Breaking News : જમ્મુ-કાશ્મીરના ગુલમર્ગમાં વિસ્ફોટ, એકનું મોત, અનેક ઘાયલ

ઉત્તર કાશ્મીરના ગુલમર્ગ સેક્ટરમાં નિયંત્રણ રેખા (LoC) નજીક શનિવારે બપોરે શેલ બ્લાસ્ટની દુર્ઘટના સર્જાઈ હતી. આ ઘટનામાં એક વ્યક્તિનું ઘટનાસ્થળે જ મોત થયું છે, જ્યારે અનેક લોકો ઘાયલ થયા હોવાનું જાણવા મળ્યું છે. પ્રાથમિક તપાસ મુજબ વિસ્ફોટ અગાઉના સમયનો ન ફૂટેલો મોર્ટાર શેલ હોવાની આશંકા વ્યક્ત કરવામાં આવી રહી છે.

આ ઘટના બારામુલા જિલ્લાના ગુલમર્ગ સેક્ટરમાં આશા પોસ્ટ વિસ્તારના સુમલોવાલી ડોક નજીક બની હતી. મૃતકની ઓળખ બારામુલા જિલ્લાના ચંદુસા વિસ્તારના રહેવાસી ઝુબૈર અહેમદ બજાદ તરીકે થઈ છે.

મળતી માહિતી અનુસાર, નાગરિકોનો એક જૂથ તે વિસ્તારમાં હાજર હતો ત્યારે જમીનમાં પડેલો જૂનો શેલ અચાનક વિસ્ફોટ થયો હતો. વિસ્ફોટ એટલો જોરદાર હતો કે ઝુબૈર અહેમદનું સ્થળ પર જ મોત થયું, જ્યારે અન્ય અનેક લોકો ઇજાગ્રસ્ત થયા. તમામ ઘાયલોને તાત્કાલિક સારવાર માટે નજીકની હોસ્પિટલમાં ખસેડવામાં આવ્યા છે. જોકે તેમની હાલની સ્થિતિ અંગે હજુ સુધી સત્તાવાર માહિતી જાહેર કરવામાં આવી નથી.

ઘટનાની જાણ થતાં જ પોલીસ અને સુરક્ષા દળોની ટીમો સ્થળ પર પહોંચી ગઈ હતી અને સમગ્ર વિસ્તારને સુરક્ષિત બનાવી તપાસ શરૂ કરી હતી. અધિકારીઓનું માનવું છે કે આ શેલ ભૂતકાળની લશ્કરી કાર્યવાહી દરમિયાનનો ન ફૂટેલો દારૂગોળો હોઈ શકે છે. નિયંત્રણ રેખા નજીક આવા વિસ્ફોટક અવશેષો ક્યારેક મળી આવતા હોવાથી સ્થાનિક નાગરિકો માટે જોખમ ઊભું થાય છે.

આ દરમિયાન સોશિયલ મીડિયા પર આશા પોસ્ટ વિસ્તારમાં સૈન્યના જવાનો ઘાયલ થયા હોવાના દાવાઓ પણ સામે આવ્યા હતા. જોકે બારામુલા પોલીસે આ તમામ દાવાઓને સંપૂર્ણપણે ખોટા અને પાયાવિહોણા ગણાવીને ફગાવી દીધા છે.

પોલીસે પોતાના સત્તાવાર નિવેદનમાં સ્પષ્ટ કર્યું છે કે આશા પોસ્ટ પર કોઈપણ સૈન્ય કર્મચારીને ઇજા પહોંચી નથી. સાથે જ લોકોએ અફવાઓ પર વિશ્વાસ ન કરવા અને માત્ર સત્તાવાર માહિતી પર જ ભરોસો રાખવાની અપીલ કરવામાં આવી છે.

બારામુલા પોલીસે વધુમાં ચેતવણી આપી છે કે સોશિયલ મીડિયા અથવા અન્ય માધ્યમો દ્વારા ખોટી માહિતી ફેલાવીને લોકોમાં ગેરસમજ ઊભી કરનારાઓ સામે કાયદાકીય કાર્યવાહી કરવામાં આવશે. પોલીસે જણાવ્યું કે જાહેર શાંતિ જાળવવા, પારદર્શિતા સુનિશ્ચિત કરવા અને સમયસર સચોટ માહિતી પહોંચાડવા માટે તેઓ પ્રતિબદ્ધ છે.

જમ્મુ કાશ્મીરના અનેક વિસ્તારોમાં ભૂકંપના આંચકા અનુભવાયા, કેન્દ્રબિંદુ અફઘાનિસ્તાન