12 મેના મહત્વના સમાચાર : આજે આસામમાં નવી સરકારની શપથવિધિ, હિમંતા બિસ્વા શર્મા ફરી સંભાળશે CM પદ

આજે આસામમાં નવી સરકારની શપથવિધિ યોજાવાની છે, જેમાં હિમંતા બિસ્વા શર્મા બીજી વખત રાજ્યના મુખ્યમંત્રી તરીકે શપથ ગ્રહણ કરશે. ગુવાહાટીના વેટરનરી કોલેજ ગ્રાઉન્ડ ખાતે સવારે 11:40 કલાકે યોજાનારા આ ભવ્ય સમારોહમાં પ્રધાનમંત્રી નરેન્દ્ર મોદી સહિત અનેક રાજ્યોના મુખ્યમંત્રીઓ હાજરી આપશે. મુખ્યમંત્રી સાથે ચાર ધારાસભ્યો પણ મંત્રી તરીકે શપથ લેશે. જેમાં રામેશ્વર તેલી, અતુલ બોરા, ચરણ બોરો અને અજંતા નિઓગનો સમાવેશ થાય છે. સમગ્ર રાજ્યમાં શપથવિધિને લઈ ઉત્સાહનો માહોલ જોવા મળી રહ્યો છે.

અમરેલી જિલ્લામાં સિંહણની પજવણીની ચોંકાવનારી ઘટના સામે આવી છે. નાની ધારી ગામ નજીક કેટલાક શખ્સોએ સિંહણને શ્વાનની જેમ દોડાવતાં તેની પાછળ ક્રૂરતાપૂર્વક બાઈક દોડાવી હોવાનો વીડિયો વાયરલ થયો હતો. ઘટનાને ગંભીરતાથી લઈ વન વિભાગે તાત્કાલિક કાર્યવાહી હાથ ધરી હતી. મામલે શિવરાજ માંજરીયા અને રણજીત માંજરીયાની ધરપકડ કરવામાં આવી છે. ખાંભા કોર્ટે બંને આરોપીઓના બે દિવસના રિમાન્ડ મંજૂર કરતા વધુ તપાસ શરૂ કરવામાં આવી છે.

ગુજરાતમાં આગામી ચાર દિવસ દરમિયાન કાળઝાળ ગરમી લોકોના ભુક્કા બોલાવશે તેવી હવામાન વિભાગે આગાહી કરી છે. રાજ્યના અનેક વિસ્તારોમાં હિટવેવ જેવી પરિસ્થિતિ સર્જાવાની શક્યતા છે, જ્યારે તાપમાન 45 ડિગ્રી સુધી પહોંચે તેવી ભીતિ વ્યક્ત કરવામાં આવી છે. ખાસ કરીને કચ્છ અને સુરેન્દ્રનગર જિલ્લામાં ઓરેન્જ એલર્ટ જાહેર કરવામાં આવ્યું છે. તીવ્ર ગરમી અને લૂના કારણે લોકોને બપોરના સમયે બહાર ન નીકળવા તેમજ પૂરતું પાણી પીવાની સલાહ આપવામાં આવી છે.