IND vs SA: બુમરાહ કારનામું કરવા તૈયાર! પ્રથમ T20 માં હાંસલ કરી શકે છે મોટી સિદ્ધિ, આવું કરનાર પ્રથમ ભારતીય બનશે

ભારત અને દક્ષિણ આફ્રિકા વચ્ચે 5 મેચની T20 શ્રેણીની પહેલી મેચ 9 ડિસેમ્બરે કટકના બારાબતી સ્ટેડિયમ ખાતે રમાશે. આ મેચમાં ટીમ ઈન્ડિયાના ફાસ્ટ બોલર જસપ્રીત બુમરાહ પાસે એક મોટો રેકોર્ડ બનાવવાની તક હશે.

બુમરાહ 1 વિકેટ સાથે, T20 માં 100 વિકેટ સુધી પહોંચી જશે. આ સાથે જ તે ત્રણેય ફોર્મેટમાં 100 કે તેથી વધુ વિકેટ લેનાર પ્રથમ ભારતીય બોલર બનશે.

જસપ્રીત બુમરાહ મોટી સિદ્ધિ હાંસલ કરશે

બુમરાહ અત્યાર સુધી 80 ટી20 આંતરરાષ્ટ્રીય મેચની 77 ઇનિંગ્સમાં 99 વિકેટ લઈ ચૂક્યો છે, જેના કારણે તે આ ફોર્મેટમાં ભારતનો બીજો સૌથી વધુ વિકેટ લેનાર બોલર બન્યો છે. જસપ્રીત બુમરાહને ટી20 આંતરરાષ્ટ્રીય મેચોમાં 100 વિકેટ સુધી પહોંચવા માટે ફક્ત 1 વિકેટની જરૂર છે.

અર્શદીપ સિંહ ટી20 આંતરરાષ્ટ્રીય મેચોમાં 100 વિકેટ સુધી પહોંચનાર એકમાત્ર ભારતીય બોલર છે. બુમરાહ ટી20 આંતરરાષ્ટ્રીય મેચોમાં 100 કે તેથી વધુ વિકેટ લેનાર ભારતનો બીજો બોલર બનશે.

ટી20 આંતરરાષ્ટ્રીય મેચોમાં ભારત તરફથી સૌથી વધુ વિકેટ લેનાર બોલર

• 105 – અર્શદીપ સિંહ
• 99 – જસપ્રીત બુમરાહ
• 98 – હાર્દિક પંડ્યા
• 96 – યુઝવેન્દ્ર ચહલ
• 90 – ભુવનેશ્વર કુમાર

જસપ્રીત બુમરાહ ODI શ્રેણીનો ભાગ નહોતો

જસપ્રીત બુમરાહ દક્ષિણ આફ્રિકા સામેની 2 મેચની ટેસ્ટ શ્રેણી માટે ભારતીય ટીમનો ભાગ હતો. તેને ત્રણ મેચની ODI શ્રેણી માટે આરામ આપવામાં આવ્યો હતો. હવે તે T20 શ્રેણી માટે મેદાનમાં પાછો ફરશે.

બુમરાહ અગાઉ ઓસ્ટ્રેલિયા સામે T20 શ્રેણીમાં રમ્યો હતો, જ્યાં તેનું પ્રદર્શન એટલું સારું રહ્યું નહોતું. બુમરાહની વાત કરીએ તો, તેના નામે ટેસ્ટ ક્રિકેટમાં 234 વિકેટ અને ODIમાં 149 વિકેટ છે.

દક્ષિણ આફ્રિકા સામેની T20I શ્રેણી માટે ભારતની ટીમ

સૂર્યકુમાર યાદવ (કેપ્ટન), શુભમન ગિલ (વાઈસ-કેપ્ટન), અભિષેક શર્મા, તિલક વર્મા, હાર્દિક પંડ્યા, શિવમ દુબે, અક્ષર પટેલ, જિતેશ શર્મા (વિકેટકીપર), સંજુ સેમસન (વિકેટકીપર), જસપ્રિત બુમરાહ, વરુણ ચક્રવર્તી, અર્શદીપ સિંહ, કુલદીપ યાદવ, હર્ષિત રાણા, વોશિંગ્ટન સુંદર.