WTC ફાઈનલ ભારતમાં યોજાશે? BCCIએ ભર્યું મોટું પગલું, ભારતીય ચાહકો માટે સારા સમાચાર
BCCIએ આગામી વર્લ્ડ ટેસ્ટ ચેમ્પિયનશિપ ફાઈનલનું આયોજન કરવાનો દાવો રજૂ કર્યો છે. ઝિમ્બાબ્વેમાં યોજાયેલી બેઠકમાં આ અંગે ચર્ચા કરવામાં આવી હોવાનો બ્રિટિશ મીડિયાએ દાવો કર્યો છે. પણ સવાલ એ છે કે શું જો ભારતને 2025-27 વર્લ્ડ ટેસ્ટ ચેમ્પિયનશિપની ફાઈનલની યજમાનીના અધિકારો મળે અને પાકિસ્તાની ટીમ ફાઈનલમાં પહોંચે, તો શું થશે?
વર્લ્ડ ટેસ્ટ ચેમ્પિયનશિપની બે ફાઈનલ ઈંગ્લેન્ડમાં યોજાઈ છે. દક્ષિણ આફ્રિકા અને ઓસ્ટ્રેલિયા વચ્ચે રમાનારી ત્રીજી ફાઈનલ પણ ઈંગ્લેન્ડમાં યોજાશે. હવે સમાચાર એ છે કે BCCI એ આગામી વર્લ્ડ ટેસ્ટ ચેમ્પિયનશિપ ફાઇનલનું આયોજન કરવાનો દાવો કર્યો છે. મીડિયા રિપોર્ટ્સ અનુસાર, BCCI WTC 2025-2027 ની ફાઈનલ મેચ ભારતમાં યોજવા માંગે છે જેના માટે તેમણે અરજી કરી છે. ગયા મહિને ICC ચીફ એક્ઝિક્યુટિવ કમિટીની બેઠકમાં આ મુદ્દા પર ચર્ચા થઈ હતી અને ભારતે ફાઈનલનું આયોજન કરવાની ઈચ્છા વ્યક્ત કરી હતી.
બ્રિટિશ મીડિયાએ દાવો કર્યો
ઈંગ્લેન્ડના અખબાર ધ ગાર્ડિયનના સમાચાર અનુસાર, ‘ભારતે 2027ની ફાઇનલની યજમાની કરવાની ઈચ્છા વ્યક્ત કરી છે. ઝિમ્બાબ્વેમાં યોજાયેલી બેઠકમાં આ અંગે ચર્ચા કરવામાં આવી હતી. તે બેઠકમાં ભારતનું પ્રતિનિધિત્વ અરુણ સિંહ ધુમલ દ્વારા કરવામાં આવ્યું હતું અને ICC વડા જય શાહ પણ હાજર હતા.
ભારત બે WTC ફાઈનલમાં હારી ગયું છે
ટીમ ઈન્ડિયા બે વાર વર્લ્ડ ટેસ્ટ ચેમ્પિયનશિપની ફાઈનલમાં પહોંચવામાં સફળ રહી, પરંતુ બંને ફાઈનલમાં હારનો સામનો કરવો પડ્યો. પહેલી ફાઈનલ ઈંગ્લેન્ડના હેમ્પશાયરના રોઝ બાઉલ ગ્રાઉન્ડ ખાતે યોજાઈ હતી, જેમાં ટીમ ઈન્ડિયા ન્યુઝીલેન્ડ સામે હારી ગઈ હતી. આ પછી, આગામી ફાઈનલ ઈંગ્લેન્ડના ઓવલ મેદાન પર યોજાઈ, જ્યાં ભારત ઓસ્ટ્રેલિયા સામે હારી ગયું. ત્રીજી ફાઈનલ 11 જૂનથી લોર્ડ્સ ખાતે રમાશે. આ વખતે ટાઈટલ ટક્કર ઓસ્ટ્રેલિયા અને દક્ષિણ આફ્રિકા વચ્ચે છે.
ICC લેશે અંતિમ નિર્ણય
રિપોર્ટ અનુસાર, ECB ઈચ્છે છે કે વર્લ્ડ ટેસ્ટ ચેમ્પિયનશિપની ફાઈનલ જોયા પછી નિર્ણય લેવામાં આવે કારણ કે તેનો તર્ક છે કે જો ભારત સિવાય કોઈ ટીમ ફાઈનલમાં પહોંચે છે, તો ફાઈનલ માટે ટિકિટ વેચવી મુશ્કેલ બનશે. બીજી બાજુ, ઈંગ્લેન્ડમાં મેચ હંમેશા હાઉસફુલ રહે છે. દક્ષિણ આફ્રિકા અને ઓસ્ટ્રેલિયા વચ્ચેની ફાઈનલના પહેલા ચાર દિવસની ટિકિટ પણ વેચાઈ ગઈ છે. હવે જોવાનું એ રહે છે કે ICC શું નિર્ણય લે છે. પરંતુ અહીં પ્રશ્ન એ છે કે, જો ભારતને 2025-27 વર્લ્ડ ટેસ્ટ ચેમ્પિયનશિપની ફાઈનલની યજમાનીના અધિકારો મળે અને પાકિસ્તાની ટીમ ફાઈનલમાં પહોંચે, તો શું થશે?
આ પણ વાંચો: PSL 2025ની બાકીની મેચો રમાશે નહીં, પાકિસ્તાન ક્રિકેટ બોર્ડે ટુર્નામેન્ટ મુલતવી રાખી
