Breaking News : ઓખા નજીક કોસ્ટ ગાર્ડની જેટીનો ભાગ ધરાશાયી ! 3 કામદાર દરિયામાં ખાબક્યા, જુઓ Video

દેવભૂમિ દ્વારકા જિલ્લાના ઓખા ખાતે નિર્માણાધીન કોસ્ટ ગાર્ડની જેટીનો એક મોટો ભાગ અચાનક તૂટી પડ્યો હતો. આ ગંભીર દુર્ઘટના સવારના સમયે કામકાજ ચાલુ હતું ત્યારે બની હતી, જેના કારણે ત્યાં મજૂરી કામ કરી રહેલા ત્રણ કામદારો દરિયામાં ખાબક્યા હતા.

ઘટનાની જાણ થતાં જ ઓખા મરીન પોલીસ અને ભારતીય નૌકાદળ (નેવી)ની ટીમો બોટ સાથે તુરંત ઘટનાસ્થળે પહોંચી હતી. તેમણે સમયસર અને અસરકારક રીતે રેસ્ક્યુ ઓપરેશન હાથ ધરીને દરિયામાં પડેલા ત્રણેય કામદારોને સુરક્ષિત રીતે બહાર કાઢ્યા હતા. બચાવ કામગીરી બાદ, તમામ ઇજાગ્રસ્ત કામદારોને તાત્કાલિક સારવાર અર્થે મીઠાપુરની હોસ્પિટલમાં ખસેડવામાં આવ્યા છે. હાલમાં તેઓ હોસ્પિટલમાં સારવાર હેઠળ છે અને તેમની તબિયત સ્થિર હોવાના સમાચાર પ્રાપ્ત થયા છે.

આ ઘટના અંગે પોલીસ અધિક્ષક જયરાજસિંહ વાળાએ માહિતી આપતા જણાવ્યું હતું કે, આ જેટીનું નિર્માણ ગુજરાત મેરીટાઇમ બોર્ડ દ્વારા કરવામાં આવી રહ્યું હતું, અને તેનો કોન્ટ્રાક્ટ સુરત સ્થિત બીએમએસ નામની કંપનીને આપવામાં આવ્યો હતો. પ્રાથમિક તપાસ મુજબ, સવારના ભાગે ચાર પિલરમાંથી એક પિલરનો લોક તૂટી જતાં આ અકસ્માત સર્જાયો હતો. તેમણે વધુમાં જણાવ્યું હતું કે ત્રણેય મજૂરોને પાણીમાંથી સહીસલામત બચાવી લેવામાં આવ્યા છે અને કોઈને ગંભીર ઈજા પહોંચી નથી, જે એક સકારાત્મક બાબત છે.

પોલીસ અધિક્ષકે જણાવ્યું હતું કે, આ ઘટના અંગે જાણવાજોગ દાખલ કરવામાં આવશે અને અકસ્માત કેવી રીતે બન્યો, પિલરનો લોક શા માટે તૂટ્યો તેની સંપૂર્ણ તપાસ કરવામાં આવશે. ટેકનિકલ ટીમ પણ આ તપાસમાં જોડાશે. જોકે, હાલમાં કોઈની પ્રાથમિક બેદરકારી સામે આવી રહી છે કે કેમ તે અંગે સ્પષ્ટ કહી શકાય નહીં, કારણ કે તપાસ પૂર્ણ થતાં બે-ત્રણ દિવસનો સમય લાગી શકે છે. કાર્યસ્થળે કામદારોની સુરક્ષાને હંમેશા પ્રાધાન્ય આપવું જોઈએ તે વાત પર ભાર મૂકવામાં આવ્યો હતો.