Ahmedabad: પૂરની સ્થિતિમાં 108ના કર્મચારીઓની સરાહનીય કામગીરી, દર્દીને પાણીમાં ઉચકીને હોસ્પિટલ પહોંચાડ્યો
પૂર્વ અને પશ્ચિમ વિસ્તારના મોટાભાગના વિસ્તારો બેટમાં ફેરવાયા છે. પાલડીમાં સૌથી વધુ 18 ઈંચ વરસાદ (Rain) ખાબક્યો છે.
અમદાવાદમાં (Ahmedabad) થોડા કલાકોમાં ખાબકેલા અનરાધાર વરસાદે ચારે તરફ જળબંબાકારની સ્થિતિ સર્જી છે. અમદાવાદ શહેરમાં આભ ફાટવા જેવી સ્થિતિ ઊભી થઈ છે. શહેરના 6 વિસ્તારોમાં 10 ઈંચથી વધારે વરસાદ (Rain) ખાબક્યો છે. શહેરમાં અનેક વિસ્તારામાં નદીઓ જેવા દ્રશ્યો જોવા મળી રહ્યા છે. પૂર્વ અને પશ્ચિમ વિસ્તારના મોટાભાગના વિસ્તારો બેટમાં ફેરવાયા છે. પાલડીમાં સૌથી વધુ 18 ઈંચ વરસાદ ખાબક્યો છે. આવી પરિસ્થિતિમાં પણ પાલડી વિસ્તારમાં પાણીમાં ઉતરીને 108ના (108 Ambulance) કર્મચારીએ એક દર્દીને હોસ્પિટલ સુધી પહોંચાડ્યો છે.
108 એમ્બ્યુલન્સના કર્મચારીઓની સરાહનીય કામગીરી
અમદાવાદમાં 108 એમ્બ્યુલન્સના કર્મચારીઓની પ્રશંસનીય કામગીરી સામે આવી છે. પાલડી વિસ્તારમાં વરસાદી પાણી ભરાવાના કારણે 108 એમ્બ્યુલન્સ પહોંચી શકે તેવી સ્થિતિ ન હતી. જેના કારણે 108ના કર્મચારીઓ ઘૂંટણસમા પાણીમાં ઉતરીને દર્દીના ઘર સુધી પહોંચ્યા હતા અને દર્દીને પાણીમાં ઉંચકીને હોસ્પિટલ પહોંચાડ્યા હતા. 108ના EMT જીગર વર્મા અને પાયલોટ ધર્મેન્દ્ર પટેલે દર્દીને હોસ્પિટલ પહોંચાડતા તેમની કામગીરીને લોકોએ બિરદાવી હતી.