Breaking News : વિવાદથી ઘેરાયેલી કીર્તિ પટેલ, હવે સંતસમાજ સામે નમવું પડ્યું? ગુરુની હાજરીમાં લીધો મોટો વળાંક

જૂનાગઢમાં છેલ્લા કેટલાક દિવસોથી ચર્ચાના કેન્દ્રમાં રહેલા કીર્તિ પટેલ અને ઈન્દ્રભારતી બાપુ વચ્ચે અંતે સમાધાન થઈ ગયું છે. ભારતી આશ્રમમાં સોમવારે યોજાયેલી બેઠકમાં કીર્તિ પટેલના ગુરુ હરિહરાનંદ ભારતીની હાજરીમાં આ મામલો સમાપ્ત કરાયો હતો. બેઠક દરમિયાન ઈન્દ્રભારતી બાપુ અને મહેન્દ્રાનંદ બાપુ પણ ઉપસ્થિત રહ્યા હતા.

ઉલ્લેખનીય છે કે મૃગીકુંડમાં સ્નાન મુદ્દે સર્જાયેલા વિવાદ બાદ ઈન્દ્રભારતી બાપુએ કીર્તિ પટેલને બહાર કાઢી મુક્યા હતા. ત્યારબાદ કીર્તિ પટેલે સોશિયલ મીડિયા પર ઈન્દ્રભારતી બાપુ વિરુદ્ધ આક્ષેપોના વીડિયો જાહેર કર્યા હતા, જેને કારણે સંત સમાજમાં ભારે ચકચાર મચી હતી. વિવાદ દરમિયાન કીર્તિ પટેલ સામે ત્રણ ગુનાઓ પણ નોંધાયા હતા, જેના કારણે તેમની ભૂમિકા પર અનેક પ્રશ્નો ઊભા થયા હતા.

હરિહરાનંદ ભારતી બાપુએ સમાધાનની પુષ્ટિ કરી

વિવાદની ગરમી વચ્ચે કીર્તિ પટેલ દ્વારા ઈન્દ્રભારતીના “ચીઠ્ઠા ખોલવાની” ધમકી આપવામાં આવી હોવાના દાવાઓ પણ સામે આવ્યા હતા. પરંતુ અચાનક જ સોમવારે સાંજે મહેન્દ્રાનંદ બાપુ કીર્તિ પટેલને લઈને ભારતી આશ્રમ પહોંચ્યા હોવાની માહિતી બહાર આવી. ત્યારબાદ હરિહરાનંદ ભારતી બાપુએ સમાધાનની પુષ્ટિ કરી અને સમગ્ર વિવાદનો અંત આવ્યાનું જણાવ્યું.

બેઠક દરમિયાન કીર્તિ પટેલે ઈન્દ્રભારતી બાપુ સહિત અન્ય સંતોને સાલ ઓઢાડી માન આપ્યું, જેને સમાધાનનું પ્રતિક માનવામાં આવી રહ્યું છે. તેમ છતાં આ અચાનક થયેલા ફેરફારને લઈને શહેરમાં અનેક અટકળો ચાલી રહી છે. સોશિયલ મીડિયા પર કડક નિવેદનો અને આક્ષેપો બાદ સમાધાન સુધીનો આ સફર અનેક સવાલો ઊભા કરે છે.

હાલમાં બંને પક્ષો વચ્ચે થયેલા સમાધાનથી સંતસમાજ અને ભક્તોમાં રાહતનો માહોલ છે. આશા છે કે ભવિષ્યમાં આવી ગેરસમજો ફરી ન ઊભી થાય અને ધાર્મિક પરંપરાઓ સાથે શાંતિ અને સૌહાર્દ જળવાઈ રહે. હાલ તો આશ્રમ તરફથી વિવાદ પૂર્ણ થયાનું કહેવામાં આવી રહ્યું છે, પરંતુ સમગ્ર ઘટનાક્રમને લઈને ચર્ચાઓ યથાવત છે.

જૂનાગઢમાં કીર્તિ પટેલ Vs ઇન્દ્રભારતી બાપુ, કીર્તિ પટેલે લગાવ્યા આક્ષેપ, વીડિયોથી વિવાદ આ સ્ટોરી વાંચવા અહીં ક્લિક કરો