Breaking News : રાજકોટમાં એનાલોગ પનીર પર કાર્યવાહી, 8 પેઢીઓના લાયસન્સ સસ્પેન્ડ, મોટા પાયે શંકાસ્પદ જથ્થો જપ્ત
રાજકોટ જિલ્લા આરોગ્ય વિભાગે એનાલોગ પનીર સામે સઘન કાર્યવાહી હાથ ધરી છે. રાજ્ય સરકારની ટાસ્ક ફોર્સ હેઠળ રાજકોટ રૂરલ SOG દ્વારા દરોડા પાડવામાં આવ્યા હતા, જેમાં શાપર-વેરાવળ અને ગોંડલની ત્રણ ડેરીઓમાંથી 1165 કિલો શંકાસ્પદ માવો, મીઠાઈ અને દૂધની બનાવટો જપ્ત કરવામાં આવી હતી.
રાજકોટ શહેર બાદ હવે જિલ્લા આરોગ્ય વિભાગે એનાલોગ પનીર અને ભેળસેળયુક્ત દૂધની બનાવટો સામે કડક કાર્યવાહી હાથ ધરી છે. લોકોના સ્વાસ્થ્ય સાથે ચેડા કરતા તત્ત્વોને રોકવા માટે રાજ્ય સરકારના આદેશ બાદ એક વિશેષ ટાસ્ક ફોર્સની રચના કરવામાં આવી છે, જેના ભાગરૂપે આ સઘન ઝુંબેશ ચલાવવામાં આવી રહી છે. આ કાર્યવાહીના પરિણામે જિલ્લામાં એનાલોગ પનીરનું ઉત્પાદન કરતી 8 પેઢીઓના લાયસન્સ સસ્પેન્ડ કરવામાં આવ્યા છે.
તાજેતરની કાર્યવાહીમાં, રાજકોટ રૂરલ SOG દ્વારા જિલ્લાના ગ્રામ્ય વિસ્તારોમાં વ્યાપક તપાસ હાથ ધરવામાં આવી હતી. આ તપાસનો મુખ્ય હેતુ એનાલોગ પનીર અને ભેળસેળયુક્ત દૂધની બનાવટોના ઉત્પાદન અને વેચાણને રોકવાનો હતો. ગઈકાલે હાથ ધરાયેલી આ ઝુંબેશ દરમિયાન, ત્રણ અલગ-અલગ સ્થળોએથી શંકાસ્પદ દૂધ અને દૂધની ડુપ્લીકેટ બનાવટોનો જથ્થો મળી આવ્યો હતો.
કુલ 1165 કિલોગ્રામ જેટલો શંકાસ્પદ માવો
જે પેઢીઓ સામે કાર્યવાહી કરવામાં આવી તેમાં શાપર-વેરાવળના ઔદ્યોગિક વિસ્તારમાં આવેલી જય ખોડિયાર ડેરી પ્રોડક્ટ, શ્રીજી કોર્પોરેશન અને ગોંડલ તાલુકાના સડક પીપળીયાની બજરંગ ડેરીનો સમાવેશ થાય છે. આ દરોડા દરમિયાન, કુલ 1165 કિલોગ્રામ જેટલો શંકાસ્પદ માવો, મીઠાઈ અને અન્ય દૂધની પ્રોડક્ટ્સ જપ્ત કરીને તેનો નાશ કરવામાં આવ્યો હતો. આ ઉપરાંત, સ્થળ પરથી 400 લીટર જેટલું શંકાસ્પદ દૂધ, સેપરેટર અને દૂધમાં ભેળસેળ કરવા માટે ઉપયોગમાં લેવાતા કૃત્રિમ કલરના ડબ્બા પણ મળી આવ્યા હતા, જે ભોજનની ગુણવત્તા સાથે ગંભીર ચેડાંનો સંકેત આપે છે.
પોલીસ દ્વારા સમગ્ર મામલે તાત્કાલિક આરોગ્ય વિભાગને જાણ કરવામાં આવી હતી. આરોગ્ય વિભાગની ટીમે દરોડાવાળી તમામ પેઢીઓમાંથી ઉત્પાદનોના નમૂના લીધા હતા અને તેમને પરીક્ષણ માટે મોકલી આપ્યા હતા. પરીક્ષણના રિપોર્ટના આધારે આગળની કાયદેસરની કાર્યવાહી હાથ ધરવામાં આવશે. આ કાર્યવાહી દર્શાવે છે કે રાજ્ય સરકાર અને સંબંધિત વિભાગો લોકોના સ્વાસ્થ્ય અને ખાદ્ય સુરક્ષા પ્રત્યે અત્યંત ગંભીર છે.
8 કિલો એનાલોગ પનીર મળી આવતા તેનો નાશ કરાયો
અગાઉ રાજકોટ શહેરમાં પણ આવી જ કાર્યવાહી કરવામાં આવી હતી, જ્યાં એનાલોગ પનીર સામે ઝુંબેશ ચલાવવામાં આવી હતી. જિલ્લા આરોગ્ય વિભાગે કુલ 12 જેટલી પેઢીઓમાં સઘન ચેકિંગ હાથ ધર્યું હતું. તપાસ બાદ 8 કિલો એનાલોગ પનીરનો જથ્થો મળી આવતા તેનો નાશ કરવામાં આવ્યો હતો અને કુલ 8 પેઢીઓના લાયસન્સ સસ્પેન્ડ કરવામાં આવ્યા હતા. જામકંડોરણાની શ્રી વૃંદાવન ગીર ગૌશાળા સહિત અનેક પેઢીઓ સામે કાર્યવાહી કરવામાં આવી હતી. આ સઘન ઝુંબેશનો ઉદ્દેશ્ય બજારમાં વેચાતા ભેળસેળયુક્ત ખાદ્ય પદાર્થોને અટકાવીને લોકોને સુરક્ષિત અને સ્વચ્છ આહાર પૂરો પાડવાનો છે.
અમેરિકામાં જન્મેલા વિદેશીઓના બાળકોને નહીં મળે નાગરિકતા! ટ્રમ્પ સરકારના નિર્ણયથી ગુજરાતીઓને મોટી અસર
