લોકસભા ચૂંટણી પહેલા ધર્મેન્દ્ર પટેલની ઘર વાપસી, પ્રદેશ પ્રમુખ સી આર પાટીલની ઉપસ્થિતિમાં ભાજપમાં જોડાયા

આગામી સમયમાં લોકસભાની ચૂંટણી યોજાવાની છે, ત્યારે મિશન 26ને પાર પાડવા ભાજપ મરણીયા પ્રયાસો કરી રહ્યું છે અને વિપક્ષી નેતાઓ સહિત કાર્યકરોને પોતાની તરફ ખેંચી રહ્યું છે. ત્યારે આજે કમલમ ખાતે મહાભરતી અભિયાન જોવા મળ્યું. પૂર્વ સાંસદ, રાજ્યકક્ષાના રેલવે પ્રધાન તથા પ્રખર આદિવાસી નેતા એવા નારણ રાઠવાએ પુત્ર સંગ્રામ સાથે કેસરિયા કર્યા, તો કોગ્રેસ નેતા ધર્મેન્દ્ર પટેલ પણ ભાજપમાં પરત ફર્યા છે.

મધ્ય ગુજરાત સહિત રાજ્યભરના અલગ અલગ પક્ષના કાર્યકરો, ભૂતકાળમાં પક્ષમાંથી સસ્પેન્ડ કરાયેલા કાર્યકરો સહિત 10 હજાર લોકો ભાજપમાં જોડાયા છે. ભાજપમાં જોડાયા બાદ ધર્મેન્દ્ર પટેલે કોંગ્રેસ પર પરિવારવાદનો આરોપ લગાવ્યો હતો.

તો પ્રદેશ પ્રમુખ સી આર પાટીલે પણ તમામ કાર્યકરો અને નેતાઓને ખેસ પહેરાવીને પક્ષમાં આવકાર્યા હતી. પાટીલે આરોપ લગાવ્યો કે ભાજપમાં જોડાનારા તમામ લોકો કોંગ્રેસમાં મૂંઝવણનો અનુભવ કરતા હતા, પક્ષની ચિંતા ન કરતા નેતાઓના કારણે આજે ભાજપની વિકાસની રાજનીતિમાં વિપક્ષના કાર્યકરો અને નેતાઓ જોડાઇ રહ્યા છે.