Breaking News : PM મોદીનું રાષ્ટ્રને સંબોધન, કહ્યું.. મહિલા આરક્ષણનો વિરોધ કરી જે પાપ વિપક્ષે કર્યું છે તેની સજા તેમને મળશે 

લોકસભામાં મહિલા અનામત બિલ સંબંધિત બંધારણીય સુધારા વિધેયક પાસ થઈ શક્યું નથી. આ પછી વડાપ્રધાન Narendra Modi પહેલીવાર દેશને સંબોધિત કરી રહ્યા છે. અગાઉ તેમણે બિલ પાસ ન થવાની જવાબદારી વિપક્ષ પર મૂકેલી હતી, જ્યારે હવે તેઓ પોતાના સંબોધનમાં આ મુદ્દા પર ખુલ્લેઆમ ચર્ચા કરી રહ્યા છે.

મહિલા અનામત માટેનું 131મું બંધારણીય સુધારા બિલ પાસ કરવા માટે લોકસભામાં બે તૃતીયાંશ બહુમતી જરૂરી હતી. આ બિલ પર કુલ 528 મતદાન થયા હતા. બિલ પસાર કરવા માટે સરકારને 352 મતની જરૂર હતી, પરંતુ તેને માત્ર 298 મત મળ્યા. પરિણામે, 54 મત ઓછા પડતાં આ બિલ લોકસભામાં પાસ થઈ શક્યું નથી.

લોકસભામાં મહિલા અનામત સંબંધિત બંધારણીય સુધારા વિધેયક પારીત ન થતાં વડાપ્રધાન Narendra Modiએ આ માટે વિપક્ષને જવાબદાર ઠેરવ્યો. તેમણે જણાવ્યું કે વિપક્ષે પોતાના સ્વાર્થને કારણે આ બિલ પસાર થવા દીધું નથી.

પીએમ મોદીએ વધુમાં કહ્યું કે દેશની નારી શક્તિ બધું જોઈ રહી છે. તે ઘણી બાબતો ભૂલી શકે છે, પરંતુ પોતાના અપમાનને ક્યારેય ભૂલતી નથી. બિલ પારીત ન થતા તેમને દુઃખ થયું હોવાનું પણ તેમણે વ્યક્ત કર્યું.

વિપક્ષે મહિલાઓના સપના કચડી નાખ્યા: પીએમ મોદી

વડાપ્રધાન Narendra Modiએ પોતાના સંબોધનમાં કહ્યું, “આજે હું મારી બહેનો અને દીકરીઓ સાથે વાત કરવા આવ્યો છું. આજે દેશનો દરેક નાગરિક જોઈ રહ્યો છે કે ભારતની મહિલા શક્તિની ઉડાન કેવી રીતે અટકાવવામાં આવી છે. તેમના સપનાઓને કચડી નાખવામાં આવ્યા છે. અમારા શ્રેષ્ઠ પ્રયાસો છતાં, અમે સફળ થઈ શક્યા નથી. ‘નારી શક્તિ વંદન’ કાયદો સંસદમાં પાસ થઈ શક્યો નથી. હું આ માટે દેશની બધી માતાઓ અને બહેનો પાસે માફી માગું છું.”

અમારા માટે રાષ્ટ્રીય હિત સર્વોપરી છે: પ્રધાનમંત્રી

તેમણે આગળ કહ્યું, “અમારા માટે રાષ્ટ્રીય હિત સર્વોપરી છે. પરંતુ જ્યારે કેટલાક લોકો માટે પક્ષનું હિત જ સર્વસ્વ બની જાય છે, અને તે રાષ્ટ્રીય હિત કરતાં મોટું બની જાય છે, ત્યારે મહિલા શક્તિ અને દેશના હિતને નુકસાન સહન કરવું પડે છે. આ વખતે પણ આવું જ બન્યું છે. કોંગ્રેસ, ડીએમકે, ટીએમસી અને સમાજવાદી પાર્ટી જેવા પક્ષોના સ્વાર્થી રાજકારણનો ભોગ દેશની મહિલાઓને બનવું પડ્યું છે.”

મને આશા હતી કે કોંગ્રેસ પોતાની ભૂતકાળની ભૂલો સુધારશે

વડાપ્રધાન Narendra Modiએ જણાવ્યું, “મને આશા હતી કે કોંગ્રેસ પોતાની ભૂતકાળની ભૂલો સુધારશે અને પોતાના પાપોનું પ્રાયશ્ચિત કરશે, પરંતુ તેણે આ તક ગુમાવી દીધી. એક પરોપજીવીની જેમ કોંગ્રેસ પ્રાદેશિક પક્ષોની પીઠ પર સવારી કરીને ટકી રહેવાનો પ્રયાસ કરી રહી છે.”

કોંગ્રેસ અને તેના સાથી પક્ષો સતત સીમાંકન પર જૂઠું બોલી રહ્યા છે

તેમણે આગળ કહ્યું, “કોંગ્રેસ વિવિધ યુક્તિઓનો ઉપયોગ કરીને મહિલાઓના અધિકારો છીનવી રહી છે. દેશ હવે આ પ્રકારના રાજકારણને સમજી ગયો છે. વિપક્ષ ક્યારેય નહીં ઈચ્છે કે તેમના પોતાના પરિવારની મહિલાઓ સિવાય અન્ય મહિલાઓ પણ પ્રગતિ કરે. પરિવારવાદી રાજકારણમાં અસુરક્ષાની ભાવના રહેલી હોય છે.”

પીએમ મોદીએ વધુમાં ઉમેર્યું, “સીમાંકન પછી મહિલાઓ માટે વધુ બેઠકો મળશે અને તેમનો પ્રભાવ વધશે, જેના કારણે આ બિલનો વિરોધ કરવામાં આવ્યો છે. દેશની મહિલાઓ કોંગ્રેસ અને તેના સાથીઓને માફ નહીં કરે. કોંગ્રેસ અને તેના સાથીઓ સીમાંકન મુદ્દે સતત ખોટી માહિતી ફેલાવી રહ્યા છે. તેઓ સમાજમાં વિભાજન પેદા કરવા માંગે છે. ‘ભાગલા પાડો અને શાસન કરો’ જેવી નીતિ કોંગ્રેસે અંગ્રેજોથી શીખી છે અને તે આજે પણ તેનો અમલ કરે છે, જેના કારણે દેશમાં વિભાજનજનક ભાવનાઓ ઉભી થાય છે.”