Twisha Sharma Case : CCTV, AIIMS રેકોર્ડ અને સાસુના નિવેદનમાં વિસંગતતા, ત્વિષા શર્મા કેસમાં શું છે આ ટાઈમિંગનો ઝોલ?

Justice For Twisha: ભોપાલના ચર્ચિત ત્વિષા શર્મા મૃત્યુ કેસમાં દિવસેને દિવસે નવા સવાલો ઉભા થઈ રહ્યા છે. ભૂતપૂર્વ જિલ્લા ન્યાયાધીશ ગિરીબાલા સિંહની પુત્રવધૂ ત્વિષા શર્માના શંકાસ્પદ મૃત્યુને હવે આઠ દિવસથી વધુ સમય વીતી ગયો છે, છતાં પરિવાર દ્વારા અંતિમ સંસ્કાર કરવામાં આવ્યા નથી. ત્વિષાનો મૃતદેહ હાલ પણ AIIMS ભોપાલના શબઘરમાં રાખવામાં આવ્યો છે. પરિવાર બીજી વખત પોસ્ટમોર્ટમ અને સમગ્ર કેસની CBI તપાસની માંગ પર અડગ છે. સૌથી મોટો પ્રશ્ન હાલ ત્વિષાના મૃત્યુના ચોક્કસ સમયને લઈને ઊભો થયો છે.

આ કેસમાં CCTV ફૂટેજ, પોસ્ટમોર્ટમ રિપોર્ટ, હોસ્પિટલના રેકોર્ડ અને પરિવારના નિવેદનો વચ્ચે ગંભીર વિસંગતતા સામે આવી છે. ત્વિષાના સાસુ અને નિવૃત્ત ન્યાયાધીશ ગિરીબાલા સિંહે મીડિયા ઇન્ટરવ્યુમાં જણાવ્યું હતું કે ઘટના બનેલી રાત્રે લગભગ 10:10 વાગ્યે તેમને ત્વિષાની માતાનો ફોન આવ્યો હતો. ત્યારબાદ પરિવાર ત્વિષાને રાત્રે 10:50 વાગ્યે AIIMS હોસ્પિટલ લઈ ગયો હતો, જ્યાં ડોક્ટરોએ તેને મૃત જાહેર કરી હતી.

ત્વિષાનો મૃતદેહ રાત્રે 12:05 વાગ્યે હોસ્પિટલમાં પહોંચાડવામાં આવ્યો

પરંતુ AIIMSના પોસ્ટમોર્ટમ રિપોર્ટમાં અલગ જ વિગતો સામે આવી છે. રિપોર્ટ મુજબ ત્વિષાનો મૃતદેહ રાત્રે 12:05 વાગ્યે હોસ્પિટલમાં પહોંચાડવામાં આવ્યો હતો. બીજી તરફ, પોલીસ તપાસ અનુસાર ત્વિષા 12 મેની રાત્રે લગભગ 10:26 વાગ્યે ઘરની છત પર જિમ્નાસ્ટિક રિંગથી બનાવેલા દોરડાથી લટકતી હાલતમાં મળી આવી હતી.

ત્વિષાના પરિવારનો દાવો છે કે તે રાત્રે 9:41 વાગ્યા સુધી પોતાની માતા સાથે ફોન પર વાત કરી રહી હતી. આ દાવા પછી પ્રશ્ન ઊભો થાય છે કે જો ત્વિષા 9:41 સુધી જીવિત હતી, તો પછી તેનું મૃત્યુ ખરેખર ક્યારે થયું?

CCTV માં 8:19 વાગ્યે ત્રણ લોકો તેના મૃતદેહને નીચે લાવતા દેખાય

આ સમગ્ર મામલે સૌથી વધુ ચર્ચામાં રહેલું CCTV ફૂટેજ પણ અનેક સવાલો ઉભા કરી રહ્યું છે. ફૂટેજમાં ત્વિષા સાંજે 7:20 વાગ્યે એકલી છત પર જતી જોવા મળે છે. ત્યારબાદ રાત્રે 8:19 વાગ્યે ત્રણ લોકો તેના મૃતદેહને નીચે લાવતા દેખાય છે. હવે સૌથી મોટો સવાલ એ છે કે જો મૃતદેહ 8:19 વાગ્યે નીચે લાવવામાં આવ્યો હતો, તો પછી હોસ્પિટલ સુધી પહોંચવામાં અને મૃત્યુ જાહેર કરવામાં એટલો મોટો સમયગાળો કેમ લાગ્યો?

ફૂટેજમાં દેખાતા ત્રણ લોકો કોણ હતા અને તેમની પૂછપરછ થઈ છે કે નહીં તે બાબતે પણ હજી સુધી કોઈ સ્પષ્ટ માહિતી સામે આવી નથી. પરિવારનો આરોપ છે કે તપાસ દરમિયાન અનેક મહત્વપૂર્ણ વિગતો લોકોથી છુપાવવામાં આવી રહી છે.

સાયબર નિષ્ણાત ચતક વાજપેયીનું કહેવું છે કે CCTV કેમેરામાં સમયનો તફાવત ટેકનિકલ ગડબડ અથવા સેટિંગ ભૂલને કારણે થઈ શકે છે, પરંતુ ફૂટેજ સાથે છેડછાડની શક્યતા પણ નકારી શકાતી નથી. તેમના મતે, સાચી સમયરેખા જાણવા માટે DVR અને CCTV સિસ્ટમની ફોરેન્સિક તપાસ જરૂરી છે.

આ દરમિયાન કેસનો મુખ્ય આરોપી અને ત્વિષાનો પતિ સમર્થ સિંહ હજુ સુધી ફરાર છે. પોલીસે તેની સામે ધરપકડ વોરંટ જાહેર કર્યો છે અને તેની માહિતી આપનારને 10 હજાર રૂપિયાનું ઇનામ જાહેર કરવામાં આવ્યું છે. પરિવારએ પોલીસ કમિશનરને સમર્થ સિંહની મિલકત જપ્ત કરવાની પણ માંગ કરી છે.

ડિજિટલ પુરાવા અને CCTV ફૂટેજની નિષ્પક્ષ તપાસની માંગ

ત્વિષાના પિતાએ પોલીસ પર ગંભીર બેદરકારીના આરોપ લગાવ્યા છે. તેમના જણાવ્યા મુજબ 15 મેના રોજ કેસ નોંધાયા બાદ પણ પોલીસે સમયસર પાસપોર્ટ ઓફિસને જાણ કરી નહોતી, જેના કારણે આરોપીને દેશ છોડવાની તક મળી ગઈ. પરિવાર હવે કોલ રેકોર્ડ, ડિજિટલ પુરાવા અને CCTV ફૂટેજની નિષ્પક્ષ તપાસની માંગ કરી રહ્યો છે.

પ્રેસ કોન્ફરન્સ દરમિયાન ત્વિષાના પિતા અને ભાઈએ પણ અનેક ગંભીર મુદ્દાઓ ઉઠાવ્યા હતા. તેમણે આરોપ લગાવ્યો હતો કે જે વ્યક્તિ હવે આ દુનિયામાં નથી, તેની છબીને ખોટી રીતે બદનામ કરવાનો પ્રયાસ કરવામાં આવી રહ્યો છે.

પોલીસ તપાસમાં ત્વિષાના ગળા પર મળેલા નિશાન અને ઘટનાસ્થળેથી જપ્ત કરાયેલા નાયલોન બેલ્ટ વચ્ચે સમાનતા હોવાનો દાવો કરવામાં આવ્યો છે. બીજી તરફ, ગિરીબાલા સિંહ દ્વારા ત્વિષાના ખાતામાં 7 લાખ રૂપિયા ટ્રાન્સફર કર્યાનો દાવો પણ હવે વિવાદમાં આવ્યો છે. પરિવારનું કહેવું છે કે આ રકમ ઘરખર્ચ માટે નહીં પરંતુ સમર્થ સિંહના વ્યક્તિગત ખર્ચ અને પેઇન્ટિંગ સામગ્રી માટે આપવામાં આવી હતી.

હાલ સમગ્ર કેસ અનેક સવાલો અને રહસ્યો વચ્ચે ઘેરાયેલો છે. ત્વિષાના અંતિમ સંસ્કાર હજુ સુધી થયા નથી અને તેના મૃત્યુનો સાચો સમય, CCTV ફૂટેજની હકીકત અને ઘટનાની રાત્રે શું બન્યું હતું તે અંગેનું સત્ય બહાર આવવાનું બાકી છે.