IND vs ENG : ભારત સામેની પ્રથમ T20 માટે ઈંગ્લેન્ડે મજબૂત પ્લેઈંગ 11 પસંદ કરી, 24 કલાક પહેલા કરી ટીમની જાહેરાત
ભારત અને ઈંગ્લેન્ડ વચ્ચે પ્રથમ T20 મેચ કોલકાતાના ઈડન ગાર્ડન્સ ખાતે રમાશે. આ મેચના એક દિવસ પહેલા ઈંગ્લેન્ડની ટીમે તેની પ્લેઈંગ ઈલેવનની જાહેરાત કરી દીધી છે. ઈંગ્લેન્ડે ખૂબ જ શક્તિશાળી પ્લેઈંગ ઈલેવનની પસંદગી કરી છે.
કોલકાતાથી ભારત અને ઈંગ્લેન્ડ વચ્ચે T20 શ્રેણીની શરૂઆત થઈ રહી છે. પ્રથમ મેચ 22 જાન્યુઆરીએ ઈડન ગાર્ડન્સમાં રમાશે. રસપ્રદ વાત એ છે કે ઈંગ્લેન્ડે મેચના એક દિવસ પહેલા પોતાની પ્લેઈંગ ઈલેવનની જાહેરાત કરી દીધી છે. ઈંગ્લેન્ડે એક ખૂબ જ શક્તિશાળી ટીમની પસંદગી કરી છે જેમાં તોફાની બેટ્સમેનથી લઈને અદ્ભુત બોલરો સુધીનો સમાવેશ થાય છે.
T20 શ્રેણી શરૂ થવાના એક દિવસ પહેલા માટે ઈંગ્લેન્ડે ટીમની જાહેરાત કરી હતી. મોટા સમાચાર એ છે કે કેપ્ટન જોસ બટલરે આ મેચમાં પોતાની ભૂમિકામાં બે મોટા ફેરફાર કર્યા છે. તે ન તો વિકેટ કીપિંગ કરશે અને ન તો ઓપનિંગ કરશે.
બેન ડકેટ અને ફિલ સોલ્ટ ઈંગ્લેન્ડ માટે ઓપનિંગ કરશે. આ બંને ખેલાડીઓએ વેસ્ટ ઈન્ડિઝ સામેની T20 શ્રેણીમાં શાનદાર બેટિંગ કરી હતી. આ પછી જોસ બટલર પણ ફોર્મમાં જોવા મળી રહ્યો છે, તે ત્રીજા નંબર પર બેટિંગ કરતો જોવા મળી શકે છે. વાઈસ કેપ્ટન હેરી બ્રુક ચોથા નંબર પર જોવા મળશે, તે હાલમાં તેના શ્રેષ્ઠ ફોર્મમાં છે.
લિયામ લિવિંગસ્ટન પાંચમા સ્થાને બેટિંગ કરી શકે છે. છઠ્ઠા સ્થાન પર ડાબોડી બેટ્સમેન જેકબ બેથલ જોવા મળશે, જે પ્રથમ વખત ભારતમાં મેચ રમશે. બેથલને RCB દ્વારા IPL 2025 માટે પોતાની ટીમમાં સામેલ કરવામાં આવ્યો છે.
ઈંગ્લેન્ડની પ્લેઈંગ ઈલેવનમાં ઓલરાઉન્ડર જેમી ઓવરટોનનો સમાવેશ થાય છે, જે શાનદાર હિટિંગની સાથે અદ્ભૂત ઝડપી બોલિંગ પણ કરે છે. તેની સ્વિંગ બોલિંગ ઉપરાંત ગસ એટકિન્સન પણ સારી બેટિંગ કરે છે.
મોટા સમાચાર એ છે કે ઈંગ્લેન્ડ પાસે પ્લેઈંગ ઈલેવનમાં જોફ્રા આર્ચર અને માર્ક વુડ જેવા બે પ્રીમિયમ ફાસ્ટ બોલર પણ છે. ઈંગ્લેન્ડની ટીમ પાસે સ્પિનર આદિલ રાશિદ છે, જે બેટિંગ પણ કરે છે. એકંદરે, ઈંગ્લેન્ડે ખૂબ જ સંતુલિત પ્લેઈંગ ઈલેવન પસંદ કરી છે.
ઈંગ્લેન્ડની પ્લેઈંગ ઈલેવન: બેન ડકેટ, ફિલ સોલ્ટ, જોસ બટલર, હેરી બ્રૂક, લિયામ લિવિંગ્સ્ટન, જેકબ બેથલ, જેમી ઓવરટોન, ગસ એટકિન્સન, જોફ્રા આર્ચર, આદિલ રશીદ, માર્ક વૂડ. (All Photo Credit : PTI / ESPN)
Published On - 3:54 pm, Tue, 21 January 25
