Mehsana News : બહુચરાજી તાલુકાના મોટપ અને કનોડ ગામ વચ્ચે 3 વ્યક્તિ સાથે કાર તણાઈ, જુઓ Video

ગુજરાતને ફરી એક વાર મેઘરાજાએ ધોધમાર બેટિંગ કરી છે. મહેસાણામાં ભારે વરસાદના પગલે કોઝવે પર કાર તણાઈ છે. બહુચરાજી તાલુકાના મોટપ અને કનોડ ગામ વચ્ચે કાર તણાઈ હોવાની ઘટના સામે આવી છે. નદીનો કોઝવે પાર કરતા સમય નદીમાં પાણીનો પ્રવાહ વધ્યો છે. પાણી વધુ આવતા કાર પાણીમાં તણાઈ છે. કાર ચાલક સહિત ત્રણ લોકો કારમાં તણાયા હતા. કારમાં રહેલાં ત્રણ વ્યક્તિ વૃક્ષનો સહારો લેતા બચાવ થયો છે. ત્રણે લોકોને સ્થાનિકોએ રેસ્ક્યૂ કરી બહાર કાઢ્યાં છે.

ગાંધીનગરમાં ગાજવીજ સાથે વરસાદની આગાહી

બીજી તરફ ગાંધીનગરમાં સતત બીજા દિવસે પણ ભારે વરસાદ વરસી રહ્યો છે. ગાંધીનગરના માણસા અને દહેગામમાં 3 ઈંચ વરસાદ વરસ્યો છે. આજે ગાંધીનગરમાં ગાજવીજ અને ભારે પવન સાથે ધોધમાર વરસાદ વરસ્યો છે. ભારે વરસાદને પગલે નીચાણવાળા વિસ્તારોમાં પાણી ભરાયા છે. જેના પગલે વાહનચાલકોને ભારે મુશ્કેલી પડી રહી છે. ઉપરવાસમાં ભારે વરસાદના પગલે સંત સરોવરના 3 દરવાજા ખોલવામાં આવ્યા છે.