Vaibhav Suryavanshi : વૈભવ સૂર્યવંશીએ બનાવ્યો શરમજનક રેકોર્ડ, કારકિર્દીમાં પહેલીવાર બન્યું આવું
ભારતની અંડર 19 ટીમના ઓપનર વૈભવ સૂર્યવંશી માટે ઈંગ્લેન્ડ પ્રવાસની છેલ્લી ઈનિંગ કોઈ દુઃસ્વપ્નથી ઓછી નહોતી. યૂથ ટેસ્ટની બીજી ઈનિંગમાં વૈભવ સૂર્યવંશી પોતાનું ખાતું પણ ખોલી શક્યો ન હતો. કારકિર્દીમાં પહેલીવાર પહેલા જ બોલ પર આઉટ થયો હતો.
વૈભવ સૂર્યવંશી એક પછી એક છગ્ગા ફટકારવા માટે જાણીતા છે. તેણે ઈંગ્લેન્ડ પ્રવાસ પર પણ આવું જ કંઈક કર્યું. તેણે અંડર 19 યુથ વનડે શ્રેણીમાં 29 છગ્ગા ફટકાર્યા હતા, પરંતુ યુવા ટેસ્ટ શ્રેણી શરૂ થતા જ વૈભવ સૂર્યવંશીનું બેટ શાંત થઈ ગયું. ઈંગ્લેન્ડ સામેની બીજી યુથ ટેસ્ટની બીજી ઈનિંગમાં વૈભવ સૂર્યવંશી પોતાનું ખાતું પણ ખોલી શક્યો ન હતો. મોટી વાત એ છે કે વૈભવ સૂર્યવંશી પહેલા જ બોલ પર આઉટ થઈ ગયો અને તેણે પોતાની કારકિર્દીમાં પહેલીવાર આવો દિવસ જોયો.
વૈભવ સૂર્યવંશી શૂન્ય પર આઉટ
ઈંગ્લેન્ડની ટીમે બીજી યુથ ટેસ્ટમાં ટીમ ઈન્ડિયાને 355 રનનો ટાર્ગેટ આપ્યો હતો. વૈભવ સૂર્યવંશી અને આયુષ મ્હાત્રે ઓપનિંગ કરવા આવ્યા હતા. ટીમને આશા હતી કે બંને સારી શરૂઆત આપશે, પરંતુ આ આશા પહેલા જ બોલ પર ચકનાચૂર થઈ ગઈ. વૈભવ સૂર્યવંશીને પહેલા જ બોલ પર એલેક્સ ગ્રીને બોલ્ડ કર્યો. વૈભવ સૂર્યવંશીએ મોટો શોટ રમવાનો પ્રયાસ કર્યો પરંતુ બોલ તેના બેટની ધારને અડીને સ્ટમ્પ પર વાગ્યો.
પહેલીવાર પહેલા જ બોલ પર આઉટ
યૂથ ટેસ્ટ કારકિર્દીમાં પહેલીવાર વૈભવ સૂર્યવંશી પહેલા જ બોલ પર આઉટ થયો. એટલું જ નહીં, આ સમગ્ર પ્રવાસમાં સૂર્યવંશી પહેલી જ વાર પોતાનું ખાતું ખોલી શક્યો નહીં. તે પહેલી ઈનિંગમાં 20 રન બનાવી આઉટ થયો હતો.
Ayush Mhatre smashed a brilliant century, while Vaibhav Suryavanshi fell for a golden duck in the chase of 355 against England U-19 pic.twitter.com/9N7lAFvWwj
— CricketGully (@thecricketgully) July 23, 2025
વૈભવ યુથ ટેસ્ટ સિરીઝમાં ફ્લોપ
વૈભવ સૂર્યવંશી માટે યુવા ટેસ્ટ શ્રેણી ખૂબ જ ખરાબ સાબિત થઈ. આ ખેલાડીએ 4 ઈનિંગ્સમાં ફક્ત 90 રન બનાવ્યા હતા. સૂર્યવંશીની સરેરાશ 22.50 હતી. વૈભવના આ આંકડા સૂચવે છે કે તેને લાંબા ફોર્મેટમાં રન બનાવવા માટે નવી રણનીતિ પર કામ કરવું પડશે. વૈભવ હાલ ફક્ત 14 વર્ષનો છે, તેની પાસે પોતાની રમત સુધારવા માટે ઘણો સમય છે. હવે જોવાનું એ છે કે સૂર્યવંશી કેવી રીતે વાપસી કરે છે.
યૂથ ODI શ્રેણીમાં સૂર્યવંશી ચમક્યો
વૈભવ સૂર્યવંશી યૂથ ટેસ્ટમાં ભલે નિષ્ફળ ગયો પરંતુ તેણે ODI શ્રેણીમાં સૌથી વધુ રન બનાવ્યા હતા. સૂર્યવંશીએ 5 મેચમાં 71ની સરેરાશથી 355 રન બનાવ્યા હતા. વૈભવે ODI શ્રેણીમાં કુલ 29 છગ્ગા ફટકાર્યા હતા.
આ પણ વાંચો: હરિદ્વારમાં અર્જુન એવોર્ડ વિજેતા ખેલાડી ગંગામાં ડૂબવા લાગ્યો, અને પછી જે થયું, જુઓ Video
