ના અંબાણી કે ના અદાણી…આ વ્યક્તિએ ખરીદી ભારતની સૌથી મોંઘી કાર
ભારતના એક મોટા ઉદ્યોગપતિએ દેશની સૌથી મોંઘી કાર રોલ્સ-રોયસ ફેન્ટમ VIII EWB ખરીદી છે, તેની કિંમત 22 કરોડ રૂપિયા છે, અને આ ઉદ્યોગપતિના કાર કલેક્શનમાં આ 22મી રોલ્સ-રોયસ છે. આ કારના માલિકે મુકેશ અંબાણી અને ગૌતમ અદાણી જેવા મોટા નામોને પણ પાછળ છોડી દીધા છે. જાણો આ કાર કોણે ખરીદી છે.
જો આપણે દુનિયાની સૌથી મોંઘી કાર વિશે વાત કરીએ તો રોલ્સ રોયસનું નામ તરત જ ધ્યાનમાં આવે છે. ભારતમાં પણ સૌથી મોંઘી કાર રોલ્સ-રોયસની છે.
તાજેતરમાં એક મોટા ઉદ્યોગપતિએ દેશની સૌથી મોંઘી કાર 'રોલ્સ-રોયસ ફેન્ટમ VIII EWB ખરીદી છે. તેની કિંમત 22 કરોડ રૂપિયા છે. રસપ્રદ વાત એ છે કે, મુકેશ અંબાણી કે ગૌતમ અદાણી નહીં, પરંતુ જાણીતા ઉદ્યોગપતિ યોહાન પૂનાવાલા આ મોંઘી કારના માલિક બન્યા છે.
મુકેશ અંબાણી અને ગૌતમ અદાણી જેવા ભારતના સૌથી ધનિક ઉદ્યોગપતિઓ લક્ઝરી કારના શોખીન છે, ત્યારે યોહાન પૂનાવાલાનું કાર કલેક્શન પણ ખાસ અને મોટું બની રહ્યું છે. પૂનાવાલાએ આ વખતે તેમની 22મી રોલ્સ-રોયસ ખરીદી છે અને આ સાથે તેઓ ભારતની સૌથી મોંઘી કારના માલિક બન્યા છે.
યોહાન પૂનાવાલા પાસે હવે તેમના ગેરેજમાં 22 રોલ્સ-રોયસ છે, પરંતુ આ નવી ફેન્ટમ VIII EWB વધુ ખાસ છે. તેમણે આ કાર સુંદર બોહેમિયન લાલ રંગમાં તૈયાર કરાવી છે. તેના ઇન્ટિરિયરમાં ડ્યુઅલ-ટોન ફિનિશનો ઉપયોગ કરવામાં આવ્યો છે, જે તેને વધુ સ્ટાઇલિશ બનાવે છે. 22-ઇંચ બ્રશ કરેલા સિલ્વર વ્હીલ્સ અને સ્ટારલાઇટ હેડલાઇટ્સ તેને એક ખાસ શાહી દેખાવ આપે છે.
આ રોલ્સ-રોયસ ફેન્ટમમાં એક ખાસ પ્રાઇવસી સ્યુટ પણ છે. ડ્રાઇવર અને પાછળના મુસાફરો વચ્ચે કાચની દિવાલ છે, જે પ્રાઇવસી જાળવી રાખે છે. આ પ્રાઇવસી સુવિધા તાજેતરમાં રોલ્સ-રોયસ દ્વારા બંધ કરવામાં આવી હતી, પરંતુ યોહાન પૂનાવાલાએ ખાસ કરીને તેમની કારમાં આ સુવિધાનો સમાવેશ કર્યો છે, જે તેને વધુ અનોખી બનાવે છે.
આ રોલ્સ-રોયસ સ્ટાન્ડર્ડ વ્હીલબેઝ વર્ઝન કરતાં 220mm લાંબી છે. ફેન્ટમ VIII EWB 6.75-લિટર ટ્વીન-ટર્બો V12 એન્જિન દ્વારા સંચાલિત છે, જે 563 bhp પાવર અને 900 Nm ટોર્ક જનરેટ કરે છે. આ કાર 5.1 સેકન્ડમાં 0 થી 100 કિલોમીટર પ્રતિ કલાકની ઝડપ મેળવી શકે છે. તેની ટોપ સ્પીડ 250 કિલોમીટર પ્રતિ કલાક છે.