રીલ બનાવવા માટે રિયલ લાઈફ જોખમમાં, અમદાવાદ ફતેવાડી કેનાલમાં સ્કોર્પિયો કાર ખાબકી, જુઓ CCTV Video
અમદાવાદની ફતેવાડી કેનાલમાં સ્કોર્પિયો કાર ખાબકી, CCTV આ સમગ્ર ઘટનાના સામે આવ્યા છે. રીલ બનાવવાના શોખમાં ત્રણ યુવકો કેનાલમાં ડૂબતા લાપતા, ફાયર બ્રિગેડ-પોલીસ દ્વારા સર્ચ ઓપરેશન હાથ ધરાયું.
અમદાવાદના સરખેજ વિસ્તારના ફતેવાડી કેનાલમાં આજે સાંજે એક સ્કોર્પિયો કાર અચાનક પલટી ખાઈ કેનાલમાં ખાબકી. ઘટના બનતા જ સ્થાનિક લોકો તરત જ દોડી આવ્યા અને બચાવ કામગીરી શરૂ કરી. ફાયર બ્રિગેડ અને પોલીસને જાણ કરતા જમાલપુર, પ્રહલાદનગર અને અસલાલી ફાયર સ્ટેશનની રેસ્ક્યૂ ટીમ તાત્કાલિક ઘટનાસ્થળે પહોંચી. હાલ ફાયર બ્રિગેડની ટીમ દ્વારા સતત બચાવ કામગીરી ચાલી રહી છે.
કેનાલમાં પાણીનો પ્રવાહ તીવ્ર
સ્થાનિક લોકો દોરડાની મદદથી કારમાં સવાર લોકોને બચાવવાનો પ્રયાસ કરી રહ્યા હતા, પણ કેનાલમાં પાણીનો પ્રવાહ તીવ્ર હોવાથી રેસ્ક્યૂ ઓપરેશનમાં મુશ્કેલીઓ આવી. પરિસ્થિતિને ધ્યાનમાં રાખીને કેનાલમાં પાણી છોડવાનું તાત્કાલિક બંધ કરાયું.
ફાયર બ્રિગેડની પ્રાથમિક માહિતી અનુસાર, કારમાં ત્રણ લોકો સવાર હતા. હાલમાં તેઓના પત્તા નથી લાગ્યા. ફાયર બ્રિગેડની અનેક ટીમો અને પોલીસ સાથે મળીને અલગ-અલગ જગ્યાએ શોધખોળ કરી રહી છે. કેનાલમાં સાઇફન તરફ પણ સર્ચ ઓપરેશન હાથ ધરાયું છે.
ગાડી યુ-ટર્ન લેતી વખતે બની ઘટના
પ્રાપ્ત વિગતો અનુસાર, વાસણા વિસ્તારમાં રહેતા હૃદય વયંતા, વેજલપુરના સોલંકી ધ્રુવ અને ઋતાયુ સોલંકી મજા માટે ગાડી લઈને વાસણા બેરેજ ગયા હતા. અહીં તેઓએ પોતાના મિત્ર વિરાજસિંહ રાઠોડ, યક્ષ ભંકોડિયા, યશ સોલંકી અને ક્રિશ દવે સાથે ભેગા થયા હતા. મજા માણતી વખતે યશ ભંકોડિયા અને પછી યશ સોલંકીએ ગાડી ચલાવવાનું શરૂ કર્યું. ગાડી યુ-ટર્ન લેતી વખતે કોઈ કારણસર નિયંત્રણ ગુમાવતાં ગાડી સીધા કેનાલમાં ઘસી ગઈ.
કેનાલમાં પાણી છોડવાનું બંધ કરાયું
વિરાજસિંહ રાઠોડ અને અન્ય મિત્રો દ્વારા દોરડું નાખી બચાવવાનો પ્રયાસ થયો, પરંતુ તીવ્ર પ્રવાહને કારણે ત્રણેય યુવકો તણાઈ ગયા. ફાયર બ્રિગેડની ટીમ સુરક્ષાના સાધનો સાથે આખી રાત સર્ચ ઓપરેશન ચલાવી રહી છે. કેનાલમાં પાણી છોડવાનું બંધ રાખવાથી પાણીનો સ્તર ઘટી રહ્યો છે, જેથી શોધખોળ સરળ બની રહી છે.
લાપતા બનેલા યુવકોના પરિવારજનો પણ ઘટનાસ્થળે પહોંચી ગયા છે અને તમામ લોકો આશાપૂર્વક બચાવ કામગીરી તરફ જોતા જોવા મળ્યા. ફાયર બ્રિગેડની ટીમ સતત પ્રયાસમાં છે કે યુવાનોને તાત્કાલિક શોધી બહાર લાવી શકાય.
