Free Wi-Fi Fraud: જો તમે ફ્રી વાઈ-ફાઈનો ઉપયોગ કરો છો તો ધ્યાન રાખજો, બેંકિંગ વિગતો ચોરીને હેકર્સ કરી રહ્યા છે છેતરપિંડી, જાણો કેવી રીતે થાય છે ફ્રોડ

લોકોને જ્યારે ફ્રી Wi-Fi (Free Wi-Fi) મળે છે ત્યારે તેની ખુશીની કોઈ સીમા રહેતી નથી. ખાસ કરીને જ્યારે ફોન પર નેટવર્ક ઉપલબ્ધ ન હોય અથવા સ્પીડ ખૂબ જ ધીમી હોય, ત્યારે લોકો જાહેર સ્થળોએ ઉપલબ્ધ Wi-Fiનો ઉપયોગ કરતા હોય છે. પરંતુ ઘણી વખત ફ્રી વાઈ-ફાઈના કારણે લોકોના બેંક ખાતા ખાલી થઈ જાય છે. સ્કેમર્સ ફ્રી વાઈ-ફાઈનો ઉપયોગ કરતા લોકોની બેંકિંગ વિગતો ચોરીને છેતરપિંડી (Cyber Crime) કરી રહ્યા છે.

ફ્રી વાઇ-ફાઇ કેટલું સુરક્ષિત છે?

જો તમે તમારા ઘરમાં Wi-Fi નો ઉપયોગ કરી રહ્યા છો તો તે સુરક્ષિત છે. આ સિવાય તમે કોઈપણ સંબંધી, મિત્ર કે પરિચિતના ઘરે જઈને તેમના વાઈ-ફાઈનો ઉપયોગ કરો તો પણ તે સુરક્ષિત છે. પરંતુ જ્યારે પબ્લિક વાઈ-ફાઈની વાત આવે છે, તો તેને સંપૂર્ણપણે સુરક્ષિત કહી શકાય નહીં. બજાર, મોલ્સ અથવા અન્ય કોઈપણ સ્થળોએ જાહેર Wi-Fi હંમેશા સલામત નથી.

યુઝર્સના ડેટાની ચોરી કરવાનો કરે છે પ્રયાસ

જાહેર સ્થળોએ ઉપલબ્ધ Wi-Fi ને હેકર્સ મોટાભાગે પોતાનો અડ્ડો બનાવે છે. લોકો મોટા પાયે કોઈપણ જગ્યાએ ઉપલબ્ધ ફ્રી Wi-Fi નો ઉપયોગ કરે છે. હેકર્સને લોકોના ફોનમાં પ્રવેશવાની અને તેમના બેંક ખાતાની વિગતોની ચોરી કરવાની તક પણ મળે છે. બેંકની સાથે તે યુઝર્સના ડેટાની ચોરી કરવાનો પણ પ્રયાસ કરે છે.

સાયબર ગુનેગારો માહિતીનો દુરુપયોગ કરી શકે

કોઈપણ સાર્વજનિક સ્થળે ઉપલબ્ધ ફ્રી વાઈ-ફાઈ કોઈને કોઈ કંપની દ્વારા આપવામાં આવે છે. તેથી જ્યારે તમે તે Wi-Fi નો ઉપયોગ કરવા માટે રજીસ્ટર કરો છો, ત્યારે જ તમારો નંબર, મેઇલ વગેરે તે કંપનીને જાય છે. હવે કંપની આ માહિતીને બજારમાં વેચી શકે છે. તેથી સાયબર ગુનેગારો આ માહિતીનો દુરુપયોગ કરી શકે છે.

બેંક ખાતું ખાલી થઈ શકે

લોકો જાહેર સ્થળોએ ઉપલબ્ધ ફ્રી Wi-Fi નો ઉપયોગ કરીને ડિજિટલ વ્યવહારો શરૂ કરે છે. હેકર્સ આ જ વસ્તુની રાહ જોઈ રહ્યા છે, કે લોકો આવશે અને તે વાઇફાઇનો ઉપયોગ કરીને તેમના ફોનથી ટ્રાન્ઝેક્શન શરૂ કરશે જેથી તેઓ તેનો શિકાર કરી શકે. લોકો ફોન રિચાર્જ કરે છે, વીજળી અને પાણીના બિલ ચૂકવે છે, તે Wi-Fi પર કોઈને ચુકવણી કરે છે વગેરે. આ દરમિયાન હેકર્સ તેમની સાથે છેતરપિંડી કરે છે અને તેમના બેંક ખાતા ખાલી કરે છે.

આ પણ વાંચો : Online Shopping Fraud: ઓનલાઈન શોપિંગ કરતી વખતે આ બાબતોનું રાખો ધ્યાન, એક ભૂલથી ખાલી થઈ જશે તમારૂ બેંક એકાઉન્ટ

શું સાવચેતી રાખવી

1. ફ્રી Wi-Fi નો ઉપયોગ કરતી વખતે, તેના નિયમો અને શરતોને ધ્યાન પૂર્વક વાંચો.

2. ડિજિટલ ટ્રાન્ઝેક્શન ન કરવું તે વધુ સારું છે કારણ કે તે હેકર્સ માટે તમારા બેંક એકાઉન્ટ્સને એક્સેસ કરવાનું સરળ બનાવે છે.

3. લાંબા સમય સુધી ફ્રી વાઈ-ફાઈનો ઉપયોગ ન કરો કારણ કે તેનાથી જોખમ વધી શકે છે.

ટેક્નોલોજીના તમામ સમાચાર વાંચવા માટે અહીં ક્લિક કરો