IND vs ENG : પહેલી ટેસ્ટમાં નહીં રમે આ સ્ટાર ખેલાડી? ટીમ ઈન્ડિયાની પ્લેઈંગ 11 અંગે આવ્યા ચોંકાવનારા સમાચાર

હેડિંગ્લી ખાતે યોજાનારી ટેસ્ટ મેચ માટે ઈંગ્લેન્ડે પહેલાથી જ પોતાની પ્લેઈંગ ઈલેવનની જાહેરાત કરી દીધી છે. આવી સ્થિતિમાં હવે બધાની નજર ટીમ ઈન્ડિયા પર છે. એવું માનવામાં આવે છે કે ટીમ ઈન્ડિયાની પ્લેઈંગ 11 માં રવીન્દ્ર જાડેજા એકમાત્ર સ્પિનર ​​હોઈ શકે છે.

લીડ્સ ટેસ્ટમાં ટીમમાં માત્ર એક સ્પિનર

ટીમ ઈન્ડિયાના પ્રેક્ટિસ સેશનને જોયા બાદ આ અટકળો લગાવવામાં આવી રહી છે, જેના કારણે એવું લાગે છે કે કુલદીપને પોતાનો વારો આવે તેની રાહ જોવી પડી શકે છે. મતલબ કે લીડ્સ ટેસ્ટ શરૂ થાય તે પહેલા જ તેનું નામ પ્લેઈંગ 11 માંથી કાપી નાખવામાં આવ્યું હોય તેવું લાગે છે. ભારત અને ઈંગ્લેન્ડ વચ્ચે 5 ટેસ્ટ મેચની શ્રેણીની પહેલી મેચ 20 જૂનથી શરૂ થઈ રહી છે.

કુલદીપ યાદવ પ્લેઈંગ 11 માંથી થશે બહાર?

અહેવાલો અનુસાર, ભારતીય ટીમની પ્લેઈંગ 11 માં 2 પોઝિશન વિશે ઘણી ચર્ચા થઈ રહી છે. એક, જેનો ઉલ્લેખ ટીમના વાઈસ કેપ્ટન રિષભ પંતે પણ પ્રેસ કોન્ફરન્સમાં કર્યો હતો – નંબર 3 પોઝિશન અને બીજું, શું ભારતે કુલદીપ યાદવને રમાડવો જોઈએ? પ્રેક્ટિસ સેશનથી મળેલા સંકેતોના આધારે એવું અનુમાન લગાવી શકાય છે કે પ્લેઈંગ 11 માં રવીન્દ્ર જાડેજા એકમાત્ર સ્પિનર ​​હોઈ શકે છે અને કુલદીપને એજબેસ્ટન અથવા ઓવલમાં પોતાના વારાની રાહ જોવી પડી શકે છે.

પ્રેક્ટિસમાં પેસર્સ પર ભાર મૂકવામાં આવ્યો

હેડિંગ્લી ખાતેના પહેલા પ્રેક્ટિસ સેશનમાં, ટીમ ઈન્ડિયાનું સંપૂર્ણ ધ્યાન ફાસ્ટ બોલરો પર હતું. બુમરાહ, સિરાજ અને પ્રસિદ્ધ કૃષ્ણા નેટ્સમાં સતત બોલિંગ કરતા જોવા મળ્યા. બધાએ ટીમના બોલિંગ કોચ મોર્ને મોર્કેલની દેખરેખ હેઠળ પોતાની બોલિંગ પર કામ કર્યું. રિપોર્ટમાં એમ પણ કહેવામાં આવ્યું છે કે ભારતીય ટીમ મેનેજમેન્ટ શાર્દુલ અને નીતિશ બંનેની પસંદગી માટે રસપ્રદ નિર્ણય લઈ શકે છે.

કુલદીપનો ટેસ્ટ રેકોર્ડ

અશ્વિનની નિવૃત્તિ પછી, કુલદીપ ટીમ ઈન્ડિયામાં પોતાનું સ્થાન સુરક્ષિત કરવાનો પ્રયાસ કરી રહ્યો છે. તેણે અત્યાર સુધી 13 ટેસ્ટમાં 56 વિકેટ લીધી છે. કુલદીપે 2018માં ઈંગ્લેન્ડની ધરતી પર એકમાત્ર ટેસ્ટ રમી હતી. લોર્ડ્સમાં રમાયેલી તે મેચમાં તેને કોઈ વિકેટ મળી ન હતી. ઈંગ્લેન્ડ સામેના તેના રેકોર્ડ વિશે વાત કરીએ તો, તેણે ઈંગ્લેન્ડ સામે 6 ટેસ્ટમાં 22.28ની સરેરાશથી 21 વિકેટ લીધી છે.

લીડ્સમાં બે સ્પિનરોએ જીત અપાવી હતી

એવું નથી કે ભારતે લીડ્સમાં ક્યારેય બે સ્પિનરો સાથે રમ્યું નથી. જ્યારે 2002માં અહીં જીત મેળવી હતી, ત્યારે કેપ્ટન ગાંગુલીએ તે મેચમાં કુંબલે અને હરભજન બંનેને ટીમમાં સામેલ કર્યા હતા અને બંને સ્પિનરોએ મળીને તે મેચમાં કુલ 11 વિકેટ લીધી હતી. આવી સ્થિતિમાં, જોવાનું એ રહે છે કે નવો કેપ્ટન શુભમન ગિલ અને મુખ્ય કોચ ગંભીર શું નિર્ણય લે છે – કુલદીપ સાથે જવું કે તેને પ્લેઈંગ ઈલેવનમાંથી બહાર રાખવો.

આ પણ વાંચો: IND vs ENG : ગિલ-રાહુલ-પંત સામે પાકિસ્તાનનો આ બોલર કરશે બોલિંગ ! POK સાથે છે ખાસ કનેક્શન

ક્રિકેટ સહિત રમતગમતના દરેક સમાચાર વાંચવા અહીં ક્લિક કરો