.

ભારતીય નાગરિકો સાથે સતત સંપર્ક

દૂતાવાસે ભારતીય નાગરિકો સાથે સતત સંપર્ક જાળવી રાખ્યો છે. તેમની સહાય માટે 24 કલાક ચાલુ રહે તેવી ઇમરજન્સી હેલ્પલાઇન શરૂ કરવામાં આવી છે અને મોટા પાયે રજીસ્ટ્રેશન અભિયાન પણ હાથ ધરવામાં આવ્યું છે. તાજેતરમાં ભારતીય રાજદૂત અને દૂતાવાસની ટીમે ઇઝરાયેલમાં રહેલા ભારતીય કામદારો અને વિદ્યાર્થીઓ સાથે વર્ચ્યુઅલ બેઠક યોજી હતી, જેમાં તેમની ચિંતાઓ સાંભળી અને જરૂરી સહાય આપવાની ખાતરી આપી.

ખાડી દેશોમાં હાલ સ્થિતિ

ઉલ્લેખનીય છે કે નવી દિલ્હી અને તેલ અવીવ વચ્ચેની સીધી ઉડાન સેવા આ વર્ષે 1 જાન્યુઆરીથી ફરી શરૂ કરવામાં આવી હતી, જેમાં દર અઠવાડિયે ચાર ફ્લાઇટ્સ સંચાલિત થતી હતી. આ સેવા માટે આધુનિક બોઇંગ 787 ડ્રીમલાઇનર વિમાનનો ઉપયોગ કરવામાં આવતો હતો. પરંતુ 28 ફેબ્રુઆરી પછી, જ્યારે અમેરિકા અને ઈઝરાયેલ દ્વારા ઈરાન પર હુમલો કરવામાં આવ્યો, ત્યારથી પરિસ્થિતિ વધુ ગંભીર બની ગઈ છે.

ઈરાનની જવાબી કાર્યવાહી બાદ આ સંઘર્ષ સમગ્ર ખાડી વિસ્તારમાં ફેલાયો છે, જેના કારણે ઊર્જા પુરવઠા અને ખાસ કરીને હોર્મુઝ સ્ટ્રેટ આસપાસના વિસ્તારોમાં ભારે અસર જોવા મળી રહી છે. હાલની પરિસ્થિતિને ધ્યાનમાં રાખીને આંતરરાષ્ટ્રીય મુસાફરી પણ ગંભીર રીતે પ્રભાવિત થઈ રહી છે.

06 એપ્રિલના મહત્વના સમાચાર : યુદ્ધ વચ્ચે ટ્રમ્પનું ઇરાનને વધુ એક અલ્ટિમેટમ,ડીલ માટે ઇરાનને આપ્યો આવતીકાલ સુધીનો સમય