ક્ષત્રિયોના વિરોધ વચ્ચે રૂપાલાએ શરૂ કર્યો ડોર ટુ ડોર પ્રચાર, તો રાજપૂત કરણીસેનાના મહિપાલ મકરાણાએ આપી આ ચીમકી- જુઓ વીડિયો
રાજકોટમાં ક્ષત્રિય સમાજના વિરોધ વચ્ચે પરશોત્તમ રૂપાલાએ ડોર ટુ ડોર ચૂંટણી પ્રચાર શરૂ કર્યો છે. એકતરફ ભાજપ રાજકોટ બેઠક જીતવા એડીચોટીનું જોર લગાવતા તડામાર તૈયારીઓ શરૂ કરી દીધી છે. બીજી તરફ રાજપૂત કરણીસેનાના રાષ્ટ્રીય અધ્યક્ષે રૂપાલાને લઈને આ ચીમકી ઉચ્ચારી છે.
રાજકોટમાં પરશોત્તમ રૂપાલાના એક નિવેદનની શરૂ થયેલી વિવાદની આગ હજુ શાંત થઈ નથી અને રોજ તેમા કંઈને કંઈ ઉતારચડાવ જોવા મળી રહ્યા છે. ક્યારેક એવુ જોવા મળે છે કે આંદોલન ઠંડુ પડ્યુ છે તો ફરી કોઈ ક્ષત્રિય નેતાના નિવેદનથી આંદોલન વધુ જલદ બનતુ દેખાઈ આવે છે. રાજકોટમાં એકતરફ પરશોત્તમ રૂપાલાએ ઝંઝાવાતી પ્રચાર શરૂ કર્યો છે. રૂપાલાએ ડોર ટુ ડોર પ્રચારની શરૂઆત કરી છે. પશ્ચિમ વિધાનસભા બેઠક પર મધ્યસ્થ કાર્યાલયનું ઉદ્દઘાટન કરવામાં આવ્યુ છે. અમૃતસાગર પાર્ટી પ્લોટમાં રૂપાલાની જનસભા યોજાઈ હતી.
આ તમામ ઘટનાક્રમ વચ્ચે રાજપૂત કરણીસેનાના રાષ્ટ્રીય અધ્યક્ષ મહિપાલસિંહ મકરાણાનું નિવેદન સામે આવ્યુ છે. તેમણે જણાવ્યુ છે કે રૂપાલા અમારી બહેન દીકરીઓ વિશે અભદ્ર ટિપ્પણી કરે છે. તેમણે જણાવ્યુ કે ભાજપ વારંવાર રાજપૂત સમાજને પ્રતાડિત કરવાનુ કામ કરે છે. અમારી માત્ર એટલી જ માગ છે કે એવી કોઈપણ વ્યક્તિને સંસદમાં મોકલવામાં ન આવે. તેમણે રૂપાલાની ટિકિટ રદ કરવાની માગ સાથે ચીમકી ઉચ્ચારી કે જો તેમ નહીં થાય તો રાજપૂત કરણી સેના દેશવ્યાપી આંદોલન કરશે.
આ તરફ જામનગરના કાલાવડમાં ક્ષત્રિયોએ રૂપાલાના પુતળાનું દહન કરીને વિરોધ નોંધાવ્યો તો વડોદરાના ડભોઇમાં 15 જેટલા ગામોમાં ક્ષત્રિયોએ બેનર લગાવી રૂપાલા અને ભાજપનો વિરોધ કર્યો. આ તરફ પરશોત્તમ રૂપાલા 5 લાખ મતોના અતંરથી ચૂંટણી જીતવાના લક્ષ્ય સાથે પ્રચારમાં નીકળી પડ્યા છે. રાજકોટના સંત કબીર રોડ પર રૂપાલાએ પોતાના કાફલા સાથે જઇને જનસંપર્ક કર્યો.
પરશોત્તમ રૂપાલાના વિવાદિત નિવેદન મામલે ક્ષત્રિયો લડી લેવાના મૂડમાં છે. ક્ષત્રિય સમાજને રૂપાલાની ટિકિટ કપાય તેનાંથી ઓછું કંઇ ખપે તેમ નથી. બીજી તરફ રૂપાલા બે વાર માફી માગી ચુક્યા છે, પ્રદેશ ભાજપ પ્રમુખે પણ બે હાથ જોડી માફી માંગી છે. પરંતુ ઉગ્ર થતા વિરોધ વચ્ચે ભાજપ હવે મચક આપવા તૈયાર નથી. ત્યારે આ મામલે હવે વિશ્વ હિન્દુ પરિષદ મેદાને આવી છે અને આ ખટરાગ હવે સામાજિક વિગ્રહમાં ન ફેરવાઇ જાય તે માટે સુખદ સમાધાનનો પ્રયાસ થઇ રહ્યો છે.
આ પણ વાંચો: રાજકોટમાં પરશોત્તમ રૂપાલાની સભા બહાર ક્ષત્રિય મહિલાઓનું વિરોધ પ્રદર્શન, પોલીસ સાથે કરી ઝપાઝપી- જુઓ Video