Breaking News : ટ્રમ્પ સરકારની ભારતને ‘મહાન ગિફ્ટ’! આ વસ્તુ પર 25% ટેરિફ હટાવવાના સંકેત
અમેરિકાની ટ્રમ્પ સરકાર તરફથી ભારત માટે મોટા રાહતભર્યા સંકેત મળ્યા છે. યુએસ ટ્રેઝરી સેક્રેટરી સ્કોટ બેસન્ટે જણાવ્યું છે કે ભારત દ્વારા રશિયન તેલની ખરીદી પર લગાવવામાં આવેલ 25 ટકા ટેરિફ ટૂંક સમયમાં હટાવવામાં આવી શકે છે. તેમણે કહ્યું કે ટેરિફ લાગુ થયા બાદ ભારતીય રિફાઇનરીઓ દ્વારા રશિયન તેલની ખરીદીમાં ઘટાડો થયો છે અને અમેરિકાનું આ પગલું સફળ રહ્યું છે.
યુએસ સરકાર તરફથી મળેલા આ સંકેતો એવા સમયે આવ્યા છે જ્યારે ભારત અને યુરોપ વચ્ચે મોટા વેપાર કરારની જાહેરાત થવાની તૈયારી છે. ગ્રીનલેન્ડ મુદ્દે યુરોપ અને અમેરિકા વચ્ચે વધતા તણાવને કારણે, યુરોપ-અમેરિકા વેપારનો એક મોટો હિસ્સો ભારત તરફ વળવાની શક્યતા વ્યક્ત કરવામાં આવી રહી છે. આ જ કારણસર, તાજેતરમાં દાવોસમાં અમેરિકાએ યુરોપ પર નવા ટેરિફ લાદવાનો ઇનકાર કર્યો હતો. હવે અમેરિકા ભારતને પોતાની તરફ આકર્ષવાનો પ્રયાસ કરી રહ્યું છે. જો આ ટેરિફ દૂર થાય તો ભારતને અંદાજે 5 અબજ ડોલર, એટલે કે લગભગ 50 હજાર કરોડ રૂપિયાનું આર્થિક લાભ થઈ શકે છે.
યુએસ રાષ્ટ્રપતિ ડોનાલ્ડ ટ્રમ્પે અનેક દેશો પર ટેરિફ લાદ્યા
યુએસ ટ્રેઝરી સેક્રેટરી સ્કોટ બેસન્ટે વધુમાં જણાવ્યું કે યુરોપિયન દેશોએ ભારત દ્વારા રશિયન ઊર્જાની ખરીદી પર ટેરિફ લાદવાનો ઇનકાર કર્યો હતો, કારણ કે તેઓ ભારત સાથે વ્યાપક વેપાર કરાર કરવા ઈચ્છતા હતા. નોંધનીય છે કે ઓગસ્ટ 2025માં, ત્યારે યુએસ રાષ્ટ્રપતિ ડોનાલ્ડ ટ્રમ્પે અનેક દેશો પર ટેરિફ લાદ્યા હતા અને ભારતની રશિયા સાથેની ઊર્જા ખરીદીનો ઉલ્લેખ કરીને ભારતીય આયાત પર કુલ 50 ટકા ટેરિફ લગાવ્યો હતો, જેમાં 25 ટકા રશિયન તેલ ટેરિફનો સમાવેશ થતો હતો.
દાવોસમાં મીડિયા સાથે વાત કરતા ટ્રમ્પે વડાપ્રધાન નરેન્દ્ર મોદીને પોતાના નજીકના મિત્ર ગણાવ્યા હતા. તેમણે વિશ્વાસ વ્યક્ત કર્યો હતો કે ટેરિફ મુદ્દે તણાવ હોવા છતાં ભારત અને અમેરિકા વચ્ચે વેપાર કરાર શક્ય છે. ટ્રમ્પે કહ્યું હતું કે તેમને મોદીજી માટે ખૂબ માન છે અને તેઓ એક અદ્ભુત વ્યક્તિ છે. ટ્રમ્પે અગાઉ પણ કહ્યું હતું કે ભારતે અમેરિકાના દબાણને ધ્યાનમાં રાખીને રશિયન તેલની આયાતમાં ઘટાડો કર્યો છે.
રાષ્ટ્રીય હિત અને ભાવ સ્થિરતા પર ધ્યાન
ટ્રમ્પે ટેરિફ મુદ્દે ટિપ્પણી કરતા જણાવ્યું હતું કે ભારત તેમને ખુશ કરવા માંગતું હતું. તેમણે ચેતવણી પણ આપી હતી કે જો ભારત રશિયન ઊર્જા મુદ્દે અમેરિકાના વલણ સાથે સહમત ન થાય તો તેને કઠોર વેપાર પરિણામો ભોગવવા પડી શકે. ટ્રમ્પે કહ્યું હતું કે અમેરિકા ભારત પર ટેરિફ ઝડપથી વધારી શકે છે, જે ભારત માટે નુકસાનકારક સાબિત થઈ શકે. જોકે, ભારતે સ્પષ્ટ કર્યું છે કે તેની ઊર્જા નીતિ રાષ્ટ્રીય હિત અને ભાવ સ્થિરતાને ધ્યાનમાં રાખીને નક્કી કરવામાં આવે છે.
આ તમામ નિવેદનો એવા સમયે સામે આવ્યા છે જ્યારે યુએસ કોંગ્રેસ એક એવા પ્રસ્તાવિત બિલ પર ચર્ચા કરી રહી છે, જેમાં રશિયન તેલ ખરીદતા દેશો પર 500 ટકા સુધીના ભારે ટેરિફ લાદવાની જોગવાઈ છે. ભારતે સ્પષ્ટપણે કહ્યું છે કે તેની ‘ઇન્ડિયા ફર્સ્ટ’ ઊર્જા નીતિ અડગ છે અને દેશની પ્રાથમિકતા તેના 1.4 અબજ નાગરિકો માટે સસ્તી અને પોસાય તેવી ઊર્જા સુનિશ્ચિત કરવાની છે.
ભારત વૈશ્વિક બજારની વાસ્તવિકતાઓ
વિદેશ મંત્રાલયના પ્રવક્તા રણધીર જયસ્વાલે પ્રસ્તાવિત યુએસ બિલ અંગે પ્રતિક્રિયા આપતાં જણાવ્યું હતું કે ભારત આ વિકાસથી વાકેફ છે અને તેની નજીકથી દેખરેખ રાખી રહ્યું છે. વોશિંગ્ટનમાં વધતા કાયદાકીય દબાણ વચ્ચે પણ, ભારત વૈશ્વિક બજારની વાસ્તવિકતાઓ સાથે પોતાની વ્યૂહાત્મક સ્વાયત્તતાનું સંતુલન જાળવવાનો પ્રયાસ ચાલુ રાખી રહ્યું છે.
