ઈલેક્ટ્રિક વાહનો માટે ચાર્જિંગ સોલ્યુશન્સ પ્રોવાઈડર સર્વોટેક પાવર સિસ્ટમ્સે EV ચાર્જર સપ્લાય કરવા માટે ગૌતમ અદાણીની કંપની સાથે ડીલ કરી છે. આ કંપનીએ અદાણી ટોટલ એનર્જીઝ ઈ-મોબિલિટી સાથે કરાર કર્યો છે. કંપનીએ એક નિવેદનમાં જણાવ્યું હતું કે સર્વોટેક પાવર સિસ્ટમ્સ જુદા-જુદા એરપોર્ટ અને અન્ય સ્થળોએ AC EV ચાર્જર્સના ઉત્પાદન, સપ્લાય અને ઈન્સ્ટોલેશન કરશે.
સર્વોટેક પાવર સિસ્ટમ્સના જણાવ્યા મૂજબ તેઓ અપેક્ષા રાખે છે કે આ કરાર આ વર્ષે મોટા EV ચાર્જર ઓર્ડર તરફ દોરી જશે. આ કોન્ટ્રાક્ટનો ઉદ્દેશ્ય યુઝર-ફ્રેન્ડલી ઈ-ટ્રાન્સપોર્ટેશન હબ સેટ કરવા, વ્યવહારોને સુવ્યવસ્થિત કરવા, ઉપલબ્ધતા વધારવા, સુવિધા અને EV યુઝર્સ માટે 'નેવિગેશન' સરળ બનાવવાનો છે.
આજે 8 ફેબ્રુઆરીના રોજ સર્વોટેકના શેરમાં વેચવાલી જોવા મળી હતી. આ સમાચાર લખાઈ રહ્યા છે ત્યારે શેર 5 ટકાની લોઅર સર્કિટ પર 92.40 રૂપિયાના સ્તરે છે. આજે શેરના ભાવમાં 4.85 રૂપિયાનો ઘટાડો થયો છે. શેર 6 ફેબ્રુઆરીએ 108.70 રૂપિયાની 52 સપ્તાહના હાઈ લેવલ પર પહોંચ્યો હતો.
બ્રોકરેજે સર્વોટેક પાવર સિસ્ટમ્સ લિમિટેડના શેર માટે ટાર્ગેટ પ્રાઈસ આપ્યો છે. પ્રભુદાસ લિલાધરના શિજુ કૂથુપલક્કલે જણાવ્યું હતું કે, સર્વોટેક શેર્સ 88 રૂપિયાના સ્તરે મજબૂત આધાર ધરાવે છે અને એનર્જી સ્ટોક્સ 100 રૂપિયા પર અવરોધોનો સામનો કરી રહ્યા છે. જો આ અવરોધ નિર્ણાયક રીતે પાર કરવામાં આવશે તો સર્વોટેકના શેર 112 રૂપિયાના લેવલ પર જઈ શકે છે.
બ્રોકરેજે સ્ટોક હોલ્ડ કરવા અને 88 રૂપિયા પર સ્ટોપ લોસ રાખવાની સલાહ આપી છે. ગયા અઠવાડિયે જ સર્વોટેક પાવર સિસ્ટમ્સે BPCLના નવા ઓર્ડર વિશે માહિતી આપી છે. BPCL એ 1800 DC ફાસ્ટ EV ચાર્જર માટે 120 કરોડ રૂપિયાનો ઓર્ડર આપ્યો છે. (નોંધ: આ રોકાણની સલાહ નથી. શેરબજાર જોખમોને આધીન છે. કોઈપણ રોકાણ કરતા પહેલા નિષ્ણાતની સલાહ લો.)