કારતકમાં મેઘાનુ મંડાણ ! હવામાન વિભાગે દક્ષિણ આંધ્રપ્રદેશમાં ભારે વરસાદની કરી આગાહી
હવામાન વિભાગની આગાહી અનુસાર, આગામી ત્રણથી ચાર દિવસ સુધી રાયલસીમા અને દક્ષિણ તટીય આંધ્રના ભાગો, ખાસ કરીને ચિત્તૂર અને નેલ્લોરમાં ભારેથી અતિભારે વરસાદ પડી શકે છે.
Rain : ગયા અઠવાડિયે આંધ્રપ્રદેશમાં પડેલા ભારે વરસાદ બાદ રાજ્યના દક્ષિણ કોસ્ટલ અને રાયલસીમા જિલ્લામાં સ્થિતિ હવે સામાન્ય થઈ રહી છે. જો કે, ભારતીય હવામાન વિભાગે (India Meteorological Department)શુક્રવારે માહિતી આપી હતી કે, આ ક્ષેત્રમાં 2 ડિસેમ્બર સુધી ભારે વરસાદ થવાની સંભાવના છે. શુક્રવારે સવારે થોડા કલાકો સુધી ચિત્તૂરના કેટલાક ભાગોમાં હળવો વરસાદ ચાલુ રહ્યો હતો. જ્યારે તમિલનાડુની (Tamil Nadu) સરહદે આવેલા કેટલાક શહેરોમાં મહત્તમ 2 મીમી વરસાદ નોંધાયો હતો.
જિલ્લાના અધિકારીઓ હાઈ એલર્ટ પર
ઉપરાંત રેનિગુંટામાં શુક્રવાર સાંજ સુધીમાં 0.5 મીમી વરસાદ ખાબક્યો હતો. હવામાન વિભાગના આગાહી અનુસાર, આગામી ત્રણથી ચાર દિવસમાં રાયલસીમા અને દક્ષિણ તટીય આંધ્રના ભાગો, ખાસ કરીને ચિત્તૂર અને નેલ્લોરમાં ભારેથી અતિભારે વરસાદ પડી શકે છે. આંધ્રપ્રદેશમાં તાજેતરના ભારે વરસાદને કારણે નીચાણવાળા વિસ્તારોના ગામોમાં પહેલેથી જ સ્થિતિ વણસી છે. ત્યારે હાલ આગાહીને પગલે રાજ્ય સરકારે જિલ્લાના અધિકારીઓને હાઈ એલર્ટ પર રાખ્યા છે.
ઘણા જિલ્લા પૂરથી પ્રભાવિત થયા
આંધ્રપ્રદેશના મુખ્ય પ્રધાન વાયએસ જગન મોહન રેડ્ડીએ (YS Jagan Mohan Reddy)શુક્રવારે રાજ્ય વિધાનસભામાં જણાવ્યું હતું કે, તેમની સરકાર વિલંબ કર્યા વિના પૂર પ્રભાવિત વિસ્તારોમાં તમામ રાહત અને બચાવ પગલાં લઈ રહી છે. વધુમાં રેડ્ડીએ કહ્યું હતુ કે, કુડ્ડાપાહ, ચિત્તૂર, અનંતપુર અને નેલ્લોર જિલ્લાઓ પહેલાની જેમ ભારે વરસાદ અને પૂરથી ખરાબ રીતે પ્રભાવિત થયા છે. તમામ જિલ્લા અધિકારીઓ રાહત કાર્યમાં સામેલ છે અને સંબંધિત વિસ્તારોના મંત્રીઓ અને ચૂંટાયેલા પ્રતિનિધિઓ દ્વારા પણ તેમની દેખરેખ રાખવામાં આવી રહી છે.
દ્વીપકલ્પીય ભારતમાં 143.4 ટકા વધુ વરસાદ
બીજી તરફ દ્વીપકલ્પીય ભારતમાં 1 નવેમ્બરથી 25 નવેમ્બર વચ્ચે 143.4 ટકા વધુ વરસાદ નોંધાયો હતો. અવિરત વરસાદને પગલે આ વિસ્તારમાં ભારે નુકસાન થયું હતું. ભારતીય હવામાન વિભાગના (IMD)જણાવ્યા અનુસાર, 1 ઓક્ટોબરથી 25 નવેમ્બરની વચ્ચે 63 ટકા વધારાનો વરસાદ થયો છે. જ્યારે 1 ઓક્ટોબરથી પૂર્વોત્તર ચોમાસા દરમિયાન તમિલનાડુમાં 61 ટકા, પુડુચેરીમાં 83, કર્ણાટકમાં 105 અને કેરળમાં 110 ટકા વધુ વરસાદ નોંધાયો છે. ચેન્નાઈ અને આંધ્રપ્રદેશના રાયલસીમાના ભાગોમાં વરસાદને કારણે હાલ પૂરની સ્થિતિ જોવા મળી રહી છે.
આ પણ વાંચો : Covid-19 Variant : ખુબ ઝડપથી ફેલાતા વેરિયન્ટે વધારી ચિંતા, WHO એ કોવિડ-19 નવા વેરિયન્ટને નામ આપ્યુ ‘ઓમિક્રોન’