Surat : માવઠાએ ખેડૂતોને રડાવ્યાં ! ડાંગરનો પાક હાઈવે પર સુકવવા મજબૂર, જુઓ Video

સુરત જિલ્લામાં અચાનક થયેલા કમોસમી વરસાદથી ખેડૂતોને ભારે આર્થિક નુકસાન થયું છે. આ વરસાદે ખરીફ પાકને ભારે નુકસાન પહોંચાડ્યું છે. ખાસ કરીને ડાંગરનો પાક મોટા પ્રમાણમાં પ્રભાવિત થયો છે. કાપણી માટે તૈયાર ડાંગર પલળી ગયો છે, જેના કારણે ખેડૂતોને તેને સુકાવવામાં મુશ્કેલીનો સામનો કરવો પડી રહ્યો છે. આ પરિસ્થિતિમાં ખેડૂતોએ પોતાના ડાંગરને ઓલપાડ-કીમ સ્ટેટ હાઇવે પર સુકાવવાનું શરૂ કર્યું છે. રાત્રિના સમયે પણ ખેડૂતો હાઇવે પર ડાંગર સુકાવવાનું કામ કરી રહ્યા છે. તેમની આ મજબૂરી તેમની હાલત દર્શાવે છે.

હાઇવે પર ડાંગર સુકાવવાની પ્રક્રિયા ખૂબ જ મુશ્કેલ અને સમય માંગી લે તેવી છે.પાકને સૂકવ્યા બાદ તેને કોથળામાં ભરીને ઘરે લઈ જવામાં આવે છે.પરંતુ આખી પ્રક્રિયામાં ઘણો સમય લાગે છે અને ખેડૂતોને ઘણી મહેનત કરવી પડે છે. આ ઉપરાંત, તેમને ચોરી થવાનો પણ ભય સતાવી રહ્યો છે. ખેડૂતો રાત્રે પણ જાગતા રહીને પોતાના પાકનું રક્ષણ કરે છે.

ઘણા ખેડૂતોનો હજુ પણ 50% ડાંગરનો પાક ખેતરમાં છે. આગામી દિવસોમાં ફરી વરસાદની આગાહી કરવામાં આવી છે, જેના કારણે ખેડૂતો વધુ ચિંતિત છે. તેઓ સરકાર પાસેથી આર્થિક સહાયની માંગ કરી રહ્યા છે. આ વર્ષે ડાંગરનો પાક સારો થવાની શક્યતા હતી, પરંતુ કમોસમી વરસાદના કારણે ખેડૂતોને મોટું નુકસાન થયું છે. આ પરિસ્થિતિમાં સરકારે ખેડૂતોને યોગ્ય સહાય પૂરી પાડવી જરૂરી છે.

ગુજરાતના તમામ જિલ્લાના સમાચાર વાંચવા માટે અહીં ક્લિક કરો