Weather Update: એપ્રિલમાં ગરમીએ તોડ્યો 122 વર્ષનો રેકોર્ડ, હવામાન વિભાગે જણાવ્યું કે ક્યારે થશે વરસાદ
દિલ્હી, રાજસ્થાન, હરિયાણા અને ઉત્તર પ્રદેશ સહિત ઘણા રાજ્યોમાં લોકો તીવ્ર ગરમી સામે ઝઝૂમી રહ્યા છે. દરમિયાન, હવામાન વિભાગ (IMD) ના ડિરેક્ટર ડૉ. એમ. મહાપાત્રાએ દેશના હવામાન વિશે માહિતી આપી છે.
દેશમાં આ દિવસોમાં ગરમી રેકોર્ડ તોડી રહી છે. દિલ્હીમાં (Delhi Weather) શનિવારે બપોરે 12 વાગ્યે પારો 41 ડિગ્રી સેલ્સિયસ નોંધાયો છે. આ સાથે જ દેશના કેટલાક ભાગો એવા છે જ્યાં મહત્તમ તાપમાન 47 ડિગ્રીની નજીક પહોંચી ગયું છે. દિલ્હી, રાજસ્થાન, હરિયાણા અને ઉત્તર પ્રદેશ સહિત ઘણા રાજ્યોમાં લોકો તીવ્ર ગરમી સામે ઝઝૂમી રહ્યા છે. દરમિયાન, હવામાન વિભાગ (IMD) ના ડિરેક્ટર ડૉ. એમ. મહાપાત્રાએ દેશના હવામાન વિશે માહિતી આપી છે. તેમણે કહ્યું કે ભારતમાં ગરમીએ એપ્રિલમાં 122 વર્ષનો રેકોર્ડ તોડી નાખ્યો છે.
હવામાન વિભાગના નિયામકએ માહિતી આપી છે કે આ વર્ષે એપ્રિલમાં ઉત્તર પશ્ચિમ અને મધ્ય ભારતમાં સરેરાશ મહત્તમ તાપમાન અનુક્રમે 35.90 ડિગ્રી સેલ્સિયસ અને 37.78 ડિગ્રી સેલ્સિયસ સાથે છેલ્લા 122 વર્ષમાં સૌથી વધુ છે. તેમણે એ પણ માહિતી આપી છે કે પશ્ચિમ-મધ્ય અને ઉત્તર-પશ્ચિમ ભારતના મોટાભાગના ભાગો અને ઉત્તર-પૂર્વ ભારતના ઉત્તરીય ભાગોમાં મહત્તમ તાપમાન સામાન્ય કરતાં વધુ રહેવાની સંભાવના છે.
મે મહિનામાં સામાન્ય અથવા સામાન્યથી વધુ વરસાદની આગાહી
હવામાન વિભાગે વરસાદની પણ આગાહી કરી છે. IMD કહે છે કે મે મહિનામાં ઉત્તર-પશ્ચિમ અને ઉત્તરપૂર્વ ભારતના ભાગો તેમજ દૂર દક્ષિણ-પૂર્વ દ્વીપકલ્પમાં વરસાદ સામાન્ય કરતાં ઓછો રહેવાની શક્યતા છે. આ વિસ્તારોને બાદ કરતાં, ભારતના મોટાભાગના વિસ્તારોમાં સામાન્ય અથવા સામાન્ય કરતાં વધુ વરસાદ થવાની સંભાવના છે.
દિલ્હીમાં ઓરેન્જ એલર્ટ
દિલ્હીમાં છેલ્લા 72 વર્ષમાં આ બીજી વખત છે કે એપ્રિલ મહિનો આટલો ગરમ રહ્યો છે, જે દરમિયાન માસિક સરેરાશ મહત્તમ તાપમાન 40.2 ડિગ્રી સેલ્સિયસ નોંધાયું હતું. IMD અનુસાર, 2010માં દિલ્હીમાં સરેરાશ માસિક મહત્તમ તાપમાન 40.4 ડિગ્રી સેલ્સિયસ નોંધાયું હતું. IMD એ શનિવારે ‘ઓરેન્જ’ એલર્ટ જાહેર કર્યું છે, જેમાં દિલ્હીના ઘણા ભાગોમાં તીવ્ર ગરમીની ચેતવણી આપવામાં આવી છે.
રવિવારે વરસાદની શક્યતા
બીજી તરફ, IMDએ કહ્યું કે રવિવારે આંશિક વાદળછાયું આકાશ, હળવો વરસાદ અને ધૂળની ડમરીઓ સાથે, 50 કિમી પ્રતિ કલાકની ઝડપે પવન ફૂંકાવાની અપેક્ષા છે, જે ગરમીથી અસ્થાયી રાહત લાવી શકે છે. વેસ્ટર્ન ડિસ્ટર્બન્સના પ્રભાવ હેઠળ સોમવારથી ગરમીનું મોજું સમાપ્ત થવાની ધારણા છે, જે 1 મેની રાતથી ઉત્તર-પશ્ચિમ ભારતને અસર કરે તેવી શક્યતા છે.
આ પણ વાંચો : Patiala Violence: શિવસેના નેતા હરીશ સિંગલા બે દિવસની પોલીસ કસ્ટડીમાં, હિંસા ભડકાવવાનો છે આરોપ
આ પણ વાંચો : Navneet Rana: રાણા દંપતીની જામીન અરજી પર સોમવારે નિર્ણય આવશે, મુંબઈ સેશન્સ કોર્ટમાં સુનાવણી પૂર્ણ
વધુ સમાચાર વાંચવા માટે અમારી ટ્વીટર કોમ્યુનિટીમાં જોડાવા અહીં ક્લિક કરો
