પીએફ ખાતાધારકો માટે ખુશખબર ! EPFO એ પ્રોફાઈલ સુધારવાનું કામ કર્યું વધારે આસાન, જાણો ઘરે બેઠા બેઠા શું સુધારી શકશો

પીએફ ખાતાધારકો માટે સામાન્ય રીતે પ્રોફાઈલમાં રહેલી ભૂલો જેમ કે નામની સ્પેલિંગ, ખોટી જન્મતારીખ અથવા પિતાના નામમાં વિસંગતતા મોટી આફત સમાન સાબિત થતી હતી. ભૂતકાળમાં આ નાની ભૂલો સુધારવા માટે પીએફ ઓફિસ અને કંપનીના અસંખ્ય ધક્કા ખાવા પડતા હતા. પરંતુ હવે કર્મચારીઓ રોકાણ અને ઉપાડની પ્રક્રિયા સરળતાથી કરી શકે તે માટે ઈપીએફઓએ જોઈન્ટ ડિક્લેરેશન (Joint Declaration) ની આખી સિસ્ટમને પેપરલેસ અને ઓનલાઈન કરી દીધી છે. હવે સભ્યો કોઈપણ વચેટીયા વગર સીધા જ પોતાની વિગતો સુધારી શકશે.

આટલી વિગતોમાં ઘરે બેઠા થશે ફેરફાર

નવા નિયમો અને સત્તાવાર માહિતી અનુસાર, પીએફ સભ્યો પોતાની પ્રોફાઈલમાં આપેલું નામ, લિંગ (જેન્ડર), જન્મતારીખ, રાષ્ટ્રીયતા, વૈવાહિક સ્થિતિ, માતા-પિતા અથવા પતિ-પત્નીનું નામ, કંપનીમાં જોડાયાની તારીખ (જૉઇનિંગ ડેટ) અને નોકરી છોડ્યાની તારીખ (એક્ઝિટ ડેટ) સહિતની મહત્વની વિગતોમાં ઓનલાઈન સુધારો કરાવી શકે છે.

ઓનલાઈન અરજી કરવા માટેનો સ્ટેપ-બાય-સ્ટેપ આખો પ્લાન:

આ ઓનલાઈન સુવિધાનો લાભ લેવા માટે કર્મચારી પાસે યુએએન (UAN) નંબર હોવો અને તે આધાર કાર્ડ સાથે લિંક હોવો ફરજિયાત છે. જો આ સુવિધા ઉપલબ્ધ હોય તો નીચે મુજબના પગલાં ભરવાના રહેશે:

• સ્ટેપ 1: સૌ પ્રથમ ઈપીએફઓના સત્તાવાર યુનિફાઈડ મેમ્બર પોર્ટલ પર જાઓ. ત્યાં તમારો UAN નંબર, પાસવર્ડ અને કેપ્ચા કોડ દાખલ કરીને લોગ ઈન કરો.
• સ્ટેપ 2: પોર્ટલ ખુલ્યા પછી ઉપર દેખાતા ‘Manage’ ટેબ પર ક્લિક કરો અને ડ્રોપડાઉન મેન્યુમાંથી ‘Joint Declaration’ નો વિકલ્પ પસંદ કરો.
• સ્ટેપ 3: હવે તમારી કંપનીની મેમ્બર આઈડી (Member ID) ની પસંદગી કરો. આટલું કરતા જ તમારી હાલની પ્રોફાઈલ વિગતો સ્ક્રીન પર દેખાશે.
• સ્ટેપ 4: જે વિગત કે સ્પેલિંગમાં ભૂલ હોય, તેની સામે આપેલા ખાનામાં સાચી માહિતી ટાઈપ કરો.
• સ્ટેપ 5: આ સુધારાના સમર્થન માટે જરૂરી દસ્તાવેજો જેવા કે પાનકાર્ડ, માર્કશીટ, અન્ય પ્રમાણપત્ર અથવા ઓળખપત્રની સ્કેન કોપી પીડીએફ (PDF) ફોર્મેટમાં અપલોડ કરો.
• સ્ટેપ 6: બધી વિગતો ભર્યા પછી આધાર કાર્ડ સાથે લિંક થયેલા મોબાઈલ નંબર પર એક ઓટીપી (OTP) આવશે. તેને એન્ટર કરીને રિક્વેસ્ટ ફાઇનલ સબમિટ કરો.
• સ્ટેપ 7: આ રિક્વેસ્ટ ડિજિટલ માધ્યમથી સીધી તમારી કંપની પાસે જશે. કંપની આ વિગતો ચકાસીને ડિજિટલ સિગ્નેચર દ્વારા તેને પીએફ ઓફિસને ફોરવર્ડ કરશે અને તમારી પ્રોફાઈલ અપડેટ થઈ જશે.

જો કંપની બંધ થઈ ગઈ હોય તો શું કરવું?

ઘણી વખત એવી પરિસ્થિતિ ઊભી થાય છે જ્યાં કર્મચારીની જૂની કંપની કાયમી ધોરણે બંધ થઈ ગઈ હોય. આવી સ્થિતિમાં ઓનલાઈન અરજી સબમિટ થઈ શકતી નથી. તેના ઉકેલ માટે કર્મચારીએ ઈપીએફઓની વેબસાઈટ પરથી ઓફલાઈન ‘Joint Declaration Form’ ડાઉનલોડ કરવો પડશે. આ ફોર્મ વ્યવસ્થિત ભરીને તેના પર બેંક મેનેજર અથવા કોઈ ગેઝેટેડ (રાજપત્રિત) અધિકારીના સિક્કા અને સહી કરાવીને વેરિફિકેશન કરાવવું પડશે. ત્યારબાદ આ ફોર્મ જરૂરી દસ્તાવેજો સાથે નજીકની પીએફ ઓફિસમાં રૂબરૂ જમા કરાવવાનું રહેશે.

સરકારનું આ ડિજિટલ કદમ લાખો કર્મચારીઓનો સમય અને નાણાં બચાવશે. હવે જોવાનું એ રહેશે કે ઓનલાઈન રિક્વેસ્ટ સબમિટ કર્યા પછી પીએફ ઓફિસ તરફથી કેટલા દિવસમાં આ સુધારો મંજૂર કરવામાં આવે છે.

ઘર બંધ હશે કે એસી-પંખા બંધ રાખશો તો પણ આવશે મોટું બિલ! સરકારી કંપનીઓ વધારી રહી છે આ ચાર્જીસ