T20 WC Breaking : ઓસ્ટ્રેલિયા T20 વર્લ્ડ કપમાંથી બહાર? શ્રીલંકા શાનદાર જીત સાથે સુપર 8 માં પ્રવેશ્યું

T20 વર્લ્ડ કપમાં શ્રીલંકાએ ઓસ્ટ્રેલિયાને હરાવ્યું. સતત બીજી હાર સાથે ઓસ્ટ્રેલિયા ગ્રુપ સ્ટેજમાંથી બહાર થવાની આરે છે અને મંગળવારે ઝિમ્બાબ્વે-આયર્લેન્ડ મેચનું પરિણામ તેમનું ભાગ્ય નક્કી કરી શકે છે. શ્રીલંકા શાનદાર જીત સાથે સુપર આઠમાં પ્રવેશ્યું છે.

Smit Chauhan | Updated on: Feb 16, 2026 | 11:17 PM

T20 વર્લ્ડ કપ 2026 નું કો-હોસ્ટ શ્રીલંકા, શાનદાર વિજય સાથે સુપર 8 રાઉન્ડમાં પ્રવેશ્યું હતું. ઓપનર પથુમ નિસાન્કાની વિસ્ફોટક સદીથી શ્રીલંકાએ ઓસ્ટ્રેલિયાને આઠ વિકેટથી કચડીને આગળના રાઉન્ડમાં પ્રવેશ કર્યો હતો. નિસાન્કા આ વર્લ્ડ કપમાં સદી ફટકારનાર પ્રથમ બેટ્સમેન બન્યો અને પોતાની ટીમને વિજય તરફ દોરીને પેવેલિયન પાછો ફર્યો, જેમાં તેણે માત્ર 18 ઓવરમાં 182 રનનો લક્ષ્યાંક હાંસલ કર્યો. સતત બીજી હાર સાથે, પૂર્વ ચેમ્પિયન ઓસ્ટ્રેલિયા પ્રથમ રાઉન્ડમાં જ બહાર થવાની આરે છે.

ઝિમ્બાબ્વ બાદ શ્રીલંકા સામે હાર્યું ઓસ્ટ્રેલિયા

16 ફેબ્રુઆરી, સોમવારે સાંજે પલ્લેકેલેમાં રમાયેલી આ મેચ પર બધાની નજર હતી. યજમાન શ્રીલંકા સતત બે જીત સાથે પોઈન્ટ ટેબલમાં ટોચનું સ્થાન પર હતું, પરંતુ આ મેચ ઓસ્ટ્રેલિયા માટે મહત્વપૂર્ણ હતી. પાછલી મેચમાં ઝિમ્બાબ્વે સામેની હાર બાદ ઓસ્ટ્રેલિયાને અહીં જીતની ખૂબ જ જરૂર હતી, પરંતુ કેપ્ટન મિશેલ માર્શની વાપસી પણ તેમનું નસીબ બદલી શકી નહીં.

માર્શ-હેડની 104 રનની ભાગીદારી

માર્શના કમબેકથી ઓસ્ટ્રેલિયાની બેટિંગ પર ચોક્કસ અસર પડી. ઓસ્ટ્રેલિયન કેપ્ટને વિસ્ફોટક શરૂઆત આપી હતી. ખરાબ ફોર્મમાં સંઘર્ષ કરી રહેલા સ્ટાર ઓપનર ટ્રેવિસ હેડે પણ આક્રમક રમત બતાવી. બંને બેટ્સમેનોએ ઝડપથી અડધી સદી ફટકારી, માત્ર 8.3 ઓવરમાં 104 રનની મજબૂત ભાગીદારી નોંધાવી. જોકે, પહેલી વિકેટ પડ્યા પછી ઓસ્ટ્રેલિયન ઇનિંગ પડી ભાંગી, અને ટીમે આગામી ચાર ઓવરમાં ચાર વિકેટ ગુમાવી દીધી હતી.

ઓસ્ટ્રેલિયાએ 21 રનમાં પાંચ વિકેટ ગુમાવી

જોશ ઈંગ્લિસ અને ગ્લેન મેક્સવેલ ઇનિંગને મોટા સ્કોર તરફ આગળ લઈ જઈ રહ્યા હતા ત્યારે નિસાન્કાએ એક શાનદાર કેચ સાથે આ ભાગીદારી તોડી. ત્યારબાદ ઓસ્ટ્રેલિયાએ 21 રનમાં બાકીની પાંચ વિકેટ ગુમાવી દીધી અને માત્ર 181 રનમાં જ ટીમ ઓલઆઉટ થઇ ગઈ. શ્રીલંકા તરફથી સ્પિનર દુષણ હેમંથાએ ત્રણ અને દુષ્મંથા ચમીરાએ બે વિકેટ લીધી હતી.

નિસાન્કા-મેન્ડિસની દમદાર બેટિંગ

બીજી તરફ, શ્રીલંકાની શરૂઆત ખરાબ રહી, તેમણે જ બીજી ઓવરમાં ઓપનર કુસલ પરેરાની વિકેટ ગુમાવી. જોકે, તેનાથી યજમાન ટીમ નિરાશ ન થઈ અને નિસાન્કાએ કુસલ મેન્ડિસ સાથે મળીને આક્રમક રમત શરૂ કરી. બંને બેટ્સમેન ઓસ્ટ્રેલિયા માટે માથાનો દુખાવો સાબિત થયા. મેન્ડિસે સતત ત્રીજી અડધી સદી ફટકારી, જ્યારે નિસાન્કાએ પણ 50 રનનો આંકડો પાર કર્યો.

નિસાન્કાએ 52 બોલમાં સદી ફટકારી

માર્કસ સ્ટોઇનિસે 13મી ઓવરમાં કુસલ મેન્ડિસને આઉટ કરીને ભાગીદારી તોડી નાખી, જેનાથી વાપસીની આશા જાગી. પરંતુ તે અપૂરતું સાબિત થયું. આ સમય સુધીમાં નિસાન્કાએ ઇનિંગ પર સંપૂર્ણ પ્રભુત્વ મેળવી લીધું હતું. અંતે, 18મી ઓવરમાં નિસાન્કાએ માત્ર 52 બોલમાં ટુર્નામેન્ટની પોતાની પ્રથમ સદી પૂરી કરવા માટે એક સિંગલ લીધો, જેનાથી ટીમને 8 વિકેટની યાદગાર જીત મળી. પવન રત્નાયકેએ પણ અણનમ 28 રન સાથે મહત્વપૂર્ણ યોગદાન આપ્યું.

ઓસ્ટ્રેલિયાનું ભાગ્ય આયર્લેન્ડના હાથમાં

ઓસ્ટ્રેલિયા ફક્ત બે પોઈન્ટ સાથે ટેબલમાં ત્રીજા સ્થાને છે. શ્રીલંકા આગામી રાઉન્ડમાં આગળ વધી ગયું છે, જ્યારે બીજા ક્રમે રહેલ ઝિમ્બાબ્વે પાસે ઓસ્ટ્રેલિયાને ભાર કરવાની તક છે. ઝિમ્બાબ્વે મંગળવારે આયર્લેન્ડ સામે ટકરાશે. જો સિકંદર રઝાની ટીમ આ મેચ જીતી જશે, તો તેઓ પણ આગામી રાઉન્ડમાં પ્રવેશ કરશે, અને ઓસ્ટ્રેલિયા બહાર ફેંલાઈ શકે છે.