25 જાન્યુઆરીના મહત્વના સમાચાર : રાજકોટમાં હાડ થીજવતી ઠંડીમાં બાવળની જાડી વચ્ચે માસુમ ફૂલ જેવી નવજાત બાળકી તરછોડી દેવાઈ

રાજકોટમાં હાડ થીજવતી ઠંડીમાં બાવળની જાડી વચ્ચે માસુમ ફૂલ જેવી નવજાત બાળકી તરછોડી દેવાઈ

રાજકોટમાં તરછોડાયેલી નવજાત બાળકી મળી આવી. હાડ થીજવતી ઠંડીમાં બાવળની જાડી વચ્ચે માસુમ ફૂલ જેવી બાળકી તરછોડી દેવાઈ હતી. સાણથલી ગામના વાસાવડ રોડ નજીકથી બાળકી મળી આવી હતી. ગઈકાલે નવજાત બાળકી વાવરુ જગ્યાએથી મળી આવી હતી. માસુમ બાળકીને પગમાં કોઈ જીવજંતુ પણ કરડ્યું હતું. બાળકી રડતી હોવાનો અવાજ આવતા સ્થાનિક લોકોએ જોયું તો બાળકીને કોઈ મૂકીને જતું રહ્યું હતું. 108 એમ્બ્યુલન્સની મદદથી રાજકોટમાં બાળકીને રાજકોટ ખસેડવામાં આવી. રાજકોટની જનાના હોસ્પિટલમાં બાળકીને સારવાર માટે ખસેડવામાં આવી છે. પોલીસે તપાસ હાથ ધરી છે.

રાજકોટમાં 9.2, પોરબંદરમાં 9, નલિયામાં 10.4, અમદાવાદમાં 14, ડીસામાં 10 ડિગ્રી ઠંડી નોંધાઈ

વેસ્ટર્ન ડિસ્ટર્બન્સને પગલે, હિમાલયની પર્વતમાળામાં વરસી રહેલા બરફ અને ઉત્તર ઉત્તર પૂર્વ દિશા તરફથી ફુંકાઈ રહેલા ઠંડા હિમ પવનને કારણે ગુજરાતમાં ઠંડીનો પ્રકોપ વર્તાયો છે. ભારતીય હવામાન વિભાગે સત્તાવાર જાહેર કરેલ ઠંડીના આંકડા અનુસાર, આજે 25મી જાન્યુઆરીના રોજ, ગુજરાતમાં સૌથી વધુ ઠંડી સૌરાષ્ટ્રના પોરબંદરમાં નોંધાઈ છે. પોરબંદરમાં ઠંડીનો પારો ગગડીને 9 ડિગ્રીએ પહોચ્યો છે જ્યારે રાજકોટમાં ઠંડીનો પારો 9.2 ડિગ્રીએ અટક્યો છે. અમદાવાદ શહેરમાં ઠંડીનો પારો ગઈકાલ શનિવારની સરખામણીએ રવિવારે ઉચકાઈને 14 ડિગ્રીએ પહોચ્યો છે.

જૂનાગઢના બીલખામાં પાંચ શ્વાને સાત વર્ષના બાળકને ભર્યા બચકા, સારવાર માટે જૂનાગઢ ખસેડાયો

જૂનાગઢમાં રખડતા શ્વાનનો આતંક સામે આવ્યો છે. સાત વર્ષના બાળક પર એક સાથે પાંચ શ્વાને હુમલો કરીને બાળકને શરીર પર ગંભીર ઈજાઓ પહોચાડી છે. બીલખા પ્રાથમિક સારવાર આપ્યા બાદ વધુ સારવાર માટે જૂનાગઢ ખસેડવામાં આવ્યો હતો. બાળકને સાત જેટલા ટાંકા આવ્યા હોવાનુ સ્થાનિકો એ જણાવ્યું. પહેલા પણ એક નાની બાળકી પર શ્વાન દ્વારા હુમલો કરવામાં આવ્યો હતો. બીલખાના મસ્જિદ વિસ્તારનો બનાવ. અનેક રજુઆત છતા ગ્રામ પંચાયત દ્વારા કોઈ પગલા લેવામા આવતા નથી.

અમીરગઢના ઈકબાલગઢ હાઇવે પર કાર અને ટ્રક વચ્ચે અકસ્માત, 7ના મોત, 3 ઘાયલ

બનાસકાંઠાના ઈકબાલગઢ હાઈવે પર ગઈકાલ શનિવારે રાત્રે સર્જાયેલા ટ્ર્ક અને કાર વચ્ચેના અકસ્માતમાં 7 લોકોના કરુણ મોત થયા હતા. જ્યારે 3 લોકોને ગંભીર ઈજા પહોચી છે. પાલનપુરથી કાર રાજસ્થાન તરફ જઈ રહી હતી ત્યારે સર્જાયો અકસ્માત. ટ્રક ડિવાઇડર કુદી અને ઇનોવા સાથે ધડાકાભેર અથડાઈ હતી જેને કારણે સર્જાયો અકસ્માત.

તમામ મૃતકો અને ઘાયલ રાજસ્થાનના રહીશ હોવાનું સામે આવ્યું છે. પાલનપુર હોસ્પિટલમાં તબિયત બતાવીને અને રાજસ્થાન પરત ફરતા સર્જાયો અકસ્માત. છ મૃતકો ને અમીરગઢ રેફરલ અને એક મૃતક પાલનપુર સિવિલમાં પીએમ અર્થે મોકલાયા છે. જ્યારે ત્રણ ઘાયલ પાલનપુર સિવિલમાં સારવાર માટે દાખલ કરાયા હતા. જેમાંથી બે ઇજાગ્રસ્તોને વધુ સારવાર અર્થે ખાનગી હોસ્પિટલમાં ખસેડાયા છે. જિલ્લા પોલીસ વડા પ્રશાંત સુબે એ ઘટના સ્થળે જઈ સ્થિતિનું નિરીક્ષણ કર્યું. અકસ્માતને પગલે જામ થયેલા ટ્રાફિકનું પોલીસે નિયંત્રણ કર્યું અને ટ્રાફિક પૂર્વવત કરાયો હતો. અમીરગઢ પોલીસે અકસ્માત મામલે તપાસ હાથ ધરી છે.

પીએમ મોદી આજે “મન કી બાત” કાર્યક્રમને સંબોધિત કરશે

પ્રધાનમંત્રી નરેન્દ્ર મોદી આજે સવારે 11 વાગ્યે “મન કી બાત” કાર્યક્રમમાં ભારત અને વિદેશના લોકો સાથે પોતાના વિચારો શેર કરશે. આ દરેક મહિનાના છેલ્લા રવિવારે પ્રસારીત થતા રેડિયો કાર્યક્રમ મન કી બાતનો આ 130મો એપિસોડ હશે.

જામનગરમાં હીરજી મિસ્ત્રી રોડ પર આવેલ ઉદ્યોગનગર વિસ્તારમાં પાર્ક કરેલ બસમાં આગ ભભૂકી ઉઠી

જામનગરમાં મોડી રાત્રે એક ખાનગી બસમાં અચાનક લાગી આગ હતી. શહેરના હીરજી મિસ્ત્રી રોડ પર આવેલ ઉદ્યોગનગર વિસ્તારમાં પાર્ક થયેલ બસમાં આગ ભભૂકી ઉઠી હતી. જાહેર માર્ગ પર બસમાં આગ લાગવાના કારણે આસપાસના વિસ્તારમાં અફરાતફરી મચી ગઈ હતી. બસમાંથી ધુમાડા અને આગની લપેટો દેખાતા લોકોના ટોળાં ઘટના સ્થળે ઉમટી પડ્યા હતા. ઘટનાની જાણ થતાં જ મનપાની અગ્નિશામક દળ તાત્કાલિક ઘટના સ્થળે પહોંચ્યુ હતું. ફાયર વિભાગની ભારે જહેમત બાદ આગને કાબુમાં લીધી હતી.

ધોળકા તાલુકાના ધોળી ગામ પાસે આવેલી પ્રીમિયર સ્પિનટેક્સ કંપનીમાં લાગી આગ

અમદાવાદના ધોળકા તાલુકાના ધોળી ગામ પાસે આવેલી પ્રીમિયર સ્પિનટેક્સ કંપનીમાં આગ લાગવાનો બનાવ બન્યો છે. કંપનીના બીજા માળે આગ લાગતાં, ધુમાડાના ગોટેગોટા જોવા મળ્યા હતા. આગ ઘટનાની જાણ થતાં જ ધોળકા ફાયર વિભાગને જાણ કરાઈ હતી, જેના પગલે ધોળકા નગરપાલિકા તેમજ ચિરિપાલ કંપનીની ફાયર ફાઈટરની ટીમ તાત્કાલિક ઘટનાસ્થળે પહોંચી ગઈ હતી. આગ ઝડપથી ફેલાઈને ગોડાઉન સુધી પહોચી હતી, જેના કારણે સ્થિતિ વધુ ગંભીર બની હતી.