તહેવારોની સિઝનમાં મોંઘવારીનો વધુ એક ફટકો, અમૂલે દૂધ ભાવમાં કર્યો 2 નો વધારો
આ પહેલા ઓગસ્ટમાં અમૂલ અને મધર ડેરીએ દૂધના ભાવમાં પ્રતિ લિટર બે રૂપિયાનો વધારો કર્યો હતો. માર્ચમાં પણ દૂધના ભાવમાં વધારો કરવામાં આવ્યો હતો. ખેડૂતોના વધતા ખર્ચને કારણે ભાવમાં વધારો કરવામાં આવ્યો છે.
તહેવારોની સિઝનમાં સામાન્ય લોકોને મોંઘવારીનો વધુ એક ફટકો લાગ્યો છે. અમૂલે દિલ્હી અને આસપાસના ક્ષેત્રમાં દૂધના ભાવમાં 2 રૂપિયાનો વધારો કર્યો છે. હવે દિલ્હીમાં દૂધની કિંમત વધીને 63 રૂપિયા પ્રતિ લિટર થઈ ગઈ છે. અગાઉ ઓગસ્ટમાં પણ દૂધના ભાવમાં વધારો કરવામાં આવ્યો હતો. ગઈકાલે જાહેર કરાયેલા ફુગાવાના આંકડા મુજબ, પશુ આહારનો ફુગાવો દર 9 વર્ષમાં 25 ટકાથી વધુના રેકોર્ડ સ્તરની નજીક રહ્યો છે. જેના કારણે દૂધ ઉત્પાદક ખેડૂતો(Farmers)ના ખર્ચમાં મોટો ઉછાળો આવ્યો છે. અમૂલ(Amul) માત્ર વધતી જતી કિંમતને ટાંકીને ભાવમાં વધારો કરી રહી છે.
ભાવમાં અણધાર્યો વધારો
આજે ભાવમાં થયેલો વધારો અણધાર્યો હતો. સવારે લોકોને વધેલા દરે દૂધ મળ્યું છે. જોકે, ગુજરાત કો-ઓપરેટિવ મિલ્ક માર્કેટિંગ ફેડરેશને આ અંગે કોઈ સત્તાવાર માહિતી આપી નથી. હાલ બજારમાં ફુલ ક્રીમ મિલ્ક રૂ.2 મોંઘુ થયું છે અને નવા ભાવ રૂ.61થી વધીને રૂ.63 પ્રતિ લીટર થયા છે. આ પહેલા ઓગસ્ટમાં અમૂલ અને મધર ડેરીએ દૂધના ભાવમાં પ્રતિ લિટર બે રૂપિયાનો વધારો કર્યો હતો. તે જ સમયે, માર્ચમાં પણ દૂધના ભાવમાં વધારો કરવામાં આવ્યો હતો. છેલ્લા બે વખત ફેડરેશને કહ્યું હતું કે ખેડૂતોના દૂધ ઉત્પાદનનો ખર્ચ સતત વધી રહ્યો છે, જેના કારણે તેમની આવકમાં ઘટાડો થયો છે. ખેડૂતોને રાહત આપવા માટે જ દૂધના ભાવમાં વધારો કરવામાં આવ્યો છે.
મોંઘા પશું આહારને કારણે દુધ મોંઘુ થયું
દૂધ મોંઘુ થવાનું મુખ્ય કારણ પશુ આહારની કિંમત છે. ગઈકાલે જાહેર કરાયેલા આંકડા મુજબ સપ્ટેમ્બર મહિનામાં મોંઘવારી દર 25.23 ટકા રહ્યો છે. જે ગયા વર્ષના સમાન મહિનામાં 20.57 ટકા હતો. ઓગસ્ટ મહિનામાં ઘાસચારાનો મોંઘવારી દર 25.54 ટકાના સ્તરે પહોંચી ગયો હતો, જે 9 વર્ષનું સર્વોચ્ચ સ્તર હતો. સપ્ટેમ્બરમાં આમાં ઘણી ઓછી રાહત મળી છે પરંતુ ભાવ હજુ પણ ચિંતાજનક સ્તરે છે. સ્થિતિ એ છે કે ઘાસચારાનો મોંઘવારી દર જથ્થાબંધ મોંઘવારી દર કરતા બમણાથી વધુના સ્તરે રહે છે. ગઈકાલે જાહેર કરાયેલા આંકડા મુજબ સપ્ટેમ્બર મહિનામાં જથ્થાબંધ મોંઘવારી દર અગાઉના મહિનામાં 12.41 ટકાથી ઘટીને 10.7 ટકા પર આવી ગયો છે. બીજી તરફ, જથ્થાબંધ ભાવ આધારિત ખાદ્યપદાર્થોનો ફુગાવો 9.93 ટકાથી ઘટીને 8.08 ટકા થયો છે.