ટ્રમ્પ સાથેની મુલાકાત પહેલા ભારતને લઈને પુતિને આપ્યા આ સંકેત, સ્વતંત્રતા દિવસની શુભેચ્છા સાથે કહી આ મોટી વાત

રશિયન રાષ્ટ્રપતિ વ્લાદિમીર પુતિને ભારતને તેના 79મા સ્વતંત્રતા દિવસ પર શુભેચ્છા પાઠવી છે. ભારતીય નેતૃત્વને મોકલેલા સંદેશમાં, પુતિને ભારતની પ્રશંસા કરી અને કહ્યું કે તેનું સમગ્ર વિશ્વમાં સન્માન કરવામાં આવે છે. રશિયન રાષ્ટ્રપતિએ કહ્યું કે ભારત વૈશ્વિક મુદ્દાઓના ઉકેલમાં મહત્વપૂર્ણ ભૂમિકા ભજવે છે. તેમણે ભારત સાથે રશિયાની વિશેષાધિકૃત વ્યૂહાત્મક ભાગીદારી પર ભાર મૂક્યો. રશિયન રાષ્ટ્રપતિ આજે શુક્રવાર 15 ઓગસ્ટે યુક્રેન યુદ્ધ પર ચર્ચા કરવા માટે અમેરિકાના અલાસ્કામાં ડોનાલ્ડ ટ્રમ્પને મળવાના છે. એ પહેલા તેમણે ભારત માટે આ વાત એક સાંકેતિક સ્વરૂપે પણ કહી હોવાનું મનાઈ રહ્યુ છે કારણ કે ભારત પહેલેથી જ રશિયાનું મિત્ર રહ્યુ છે.

રાષ્ટ્રપતિ દ્રૌપદી મુર્મુ અને પીએમ મોદીને મોકલેલા સંદેશમાં, પુતિને લખ્યું, ભારતે સામાજિક-આર્થિક, વૈજ્ઞાનિક, તકનીકી અને અન્ય ક્ષેત્રોમાં વ્યાપકપણે માન્યતા પ્રાપ્ત સફળતાઓ પ્રાપ્ત કરી છે. તમારા દેશને વૈશ્વિક મંચ પર યોગ્ય સન્માન પ્રાપ્ત છે અને આંતરરાષ્ટ્રીય એજન્ડાના મુખ્ય મુદ્દાઓમાં સક્રિયપણે યોગદાન આપે છે.

ભારત સાથે ભાગીદારીને મહત્વપૂર્ણ ગણાવી

પુતિને વધુમાં કહ્યું કે રશિયા ભારત સાથેની તેની ખાસ, વિશેષાધિકૃત વ્યૂહાત્મક ભાગીદારીને ખૂબ મહત્વ આપે છે. ‘મને વિશ્વાસ છે કે અમારા સંયુક્ત પ્રયાસો દ્વારા અમે વિવિધ ક્ષેત્રોમાં રચનાત્મક દ્વિપક્ષીય સહયોગને વિસ્તૃત કરવાનું ચાલુ રાખીશું. આ અમારા મૈત્રીપૂર્ણ લોકોના હિત સાથે સંપૂર્ણપણે સુસંગત છે અને પ્રાદેશિક અને વૈશ્વિક સ્તરે સુરક્ષા અને સ્થિરતાને મજબૂત બનાવવામાં સહાયક છે.’

ભારત 15 ઓગસ્ટે ગર્વ અને ઉત્સાહ સાથે તેનો 79મો સ્વતંત્રતા દિવસ ઉજવી રહ્યું છે. અગાઉ, અમેરિકાએ પણ ભારતને સ્વતંત્રતા દિવસની શુભેચ્છા પાઠવી હતી. યુએસ સેક્રેટરી ઓફ સ્ટેટ માર્કો રુબિયોએ તેમના અભિનંદન સંદેશમાં ભારત અને અમેરિકા વચ્ચેના સંબંધોને ઐતિહાસિક ગણાવ્યા હતા. તેમણે તેને મહત્વપૂર્ણ અને દૂરગામી પણ ગણાવ્યા હતા. તેમણે અમેરિકા અને ભારત વચ્ચેની વ્યૂહાત્મક ભાગીદારીનો પણ ઉલ્લેખ કર્યો હતો.

PUBG ના રસિયાઓને ઝટકો, હવેથી આ ડિવાઈસ પર નહીં રમી શકે ગેમ, 13 નવેમ્બરથી થશે મોટા ફેરફાર