IND vs ENG: કેપ્ટને બનાવ્યા 35 રન, તો સચિન થયો હેરાન, કહ્યું- આ યુવરાજ છે કે બુમરાહ? 2007 ની યાદ અપાવી
IND vs ENG 5મી ટેસ્ટઃ જસપ્રીત બુમરાહે ટેસ્ટ ક્રિકેટમાં નવો ઈતિહાસ રચ્યો છે. તેણે બ્રોડની એક ઓવરમાં 35 રન બનાવ્યા હતા. 1877 પછી રમાઈ રહેલી ટેસ્ટ ઈતિહાસમાં આ સૌથી મોંઘી ઓવર છે.
જસપ્રીત બુમરાહ (Jasprit Bumrah) તેની ઘાતક બોલિંગ માટે દુનિયાભરમાં જાણીતો છે. પરંતુ શનિવારે તેણે ઈંગ્લેન્ડમાં પોતાના બેટથી ઈતિહાસ રચ્યો હતો. તેણે ઝડપી બોલર સ્ટુઅર્ટ બ્રોડ (Stuart Broad) ની એક ઓવરમાં 35 રન બનાવ્યા હતા. 1877 એટલે કે 145 વર્ષથી રમાઈ રહેલા ટેસ્ટ ઈતિહાસમાં આ સૌથી મોંઘી ઓવર છે. આ મેચમાં બ્રોડે તેની કારકિર્દીની 550મી વિકેટ પણ લીધી હતી. પરંતુ આ સાથે તેણે એક શરમજનક રેકોર્ડ પણ પોતાના નામે કરી લીધો છે.
આ પહેલા 2007માં T20 વર્લ્ડ કપમાં યુવરાજ સિંહે (Yuvraj Singh) સતત 6 બોલમાં 6 સિક્સર ફટકારી હતી. ત્યારબાદ ટીમ ઈન્ડિયાએ પણ ખિતાબ જીત્યો હતો. હવે બુમરાહની આક્રમક બેટિંગ બાદ ટીમ ઈન્ડિયાને આ મેચ જીતવાની આશા છે. ટીમ હાલમાં શ્રેણીમાં 2-1 થી આગળ છે. ભારતે પ્રથમ દાવમાં 416 રન બનાવ્યા હતા.
જસપ્રિત બુમરાહે સ્ટુઅર્ટ બ્રોડની એક ઓવરમાં 4 ચોગ્ગા અને 2 છગ્ગા ફટકાર્યા હતા. બ્રોડે એક નોબોલ જ્યારે વાઈડ પર 5 રન આપ્યા. આ રીતે ઓવરમાં કુલ 35 રન થયા હતા. માસ્ટર બ્લાસ્ટર સચિન તેંડુલકરે બુમરાહની બેટિંગ પર એક ખાસ વાત લખી. તેણે સોશિયલ મીડિયા પર લખ્યું કે, આ યુવી છે કે બુમરાહ? મને 2007ની યાદ અપાવે છે… સોની સ્પોર્ટ્સ પર કોમેન્ટ્રી કરતી વખતે વિનેન્દ્ર સેહવાગે કહ્યું કે બુમરાહની ઇનિંગ્સ વર્ષો સુધી યાદ રહેશે.
Kya yeh Yuvi hai ya Bumrah!?
2007 ki yaad dilaa di.. 😍@YUVSTRONG12 @Jaspritbumrah93 #ENGvIND pic.twitter.com/vv9rvrrO6K
— Sachin Tendulkar (@sachin_rt) July 2, 2022
2470 મી ટેસ્ટ મેચ રમાઇ રહી છે
ટેસ્ટ ક્રિકેટની શરૂઆત 1877માં થઈ હતી. ભૂતપૂર્વ ભારતીય ક્રિકેટર અજય જાડેજાએ જણાવ્યું હતું કે, અગાઉ એક ઓવરમાં 8 બોલ પણ ફેંકવામાં આવતા હતા. છતાં આ પરાક્રમ થઈ શક્યું ન હતું. આ રીતે જસપ્રીત બુમરાહનો રેકોર્ડ પોતાનામાં ખાસ છે. ભારત અને ઈંગ્લેન્ડ વચ્ચે રમાઈ રહેલી મેચ 2470મી ટેસ્ટ છે. આ પહેલા રમાયેલી 2469 ટેસ્ટમાં ક્યારેય એક ઓવરમાં 28થી વધુ રન નથી બન્યા. 3 વખત એક ઓવરમાં 28 રન બનાવ્યા હતા. વેસ્ટ ઈન્ડિઝના બ્રાયન લારા, ઓસ્ટ્રેલિયાના જ્યોર્જ બેઈલી અને દક્ષિણ આફ્રિકાના કેશવ મહારાજે આ કર્યું.
ઈંગ્લેન્ડનો સ્ટુઅર્ટ બ્રોડ ટેસ્ટ અને T20 ઈન્ટરનેશનલમાં એક ઓવરમાં સૌથી વધુ રન આપનાર બોલર બની ગયો છે. યુવરાજ સિંહે 2007 T20 વર્લ્ડ કપમાં 6 સિક્સર સહિત 36 રન બનાવ્યા હતા. બુમરાહની આ બેટિંગ એટલા માટે પણ ખાસ છે કારણ કે કેપ્ટન તરીકે આ તેની પ્રથમ મેચ છે. તે ટેસ્ટમાં ભારતીય ટીમનું નેતૃત્વ કરનાર 36મો ખેલાડી છે. નિયમિત કેપ્ટન રોહિત શર્મા કોરોનાને કારણે આ મેચ રમી રહ્યો નથી.
