આગામી સપ્તાહે રિલાયન્સ, સિપ્લા અને એચડીએફસી સહિતની આ દિગ્ગજ કંપનીઓ આપશે ડિવિડન્ડ, એક્સ-ડેટ પહેલા ખરીદી પર જ મળશે લાભ

શેરબજારમાં રોકાણ કરનારા લોકો માટે આગામી સપ્તાહ ખૂબ જ વ્યસ્ત અને કમાણીની તકોથી ભરેલું રહેવાનું છે. 1 જૂનથી 5 જૂન વચ્ચે દેશની ઘણી મોટી અને દિગ્ગજ કંપનીઓ એક્સ-ડિવિડન્ડ (Ex-Dividend) થવા જઈ રહી છે. શેરબજારના નિયમ મુજબ, એક્સ-ડિવિડન્ડ ડેટ એ એવી છેલ્લી તારીખ છે જેના પછી શેર ખરીદનારા રોકાણકારોને કંપની દ્વારા જાહેર કરાયેલા ડિવિડન્ડનો લાભ મળતો નથી. તેથી જો રોકાણકારો ડિવિડન્ડની વધારાની કમાણી મેળવવા માંગતા હોય, તો તેમણે એક્સ-ડેટ પહેલા જ શેર ખરીદવા પડશે. આગામી સપ્તાહે રિલાયન્સ ઇન્ડસ્ટ્રીઝ, સિપ્લા, બેંક ઓફ બરોડા અને એચડીએફસી એએમસી જેવી કંપનીઓ પર બજારની નજર રહેશે.

5 જૂનના રોજ રિલાયન્સ, સિપ્લા અને બેંક ઓફ બરોડા પર નજર

આ સપ્તાહની સૌથી મોટી કંપની રિલાયન્સ ઇન્ડસ્ટ્રીઝ ૫ જૂનના રોજ એક્સ-ડિવિડન્ડ થશે. કંપનીએ નાણાકીય વર્ષ 2026 માટે 10 રૂપિયાની ફેસ વેલ્યુ ધરાવતા દરેક શેર પર 6 રૂપિયાના ફાઇનલ ડિવિડન્ડની જાહેરાત કરી છે. ફાર્મા ક્ષેત્રની દિગ્ગજ કંપની સિપ્લાના શેર પણ 5 જૂનના રોજ એક્સ-ડિવિડન્ડ પર ટ્રેડ કરશે અને કંપનીએ પ્રતિ શેર 13 રૂપિયાનું ફાઇનલ ડિવિડન્ડ જાહેર કર્યું છે. આ સિવાય સરકારી ક્ષેત્રની બેંક ઓફ બરોડા પણ 5 જૂનના રોજ પ્રતિ શેર 8.50 રૂપિયાના ડિવિડન્ડ માટે એક્સ-ડિવિડન્ડ થશે.

આ કંપનીઓ પણ 5 જૂનના રોજ ડિવિડન્ડ આપશે

• એચડીએફસી એએમસી (HDFC AMC): કંપનીએ પ્રતિ શેર 54 રૂપિયાનું મોટું ડિવિડન્ડ જાહેર કર્યું છે, જેની એક્સ-ડેટ 5 જૂન નક્કી કરવામાં આવી છે.
• જેએસડબલ્યુ એનર્જી (JSW Energy): કંપનીએ પ્રતિ શેર 2 રૂપિયાના ડિવિડન્ડ માટે 5 જૂનની રેકોર્ડ ડેટ નક્કી કરી છે.
• આર્કિયન કેમિકલ ઇન્ડસ્ટ્રીઝ: આ કંપની 5 જૂનના રોજ પ્રતિ શેર 2.50 રૂપિયાના ફાઇનલ ડિવિડન્ડ માટે એક્સ-ડિવિડન્ડ પર ટ્રેડ કરશે.

સપ્તાહની શરૂઆતમાં આ કંપનીઓની રેકોર્ડ ડેટ

1 જૂનના રોજ એફએમસીજી ક્ષેત્રની જાણીતી કંપની કોલગેટ-પામોલિવ (ઇન્ડિયા) એક્સ-ડિવિડન્ડ થશે, જેણે પ્રતિ શેર 24 રૂપિયાના વચગાળાના (Interim) ડિવિડન્ડની જાહેરાત કરી છે. આ જ દિવસે સ્પેશિયાલિટી કેમિકલ્સ કંપની એપિગ્રાલે પણ પ્રતિ શેર 5 રૂપિયાના ફાઇનલ ડિવિડન્ડ માટે એક્સ-ડિવિડન્ડ ડેટ નક્કી કરી છે.

ત્યારબાદ 2 જૂનના રોજ કોમર્શિયલ વ્હીકલ બનાવતી અશોક લેલેન્ડ કંપની પ્રતિ શેર 2.50 રૂપિયાના ડિવિડન્ડ માટે એક્સ-ડિવિડન્ડ થશે. જ્યારે 4 જૂનના રોજ ટેક્નોક્રાફ્ટ ઇન્ડસ્ટ્રીઝ (ઇન્ડિયા) પ્રતિ શેર 20 રૂપિયાના વચગાળાના ડિવિડન્ડ માટે એક્સ-ડિવિડન્ડ પર ટ્રેડ કરશે. આ સિવાય રેલિસ ઇન્ડિયા (Rallis India) એ પ્રતિ શેર 3 રૂપિયાના ફાઇનલ ડિવિડન્ડ માટે 4 જૂનની રેકોર્ડ ડેટ નક્કી કરી છે.

શું નબળું ચોમાસું તમારા ખિસ્સા પર ભારે પડશે? વધતી મોંઘવારીમાં વધુ એક માર માટે રહેજો તૈયાર, આ બેંકના રિપોર્ટે બધાને ચોંકાવ્યા