એસી ચાલુ રાખીને કારમાં આરામ કરવો પડ્યો ભારે: ઊંઘમાં જ શ્વાસ રૂંધાતા યુવકનું મોત

રાજસ્થાનમાં તાજેતરમાં એક એવી ચોંકાવનારી ઘટના સામે આવી છે જેણે બધાને સ્તબ્ધ કરી દીધા છે. અહીં એક 37 વર્ષનો વ્યક્તિ પોતાની કારમાં એસી ચાલુ રાખીને ઊંઘી ગયો હતો. ગાડીમાં લાંબા સમય સુધી એસી ચાલતું રહ્યું અને આખરે કારનું પેટ્રોલ સમાપ્ત થઈ ગયું. પેટ્રોલ ખતમ થતાં જ એસી પણ બંધ થઈ ગયું, પરંતુ તે વ્યક્તિ ઊંઘમાંથી ક્યારેય જાગી શક્યો નહીં. બપોરે 01 વાગ્યા સુધી પાર્ક કરેલી કારમાં કોઈ હલચલ ન દેખાતા જ્યારે લોકોએ નજીક જઈને જોયું તો તે વ્યક્તિ સીટ પર મૃત હાલતમાં મળી આવ્યો હતો.

મોત પાછળનું અસલી કારણ: સાયલન્ટ કિલર ગેસ

ડોક્ટરે જણાવ્યું કે, પ્રાથમિક દૃષ્ટિએ આ કેસમાં ‘કાર્બન મોનોક્સાઈડ’ ગેસનું લીકેજ મોટું કારણ હોઈ શકે છે. જ્યારે કાર ઉભી હોય અને તેનું એન્જિન ચાલુ હોય, ત્યારે તેમાંથી કાર્બન મોનોક્સાઈડ ગેસ બહાર નીકળે છે. આ ગેસ રંગહીન અને ગંધહીન હોય છે, એટલે કે તેની હાજરીની માણસને ખબર જ પડતી નથી. જો કારનું સીલિંગ ક્યાંકથી ઢીલું હોય કે સાયલેન્સર (એક્ઝોસ્ટ સિસ્ટમ) માં કોઈ ખામી હોય, તો આ ઝેરી ગેસ કારની અંદર આવવા લાગે છે.

આ ગેસ શરીરની અંદર જતાં જ લોહીના હિમોગ્લોબિન સાથે ઓક્સિજન કરતાં પણ 200 ગણી વધુ ઝડપથી ભળી જાય છે. પરિણામે, હિમોગ્લોબિન આખા શરીરમાં ઓક્સિજન પહોંચાડવાનું બંધ કરી દે છે અને મગજ તેમજ હૃદય સુધી ઓક્સિજન ન પહોંચવાને કારણે વ્યક્તિ ઊંઘમાં જ બેભાન થઈ જાય છે. તે ઈચ્છે તો પણ જાગી શકતો નથી અને ગૂંગળામણથી તેનું મોત થાય છે.

ઓક્સિજનની અછત અને વધતું તાપમાન

જો કારના તમામ કાચ બંધ હોય અને એસી ‘રી-સર્ક્યુલેશન મોડ’ પર હોય, તો બહારની તાજી હવા અંદર આવી શકતી નથી. મર્યાદિત જગ્યા હોવાને કારણે કારની અંદર ઓક્સિજન ઝડપથી ઘટી જાય છે અને કાર્બન ડાયોક્સાઈડ વધી જાય છે.

બીજી તરફ, જ્યારે ગાડીનું પેટ્રોલ ખતમ થાય છે ત્યારે એન્જિનની સાથે એસી અને હવાનું સર્ક્યુલેશન પણ બંધ થઈ જાય છે. આવી સ્થિતિમાં બંધ કારની અંદરનું તાપમાન ખૂબ જ ઝડપથી વધવા લાગે છે, જે શરીરમાં ડીહાઈડ્રેશન અને હીટસ્ટ્રોક (લૂ લાગવી) જેવી ગંભીર સ્થિતિ પેદા કરે છે. ઝેરી ગેસના કારણે વ્યક્તિ પહેલાથી જ બેભાન હોવાથી તેને ગરમીનો અહેસાસ થતો નથી અને શરીરના અંગો ધીમે-ધીમે કામ કરવાનું બંધ કરી દે છે.

બચવા માટે નિષ્ણાતોની મહત્વની સલાહ

• કારની અંદર એસી અને એન્જિન ચાલુ રાખીને ક્યારેય સૂવું જોઈએ નહીં, તે જીવલેણ સાબિત થઈ શકે છે.
• જો કોઈ ઈમરજન્સીમાં કારની અંદર સૂવું જ પડે, તો વૅન્ટિલેશન માટે કારની બારીઓના કાચ થોડા નીચે રાખવા જેથી બહારની તાજી હવા અંદર આવી શકે.
• તમારી કારના એક્ઝોસ્ટ અને એર-કંડિશનિંગ સિસ્ટમનું નિયમિત સર્વિસિંગ કરાવતા રહો જેથી ગેસ લીકેજનો કોઈ ખતરો ન રહે.

યૂટ્યુબ જોઈ ઘરે કરાવી ડિલિવરી, પ્રસૂતા મહિલાનું મોત; પતિ સામે FIR