સૂર્યકુમાર યાદવની કેપ્ટનશીપ પર લટકતી તલવાર! ટીમ ઈન્ડિયાની શનિવારે થશે જાહેરાત, આ ખેલાડી પર સૌની નજર

ભારત અને શ્રીલંકામાં યોજાનાર 2026 T20 વર્લ્ડ કપ માટે ભારતીય ટીમની જાહેરાત આજે, શનિવાર 20 ડિસેમ્બરે કરવામાં આવશે. પસંદગી સમિતિના અધ્યક્ષ અજિત અગરકરની આગેવાની હેઠળ આ બેઠક મુંબઈમાં યોજાશે. છેલ્લા કેટલાક મહિનાઓથી T20 ટીમમાં પસંદગીનો દોર લગભગ સ્પષ્ટ છે, પરંતુ કેપ્ટન સૂર્યકુમાર યાદવનું નબળું ફોર્મ પસંદગી સમિતિ માટે મોટો પ્રશ્ન બની ગયું છે.

આ બેઠક શનિવારે BCCIના મુંબઈ સ્થિત મુખ્યાલયમાં યોજાશે, જેમાં પાંચેય પસંદગીકારો હાજર રહેશે. વર્તમાન કેપ્ટન સૂર્યકુમાર યાદવ પણ આ બેઠકનો ભાગ બની શકે છે. બેઠક પૂર્ણ થયા બાદ મુખ્ય પસંદગીકાર અજિત અગરકર બપોરે 1:30 વાગ્યે પ્રેસ કોન્ફરન્સ કરીને ટીમની સત્તાવાર જાહેરાત કરશે. BCCIએ આ અંગે શુક્રવારે જાણકારી આપી હતી અને કહ્યું હતું કે સૂર્યકુમાર યાદવ પણ પ્રેસ કોન્ફરન્સમાં હાજર રહેશે.

સૂર્યકુમાર યાદવ અંગે પ્રશ્નો કેમ ઊભા થયા?

ટીમની જાહેરાતના એક દિવસ પહેલાં રમાયેલી ભારત અને દક્ષિણ આફ્રિકા વચ્ચેની અંતિમ T20 મેચ બાદ સૂર્યકુમાર યાદવ અંગે પ્રશ્નો વધુ ગંભીર બન્યા છે. ભલે ભારતે અમદાવાદમાં 30 રનથી મેચ જીતી હતી, પરંતુ કેપ્ટન સૂર્યકુમાર ફરી એકવાર બેટિંગમાં નિષ્ફળ ગયો હતો. તેણે 7 બોલમાં ફક્ત 5 રન બનાવ્યા હતા.

આખી શ્રેણીમાં સૂર્યકુમાર 4 ઇનિંગ્સમાં ફક્ત 34 રન જ બનાવી શક્યો હતો. માત્ર આ શ્રેણી નહીં, પરંતુ સમગ્ર વર્ષ 2025 પણ તેના માટે નિરાશાજનક રહ્યું છે. તેણે આ વર્ષે 21 T20 ઇનિંગ્સમાં 13.62ની સરેરાશ અને 123ના સ્ટ્રાઈક રેટથી ફક્ત 218 રન બનાવ્યા છે અને એક પણ અડધી સદી ફટકારવામાં નિષ્ફળ રહ્યો છે.

આ સ્થિતિ ટીમ મેનેજમેન્ટ માટે ચિંતાજનક છે, કારણ કે જો વર્લ્ડ કપ દરમિયાન સૂર્યકુમાર કેપ્ટન રહેશે અને તેનું ફોર્મ સુધરશે નહીં, તો તેને પ્લેઇંગ ઇલેવનમાંથી બહાર કરવું લગભગ અશક્ય બની જશે. આવી સ્થિતિ ટીમ ઈન્ડિયા માટે નુકસાનકારક સાબિત થઈ શકે છે.

શું સૂર્યા કેપ્ટનશીપ ગુમાવી શકે?

હવે સૌથી મોટો પ્રશ્ન એ છે કે શું પસંદગી સમિતિ સૂર્યકુમાર યાદવને કેપ્ટનશીપમાંથી દૂર કરી શકે છે? શું કોઈ અચાનક નિર્ણય લઈ શકાય છે? શું હાર્દિક પંડ્યાને ફરી કેપ્ટનશીપ સોંપવામાં આવી શકે છે, જેણે તાજેતરની શ્રેણીમાં બેટ અને બોલ બંનેથી શાનદાર પ્રદર્શન કર્યું હતું?

કોચ ગૌતમ ગંભીર અને અજિત અગરકરના અત્યાર સુધીના નિવેદનોને ધ્યાનમાં લેતા, આ સંભાવના ઓછી લાગે છે. વર્લ્ડ કપમાં હજુ દોઢ વર્ષ બાકી છે અને સૂર્યકુમાર લાંબા સમયથી ટીમનું નેતૃત્વ કરી રહ્યો છે, તેથી તેને હાલ માટે કેપ્ટન તરીકે જાળવી રાખવામાં આવશે તે લગભગ નિશ્ચિત માનવામાં આવે છે.

મહત્વનું છે કે, મીડિયા અહેવાલ મુજબ સૂર્યકુમાર યાદવની કેપ્ટનશીપ ફક્ત 2026 T20 વર્લ્ડ કપ સુધી જ મર્યાદિત હોઈ શકે છે. વર્લ્ડ કપ બાદ નવા કેપ્ટનની નિમણૂક થઈ શકે છે. તેનું એક કારણ સૂર્યકુમારનું નબળું ફોર્મ છે અને બીજું તેનું વધતું વય છે. સૂર્યકુમાર હાલમાં 35 વર્ષનો છે અને આગામી T20 વર્લ્ડ કપ દરમિયાન તેની ઉંમર 37 વર્ષ થશે.

કોને પડતો મૂકવામાં આવી શકે?

સૂર્યકુમારની જેમ, ટીમના ઉપ-કપ્તાન શુભમન ગિલનું પ્રદર્શન પણ તપાસ હેઠળ છે. ગિલ આ વર્ષે T20 આંતરરાષ્ટ્રીય ક્રિકેટમાં એક પણ અડધી સદી ફટકારી શક્યો નથી. આ કારણે અગાઉ સંજુ સેમસનને પ્લેઇંગ ઇલેવનમાંથી બહાર કરવો પડ્યો હતો, જ્યારે યશસ્વી જયસ્વાલને ટીમમાં સ્થાન મળવામાં મુશ્કેલી આવી હતી.

તેમ છતાં, શુભમન ગિલને બહાર કરવામાં આવશે તેવી સંભાવના ઓછી છે. આવી સ્થિતિમાં યશસ્વી જયસ્વાલને બહાર રાખવામાં આવી શકે છે. તે જ રીતે નીતિશ કુમાર રેડ્ડી, રિંકુ સિંહ અને મોહમ્મદ સિરાજ જેવા ખેલાડીઓને રિઝર્વ તરીકે રાખવામાં આવી શકે છે.

ટીમ ઈન્ડિયાની સંભવિત ટીમ

સૂર્યકુમાર યાદવ (કેપ્ટન), શુભમન ગિલ (વાઈસ-કેપ્ટન), અભિષેક શર્મા, તિલક વર્મા, હાર્દિક પંડ્યા, જિતેશ શર્મા (વિકેટકીપર), સંજુ સેમસન (વિકેટકીપર), શિવમ દુબે, વોશિંગ્ટન સુંદર, અક્ષર પટેલ, કુલદીપ યાદવ, જસપ્રીત બુમરાહ અને અર્શદીપ સિંહ.

વિરાટ કોહલી રિષભ પંતની કેપ્ટનશીપમાં રમશે, VHT માટે દિલ્હીની ટીમમાં પસંદગી, જાણવા માટે અહીં ક્લિક કરો..