દિલ્હીના પૂર્વ આરોગ્ય પ્રધાન સૌરભ ભારદ્વાજના ઘરે ત્રાટકી ED, હોસ્પિટલ બાંધકામ કૌભાંડમાં પાડ્યા દરોડા

ED એ આજે મંગળવારે સવારે દિલ્હીના આમ આદમી પાર્ટીના નેતા સૌરભ ભારદ્વાજના ઘરે દરોડા પાડ્યા છે. ED એ હોસ્પિટલ બાંધકામ કૌભાંડમાં નેતા સૌરભ ભારદ્વાજ સામે કાર્યવાહી કરી છે. AAP નેતા સૌરભ ભારદ્વાજ સામે જે કૌભાંડને કારણે કાર્યવાહી કરવામાં આવી છે તે હોસ્પિટલ બાંધકામ કૌભાંડ સાથે સંબંધિત છે. આ હોસ્પિટલ બાંધકામ કૌભાંડ લગભગ 5,590 કરોડનું છે.

વર્ષ 2018-19 માં, દિલ્હી સરકારે 24 હોસ્પિટલોના નિર્માણ માટે રૂપિયા 5,590 કરોડના પ્રોજેક્ટ્સને મંજૂરી આપી હતી. ICU હોસ્પિટલ 6 મહિનામાં બનાવવાની હતી, પરંતુ 3 વર્ષ પછી પણ હોસ્પિટલનું કામ અધૂરું રહ્યું. આમાંના ઘણા પ્રોજેક્ટ્સ પર ગંભીર ગેરરીતિઓનો આરોપ મૂકવામાં આવ્યો છે.

શું આરોપો છે?

• આ પ્રોજેક્ટ્સમાં ગંભીર ગેરરીતિઓના આરોપો છે.
• આ પ્રોજેક્ટ્સ 6 મહિનામાં પૂર્ણ થવાના હતા, પરંતુ 3 વર્ષ પછી પણ મોટાભાગનું કામ અધૂરું છે.
• 800 કરોડ ખર્ચવા છતાં, માત્ર 50% કામ પૂર્ણ થયું.
• LNJP હોસ્પિટલનો ખર્ચ 488 કરોડ રૂપિયાથી વધીને 1,135 કરોડ રૂપિયા થયો, કોઈ નક્કર પ્રગતિ વિના.
• ઘણી જગ્યાએ મંજૂરી વિના બાંધકામ શરૂ કરવામાં આવ્યું હતું અને કોન્ટ્રાક્ટરોની ભૂમિકા શંકાસ્પદ જણાઈ હતી.
• હોસ્પિટલ ઇન્ફર્મેશન મેનેજમેન્ટ સિસ્ટમ (HIMS) 2016 થી પેન્ડિંગ છે, જેમાં ઇરાદાપૂર્વક વિલંબ થયો હોવાનો આરોપ છે.

આ કેસમાં ભૂતપૂર્વ આરોગ્ય પ્રધાન સૌરભ ભારદ્વાજ અને સત્યેન્દ્ર જૈન તપાસ હેઠળ છે. ED એ આ અંગે પોતાનો ECIR દાખલ કર્યો હતો.

હકીકતમાં, કેન્દ્રીય ગૃહ મંત્રાલયે જૂનમાં ACB (ભ્રષ્ટાચાર વિરોધી શાખા) ને કથિત હોસ્પિટલ પ્રોજેક્ટ કૌભાંડની તપાસ માટે પરવાનગી આપી હતી. આ કૌભાંડ હોસ્પિટલ પ્રોજેક્ટમાં થયેલા વિલંબ સાથે સંબંધિત છે. ભ્રષ્ટાચાર નિવારણ કાયદા હેઠળ દિલ્હીના ભૂતપૂર્વ આરોગ્ય પ્રધાન સૌરભ ભારદ્વાજ અને સત્યેન્દ્ર જૈન સામે આ તપાસ ચાલી રહી છે.

ભાજપ નેતા વિજેન્દ્ર ગુપ્તાએ ફરિયાદ કરી હતી

ભાજપ નેતા વિજેન્દ્ર ગુપ્તાની ફરિયાદ બાદ આ તપાસ શરૂ થઈ છે, જે તેમણે ગયા વર્ષે ઓગસ્ટમાં કરી હતી. ગુપ્તાએ આરોપ લગાવ્યો હતો કે દિલ્હી સરકારના આરોગ્ય વિભાગમાં ભ્રષ્ટાચાર છે અને તત્કાલીન મંત્રીઓ સૌરભ ભારદ્વાજ અને સત્યેન્દ્ર જૈન પણ તેમાં સામેલ હતા.

અધિકારીઓના જણાવ્યા અનુસાર, ફરિયાદની પ્રારંભિક તપાસમાં, ACB એ શોધી કાઢ્યું કે પ્રોજેક્ટ્સની કિંમત સતત વધારી દેવામાં આવી હતી, વિભાગ તરફથી ઇરાદાપૂર્વક વિલંબ કરવામાં આવ્યો હતો, ઓછા ખર્ચાળ ઉકેલો નકારવામાં આવ્યા હતા, ભંડોળનો દુરુપયોગ કરવામાં આવ્યો હતો.

ACB એ આ બધાને અનિયમિતતાઓ અને ભ્રષ્ટ પ્રવૃત્તિઓની વ્યૂહરચના અને પેટર્ન તરીકે વર્ણવ્યા હતા, જેના કારણે સરકારી તિજોરીને ભારે નુકસાન થયું હતું. જો કે, AAP એ આ આરોપોને નકારી કાઢ્યા હતા અને કહ્યું હતું કે આ નિયમિત પ્રોજેક્ટ વિલંબને રાજકીય હથિયાર બનાવવાનો પ્રયાસ છે.

દેશ અને દુનિયાના તમામ સમાચારો વાંચવા માટે અહીં ક્લિક કરો