યૂટ્યુબ જોઈ ઘરે કરાવી ડિલિવરી, પ્રસૂતા મહિલાનું મોત; પતિ સામે FIR

તમિલનાડુના તિરુપ્પુર જિલ્લામાંથી એક અત્યંત ચોંકાવનારી અને દર્દનાક ઘટના સામે આવી છે. અહીં ડિજિટલ યુગમાં સોશિયલ મીડિયાના આંધળા અનુકરણને કારણે એક હસતો-રમતો પરિવાર બરબાદ થઈ ગયો છે. યૂટ્યૂબ પર વીડિયો જોઈને ઘરે જ પ્રસૂતિ (ડિલિવરી) કરાવવાના ચક્કરમાં એક મહિલાએ પોતાનો જીવ ગુમાવવો પડ્યો છે. આ ઘટના બાદ સમગ્ર વિસ્તારમાં અરેરાટી વ્યાપી ગઈ છે.

શું છે સમગ્ર મામલો?

તિરુપ્પુર જિલ્લાના ઉથુકુલી પાસે આવેલા થલવૈપલયમ વિસ્તારમાં કાર્તિક નામનો યુવક તેની પત્ની શશિકલા સાથે રહેતો હતો. તેમને પહેલાથી જ એક ચાર વર્ષની પુત્રી છે. શશિકલાની પ્રથમ ડિલિવરી સિઝેરિયન (ઓપરેશન) દ્વારા થઈ હતી. પ્રથમ બાળક ઓપરેશનથી થયા બાદ, આ દંપતીએ નક્કી કર્યું હતું કે તેઓ બીજા બાળકનો જન્મ કુદરતી રીતે એટલે કે નોર્મલ ડિલિવરી દ્વારા કરાવશે. આ માટે તેઓ લાંબા સમયથી યૂટ્યૂબ પર ઘરે બેઠા સુરક્ષિત અને સ્વસ્થ ડિલિવરી કેવી રીતે કરવી, તેના વીડિયો સતત જોતા રહેતા હતા.

વીડિયો જોઈને શરૂ કરી પ્રક્રિયા

ગયા બુધવારે, 24 જૂન 2026ના રોજ શશિકલાને પ્રસૂતિની પીડા (લેબર પેઇન) શરૂ થઈ હતી. હોસ્પિટલ જવાને બદલે આ પરિવારે યૂટ્યૂબ વીડિયોના સહારે જ ઘરે ડિલિવરી કરવાનો નિર્ણય લીધો. શશિકલાના પતિ કાર્તિક અને તેની સાસુએ સાથે મળીને વીડિયોમાં બતાવ્યા પ્રમાણે પ્રક્રિયા શરૂ કરી દીધી.

નવજાતનો જન્મ થયો પણ સ્થિતિ બગડી

શશિકલાએ ઘરે જ એક સ્વસ્થ પુત્રને જન્મ આપ્યો ખરો, પરંતુ પ્રક્રિયા દરમિયાન તેને અતિશય રક્તસ્ત્રાવ (વધુ પડતું લોહી વહી જવું) શરૂ થઈ ગયો. શરૂઆતમાં પરિવારે આ બાબતને સામાન્ય ગણી, પરંતુ સમય જતાં શશિકલાની તબિયત લથડવા લાગી. સ્થિતિ ગંભીર બનતા તેને તાત્કાલિક પેરુન્દુરાઈની સરકારી મેડિકલ કોલેજ હોસ્પિટલમાં લઈ જવામાં આવી. ત્યાંના ડોક્ટરોએ મહિલાની નાજુક સ્થિતિ જોઈને કોઈમ્બતુરની ખાનગી હોસ્પિટલમાં લઈ જવાની સલાહ આપી, જ્યાં તેને આઈસીયુ (ICU) માં દાખલ કરવામાં આવી હતી.

સારવાર દરમિયાન તોડ્યો દમ

હોસ્પિટલના ડોક્ટરોના અથાક પ્રયત્નો છતાં પણ શશિકલાને બચાવી શકાઈ નથી અને સારવાર દરમિયાન તેનું મોત નીપજ્યું છે. આ ઘટનાની જાણ થતાં જ ઉથુકુલી પોલીસ સ્ટેશને ગુનો નોંધીને પત્નીના મોતના જવાબદાર એવા પતિ કાર્તિક અને તેના પરિવાર સામે ઊંડી તપાસ શરૂ કરી છે. સરકાર અને આરોગ્ય વિભાગ દ્વારા વારંવાર ઘરે ડિલિવરી ન કરવા અને હોસ્પિટલનો જ આશરો લેવા માટે કડક સૂચનાઓ અપાતી હોવા છતાં, સોશિયલ મીડિયાના ભરોસે લેવાયેલું આ આત્મઘાતી પગલું એક માસૂમ મહિલાના મોતનું કારણ બન્યું છે.

Disclaimer: આ સમાચાર સામાન્ય માહિતી પર આધારિત છે. વધુ માહિતી માટે તમારા ડૉક્ટરની સલાહ લો.

પત્ની જ નહીં, આ ખાસ પરિસ્થિતિમાં બાળકોને પણ મળે છે ફેમિલી પેન્શન, જાણો શું કહે છે નિયમો