Breaking News : હવે આવશે ભારતીય ક્રિકેટના દિગ્ગજ ખેલાડી યુવરાજ સિંહના જીવન પર બાયોપિક, જાણો ક્યારે થશે શૂટિંગ?

ભારતીય ક્રિકેટના દિગ્ગજ ખેલાડી યુવરાજ સિંહના જીવન પર હવે મોટા પડદા પર ફિલ્મ બનવા જઈ રહી છે. યુવરાજ સિંહની બાયોપિકને લઈને લાંબા સમયથી ચર્ચા ચાલી રહી હતી, ત્યારે હવે ફિલ્મને લઈને મહત્વપૂર્ણ અપડેટ સામે આવ્યું છે. ખુદ યુવરાજ સિંહે આ ફિલ્મ અંગે માહિતી આપતાં જણાવ્યું છે કે બાયોપિકની સ્ક્રિપ્ટ પર છેલ્લા છ મહિનાથી કામ ચાલી રહ્યું છે. જો તમામ તૈયારીઓ સમયસર પૂર્ણ થશે તો આવતા વર્ષે ફિલ્મનું શૂટિંગ શરૂ થઈ શકે છે.

એક ઓવરમાં છ છગ્ગા ફટકારવાની ઐતિહાસિક સિદ્ધિ હોય કે પછી કેન્સર જેવી ગંભીર બીમારી સામેની લડાઈ, યુવરાજ સિંહની સફર અનેક ઉતાર-ચઢાવથી ભરેલી રહી છે. મેદાન પર પોતાની આક્રમક બેટિંગથી કરોડો ક્રિકેટ ચાહકોના દિલ જીતનાર યુવરાજે અંગત જીવનમાં પણ અનેક મુશ્કેલીઓનો સામનો કર્યો છે. તેમની આ જ પ્રેરણાદાયી સફરને હવે ફિલ્મના માધ્યમથી દર્શકો સુધી પહોંચાડવાની તૈયારી ચાલી રહી છે.

મીડિયા રિપોર્ટ્સ અનુસાર, યુવરાજ સિંહે જણાવ્યું કે ફિલ્મની સ્ક્રિપ્ટ તૈયાર કરવાની પ્રક્રિયા છેલ્લા છ મહિનાથી ચાલી રહી છે. તેમને આશા છે કે આગામી 9થી 12 મહિનામાં સ્ક્રિપ્ટનું કામ પૂર્ણ થઈ જશે. જો તેમની ટીમ નક્કી કરેલા સમય પ્રમાણે કામ પૂરું કરશે તો આવતા વર્ષે ફિલ્મનું શૂટિંગ શરૂ કરવામાં આવશે. જોકે, હજુ સુધી ફિલ્મની રિલીઝ ડેટ, કલાકારો અને મુખ્ય ભૂમિકા કોણ ભજવશે તે અંગે કોઈ સત્તાવાર જાહેરાત કરવામાં આવી નથી.

કેન્સર સામેની લડાઈ પણ બાયોપિકનો મહત્વનો ભાગ બનશે

યુવરાજ સિંહની બાયોપિકમાં તેમની ક્રિકેટ કારકિર્દીની સાથે કેન્સર સામેની લડાઈને પણ મહત્વપૂર્ણ સ્થાન મળી શકે છે. કારકિર્દીના શિખર પર પહોંચ્યા બાદ યુવરાજને કેન્સર જેવી ગંભીર બીમારીનો સામનો કરવો પડ્યો હતો. આ દરમિયાન તેમની ક્રિકેટ કારકિર્દી પર પણ સવાલો ઊભા થયા હતા. જોકે, તેમણે હિંમત હાર્યા વિના બીમારી સામે જંગ લડી અને ફરીથી મેદાન પર વાપસી કરી હતી.

યુવરાજે પોતાની બીમારીના સમયને યાદ કરતાં કહ્યું હતું કે શરૂઆતમાં તેઓ પોતાની તબિયત અને કેન્સર વિશે જાહેરમાં વાત કરવા માંગતા નહોતા. તેમને ડર હતો કે જો લોકો તેમની બીમારી વિશે જાણશે તો તેમની ક્રિકેટ કારકિર્દી સમાપ્ત થઈ શકે છે. લોકો તેમને ક્રિકેટ રમી ન શકે તેવી વ્યક્તિ તરીકે જોવા લાગશે તેવી પણ તેમને ચિંતા હતી.

યુવરાજની સફર અન્ય લોકો માટે પ્રેરણા

યુવરાજ સિંહના મતે, તેમની જીવનયાત્રા અને કેન્સર સામેની લડાઈએ અનેક લોકોને મુશ્કેલ પરિસ્થિતિઓનો સામનો કરવાની પ્રેરણા આપી છે. તેમણે જણાવ્યું કે જીવનમાં પોતાના અનુભવો પરિવાર અને મિત્રો સાથે શેર કરવા ખૂબ જરૂરી છે. મુશ્કેલ સમયમાંથી પસાર થતા લોકોએ પોતાની વાત કહેવામાં સંકોચ રાખવો જોઈએ નહીં.

હવે યુવરાજ સિંહની બાયોપિક ક્યારે ફ્લોર પર જશે અને પડદા પર તેમની ભૂમિકા કોણ ભજવશે તે જોવું રસપ્રદ રહેશે. ક્રિકેટના મેદાન પર અનેક યાદગાર ક્ષણો આપનાર યુવરાજની આ સંઘર્ષમય સફર ફિલ્મના રૂપમાં દર્શકોને કેટલી પ્રભાવિત કરે છે તેના પર સૌની નજર રહેશે.

પલાશ મુચ્છલને મોટો ઝટકો! કોર્ટે ₹10 કરોડનો માનહાનિનો દાવો ફગાવ્યો