આવી રહી છે વધુ એક શાનદાર ઇલેક્ટ્રિક કાર, 460 કિમીની હશે રેન્જ
ભારતીય બજારમાં વધુ એક ઇલેક્ટ્રિક કાર લોન્ચ થવા જઈ રહી છે. આ કાર MG મોટર્સની હશે. રેન્જની વાત કરીએ તો આ કાર 460 કિલોમીટર સુધીની રેન્જ આપી શકે છે. ત્યારે આ લેખમાં જાણીશું કે આ કારની કિંમત કેટલી છે અને આ કારના ફીચર્સ કેવા છે.
MG Motors ભારતીય બજારમાં વધુ એક ઇલેક્ટ્રિક કાર લોન્ચ કરવાની તૈયારી કરી રહી છે. આ કંપનીની ત્રીજી EV હશે જે ભારતમાં આવશે. તેનું નામ MG Cloud EV હશે અને તે આ વર્ષે સપ્ટેમ્બર સુધીમાં લોન્ચ થઈ શકે છે. આ કાર ઈન્ડોનેશિયન અને ચાઈનીઝ માર્કેટમાં Wuling અને Baojun બ્રાન્ડિંગ સાથે આવે છે.
ગ્લોબલ માર્કેટમાં આવતા MG Cloud EV મોડલની લંબાઈ લગભગ 4.3 કિલોમીટર છે અને તેનું વ્હીલબેઝ 2700mm છે. કારની ડિઝાઈન એકદમ બેઝિક છે અને આગળ અને પાછળના ભાગે ફુલ LED લાઇટ બાર, ફ્લશ ડોર હેન્ડલ્સ, આગળના બમ્પર પર લગાવેલા હેડલેમ્પ્સ જેવી વસ્તુઓ જોવા મળશે. આ ઇલેક્ટ્રિક કાર 5-સીટર લેઆઉટમાં આવશે.
MG Cloud EVની ફીચર્સ
MG Cloud EVના ટેસ્ટિંગ મોડલની તસવીરો પહેલાથી જ લીક થઈ ગઈ છે, જે તેની એક્સટીરિયર સ્ટાઇલને દર્શાવે છે. તેની કેબિનમાં આકર્ષક ડિઝાઇન પણ હશે. તેમાં ફ્લોટિંગ સ્ક્રીન હશે, જેમાં ડિજિટલ ડિસ્પ્લે ઇન્સ્ટ્રુમેન્ટ ક્લસ્ટર અને સેન્ટરમાં મોટી ટચસ્ક્રીન હશે. કારમાં ફુલ રિક્લાઇન ફ્રન્ટ સીટ બેકરેસ્ટ પણ આપવામાં આવશે, જેને સોફા મોડ પણ કહેવામાં આવે છે અને તે 135-ડિગ્રી બેકસીટ રિક્લાઇન ફંક્શન સાથે આવશે.
ઈન્ડોનેશિયન માર્કેટમાં આ કાર ADAS (એડવાન્સ્ડ ડ્રાઈવર આસિસ્ટ સિસ્ટમ) ટેક્નોલોજી અને 360 ડિગ્રી કેમેરા ફીચર સાથે આવે છે.
MG Cloud EVની બેટરી અને રેન્જ
ગ્લોબલ માર્કેટમાં આ EV બે બેટરી પેક વિકલ્પો સાથે આવે છે. એક 37.9kWh બેટરી પેક છે, જે એકવાર ચાર્જ થવા પર 360 કિલોમીટર સુધીની રેન્જ આપે છે. બીજી 50.6kWh બેટરી પેક છે, જે એકવાર ચાર્જ થવા પર 460 કિલોમીટર સુધીની રેન્જ આપી શકે છે. તેના પાવરટ્રેન સેટઅપમાં રેગ્યુલર મેગ્નેટ સિંક્રોનસ મોટરનો સમાવેશ થાય છે, જે આગળના એક્સલ પર ફીટ કરવામાં આવે છે, તે 134bhpનો પાવર જનરેટ કરે છે. જો કે ભારતીય બજારમાં કયું મોડલ લાવવામાં આવશે તે અંગે હાલ કોઈ માહિતી નથી.
MG Cloud EVની કિંમત
MG મોટર્સ પાસે હાલમાં બે ઇલેક્ટ્રિક કાર છે. એક એમજી કોમેટ છે, જેની કિંમત રૂ. 6.99 લાખથી રૂ. 9.53 લાખની વચ્ચે છે. બીજી MG ZS EV છે, જેની કિંમત 25.44 લાખ રૂપિયા છે. આ તમામ કિંમતો એક્સ-શોરૂમ મુજબ છે. એવી આશા છે કે નવા Cloud EV મોડલની કિંમત 20 લાખ રૂપિયાની અંદર હશે.