શ્રીનગરમાં 33 વર્ષ બાદ શિયા મુસ્લિમોએ કાઢ્યું મોહર્રમનું જુલૂસ, કેમ લગાવાયો હતો અત્યાર સુધી પ્રતિબંધ, જાણો સંપૂર્ણ વિગત

જમ્મુ અને કાશ્મીરના શ્રીનગરમાં ગુરુવારે શિયા સમુદાયે મોહરમના 8મા દિવસે જુલૂસ કાઢ્યું હતું. લગભગ 3 દાયકા પછી આવું બન્યું છે જ્યારે શિયા સમુદાયે અહીં મોહરમનું જુલૂસ કાઢ્યું છે. 1989 પછી કાશ્મીરમાં બગડતી પરિસ્થિતિને કારણે, મોહરમના જુલૂસને હજુ સુધી મંજૂરી આપવામાં આવી ન હતી, પરંતુ આ વખતે શિયાઓના પ્રયત્નોને સફળતા મળી અને લેફ્ટનન્ટ ગવર્નર દ્વારા કડક સુરક્ષા હેઠળ શરતી સરઘસ કાઢવાની મંજૂરી આપવામાં આવી.

કાશ્મીરના ડિવિઝનલ કમિશનર વિજય કુમારનું કહેવું છે કે, શિયાઓને 33 વર્ષ પછી આ તક મળી છે, તેઓ શ્રીનગરના ગુરુ બજારથી દાલ ગેટ સુધી એક જુલૂસ કાઢવા માંગતા હતા, હવે તેમને મંજૂરી મળી ગઈ છે. તેમણે કહ્યું કે શિયા ભાઈઓની ભાવનાઓનું ધ્યાન રાખવામાં આવ્યું છે અને લાંબા મંથન પછી તેને મંજૂરી આપવામાં આવી છે. વહીવટીતંત્રે જુલૂસ માટે નિયત રૂટ, સમય અને કેટલીક શરતો આગળ મૂકી હતી, જેને આયોજકોએ સ્વીકારી હતી.

તમને જણાવી દઈએ કે 1989માં જ મોહરમ નિમિત્તે શિયાઓના જુલૂસ પર પ્રતિબંધ લગાવી દેવામાં આવ્યો હતો. કારણ કે 1989માં 8મા મહોરમના રોજ કેટલાક આતંકવાદીઓ જુલૂસમાં ઘૂસ્યા હતા, જેના કારણે ભારે હંગામો થયો હતો. ત્યારબાદ આતંકવાદીઓનું હાજી ગ્રુપ એટલે કે હમીદ શેખ, અશફાક મજીદ, જાવેદ મીર અને યાસીન મલિક તેમાં જોડાયા હતા. કાશ્મીરમાં બગડતી પરિસ્થિતિને જોતા તત્કાલીન રાજ્યપાલ જગમોહને સરઘસ પર જ પ્રતિબંધ લગાવી દીધો હતો.

વાસ્તવમાં સુરક્ષા એજન્સીઓ માટે એવો પણ ભય હતો કે, આતંકવાદીઓ આવા સરઘસોને નિશાન બનાવી શકે છે. ભૂતકાળમાં પણ શિયા સમુદાયને નિશાન બનાવવામાં આવ્યા છે, તેથી સુરક્ષા એજન્સીઓ આ અંગે કોઈ જોખમ લેવા માંગતી ન હતી. દરમિયાન નાના પાયે જુલૂસ નીકળતા રહ્યા છે, પરંતુ 8મા મોહરમ અને 10મા મોહરમ નિમિત્તે જુલૂસ કાઢવા પર પ્રતિબંધ હતો.

જમ્મુ-કાશ્મીરના લેફ્ટનન્ટ ગવર્નર મનોજ સિન્હાએ આ પ્રસંગે કહ્યું કે, રાજ્યમાં શેરી હિંસાનો અંત આવ્યો છે અને શાંતિનો નવો યુગ શરૂ થયો છે. તેમણે કહ્યું કે રાજ્યમાં ધાર્મિક કાર્યક્રમો પર કોઈપણ પ્રકારની રાજનીતિ કરવી યોગ્ય નથી. જમ્મુ-કાશ્મીરના પૂર્વ મુખ્યમંત્રી ઓમર અબ્દુલ્લાએ પણ આ નિર્ણયને આવકાર્યો છે.

દેશના તમામ સમાચાર વાંચવા માટે અહીં ક્લિક કરો