જો તમે ESIC ના લાભાર્થી છો, તો તમારા માટે આ સમાચાર અત્યંત મહત્વના છે. કેન્દ્રીય શ્રમ મંત્રાલય દ્વારા સ્પષ્ટતા કરવામાં આવી છે કે ESIC લાભાર્થીઓ માટે આધાર ઓથેન્ટિકેશન હવે અનિવાર્ય છે. મંત્રાલયે તમામ લાભાર્થીઓને પોતાના આધાર કાર્ડને ‘ESIC પહેચાન કાર્ડ’ સાથે વહેલી તકે લિંક કરવા આદેશ આપ્યો છે. ESIC અંતર્ગત કર્મચારીઓ અને તેમના પરિવારોને અનેક પ્રકારની સામાજિક સુરક્ષા તેમજ આરોગ્ય વિષયક સુવિધાઓ મળતી હોય છે. આવો જાણીએ કે ઘરે બેઠા તમે આ લિંકિંગ પ્રક્રિયા કેવી રીતે પૂરી કરી શકો છો:

આધારને ESIC ઓળખ કાર્ડ સાથે લિંક કરવું કેમ જરૂરી?

આધાર લિંકિંગનો મુખ્ય ઉદ્દેશ્ય ESIC લાભાર્થીઓની ઓળખને પ્રમાણિત (Authenticate) કરવાનો છે. તેનાથી સાચા લાભાર્થીની સચોટ પુષ્ટિ થાય છે અને ESIC ની સુવિધાઓ કોઈપણ અડચણ વગર સતત મળતી રહે છે. ઉલ્લેખનીય છે કે ESIC હેઠળ માત્ર દવાખાનામાં સામાન્ય સારવાર જ નહીં, પરંતુ હોસ્પિટલમાં દાખલ થવાનો ખર્ચ, મેટરનિટી બેનિફિટ્સ (પ્રસૂતિ સહાય), બીમારી દરમિયાન મળતી આર્થિક સહાય અને ફરજ દરમિયાન ઈજા થાય ત્યારે મળતા વળતર સહિતના મહત્વના લાભો સામેલ હોય છે. તેથી લાભાર્થીઓએ કોઈપણ વિલંબ વગર આધાર પ્રમાણીકરણની પ્રક્રિયા પૂર્ણ કરવી જરૂરી છે.

ઘરે બેઠા આ રીતે કરો આધાર અને ESIC લિંક:

1. સૌપ્રથમ ESIC ની સત્તાવાર વેબસાઇટ (portal.esic.gov.in) પર જાઓ.
2. તમારો ESIC યુઝર આઈડી અને પાસવર્ડ દાખલ કરીને એકાઉન્ટમાં લૉગિન કરો. (ધ્યાન રાખો કે તમારી લૉગિન વિગતો કોઈની સાથે શેર ન કરવી.)
3. લૉગિન થયા બાદ સ્ક્રીન પર “Aadhaar Seeding for IP” વિકલ્પ દેખાશે, તેના પર ક્લિક કરો.
4. ત્યાર પછી લાભાર્થીઓની યાદીમાં તમારું નામ તપાસો. નામ મળ્યા બાદ સામે આપેલા “Click Here to Seed Aadhaar” વિકલ્પ પર ક્લિક કરો.
5. હવે સંબંધિત સ્થાને તમારો આધાર નંબર દાખલ કરો અને આગળ વધો. તમારા આધાર સાથે લિંક થયેલા રજિસ્ટર્ડ મોબાઈલ નંબર પર એક OTP આવશે. આ OTP એન્ટર કરીને ઓથેન્ટિકેશન પૂર્ણ કરો.
6. વિનંતી સબમિટ થયા બાદ સ્ક્રીન પર એક રેફરન્સ નંબર જનરેટ થશે. આ નંબરને સાચવીને રાખો, જેથી ભવિષ્યમાં સ્ટેટસ ટ્રેક કરવામાં કામ આવે. ચકાસણી પૂર્ણ થયા બાદ તમારું આધાર ESIC રેકોર્ડ સાથે સફળતાપૂર્વક લિંક થઈ જશે.

આધાર સાથે જોડાયેલો મોબાઈલ નંબર એક્ટિવ હોવો જરૂરી

આ પ્રક્રિયા દરમિયાન એક ખાસ બાબત ધ્યાનમાં રાખવી અનિવાર્ય છે. તમારા આધાર કાર્ડ સાથે જે મોબાઈલ નંબર નોંધાયેલો હોય તે ચાલુ (Active) હોવો જોઈએ. ઓનલાઇન વેરિફિકેશન માટે વન ટાઇમ પાસવર્ડ (OTP) તે જ નંબર પર મોકલવામાં આવે છે. જો તમારો રજિસ્ટર્ડ નંબર બંધ હશે કે તમારી પાસે ઉપલબ્ધ નહીં હોય, તો OTP મેળવવામાં મુશ્કેલી પડી શકે છે અને પ્રક્રિયા અધૂરી રહી શકે છે.

રેલવે સ્ટેશન પર પ્લેટફોર્મ કેટલા પ્રકારના હોય છે ? સાઇડથી લઈને આઇલેન્ડ પ્લેટફોર્મ સુધીની રસપ્રદ વિગતો