Breaking News : અમદાવાદમાં થઈ સુરતવાળી! AMCના નામે ખાનગી વ્યક્તિઓ દ્વારા ડિમોલેશન, જુઓ Video

અમદાવાદ શહેરમાં એક ગંભીર ઘટના સામે આવી છે, જ્યાં મહાનગરપાલિકા (AMC)ના નામે ખાનગી વ્યક્તિઓ દ્વારા બાંધકામ તોડી પાડવામાં આવ્યું હોવાના આક્ષેપો થયા છે. આ ઘટના નાના ચિલોડા વિસ્તારમાં, હાઈવે પર ટોયોટા શોરૂમની સામેની બાજુએ બની હતી. અહેવાલો અનુસાર, કેટલાક બાઉન્સર્સે ત્રણ દુકાનોનું ડિમોલેશન હાથ ધર્યું હતું અને આ પ્રક્રિયા દરમિયાન તેઓ પોતે AMCના અધિકારીઓ કે કર્મચારીઓ હોવાનો દાવો કર્યો હતો. તેઓએ આ બાંધકામને ગેરકાયદેસર ગણાવીને તોડી પાડ્યું હતું.

આ ઘટનાનો એક વીડિયો સોશિયલ મીડિયા પર વાયરલ થયો હતો, જેમાં દુકાનધારકો બાઉન્સર્સને તેમની ઓળખ અને ડિમોલેશનનું કારણ પૂછી રહ્યા છે. તેના જવાબમાં, ડિમોલેશન કરનારા વ્યક્તિઓએ “અમે કોર્પોરેશનના માણસો છીએ” અને “આ ગેરકાયદે બાંધકામ છે” તેમ જણાવ્યું હતું. આ વીડિયો વાયરલ થતાં જ મહાનગરપાલિકાના તંત્રમાં ખળભળાટ મચી ગયો હતો.

ખાનગી વ્યક્તિઓએ મહાનગરપાલિકાના નામનો દુરુપયોગ કર્યો

અમદાવાદ મહાનગરપાલિકાએ આ ઘટના અંગે તાત્કાલિક સ્પષ્ટતા કરી છે. AMCના અધિકારીઓએ જણાવ્યું હતું કે, મહાનગરપાલિકા દ્વારા આ વિસ્તારમાં કોઈ ડિમોલેશનની કામગીરી હાથ ધરવામાં આવી નથી. આ કાર્યવાહી કરનારા લોકો કોર્પોરેશનના કર્મચારીઓ નથી, પરંતુ કોઈ ખાનગી એજન્સી અથવા બિલ્ડરના માણસો હોવાનું પ્રાથમિક તપાસમાં સામે આવ્યું છે. AMCએ આક્ષેપ કર્યો છે કે, આ ખાનગી વ્યક્તિઓએ મહાનગરપાલિકાના નામનો દુરુપયોગ કરીને તેમની કાયદેસરતા દર્શાવવાનો પ્રયાસ કર્યો હતો.

વધુ તપાસમાં સામે આવ્યું છે કે, આ ડિમોલેશન એક પ્રાઇવેટ પ્લોટ પર થયું હતું, જ્યાં ત્રણ દુકાનો આવેલી હતી. આ પ્લોટની પાછળની તરફ એક બિલ્ડરનું કન્સ્ટ્રક્શન કામ ચાલી રહ્યું છે, જેના કારણે આ બિલ્ડરના માણસો દ્વારા જ આ બાંધકામ તોડી પાડવામાં આવ્યું હોવાની આશંકા વ્યક્ત કરવામાં આવી રહી છે. AMCના અધિકારીઓએ સ્થળની મુલાકાત લીધી હતી અને રાજપૂત સિક્યુરિટી એજન્સી સહિતના સંબંધિત પક્ષકારો સાથે વાતચીત કરી હતી.

મહાનગરપાલિકાએ આ ગંભીર બાબતને ધ્યાનમાં લઈને કડક કાર્યવાહી કરવાનું નક્કી કર્યું છે. AMCની રોડ કમિટી દ્વારા આ વ્યક્તિઓને શોધી કાઢવા અને તેમની સામે પોલીસ ફરિયાદ દાખલ કરવાની કાર્યવાહી હાથ ધરવામાં આવશે. મહાનગરપાલિકાએ સ્પષ્ટ કર્યું છે કે, ખાનગી વ્યક્તિઓ દ્વારા સરકારી તંત્રના નામનો દુરુપયોગ કરીને આવી ગેરકાયદેસર પ્રવૃત્તિઓ ચલાવી લેવામાં આવશે નહીં.

ઉલ્લેખનીય છે કે, આ પ્રકારનો જ એક બનાવ અગાઉ સુરતમાં પણ બન્યો હતો, જ્યાં સરકારી નામનો દુરુપયોગ કરીને ડિમોલેશન કરવામાં આવ્યું હતું. અમદાવાદની આ ઘટના રાજ્યમાં સરકારી નામનો દુરુપયોગ કરીને ગેરકાયદેસર પ્રવૃત્તિઓ આચરવાની પ્રવૃત્તિઓ પર ગંભીર સવાલો ઉભા કરે છે. AMC આ મામલે સંપૂર્ણ તપાસ કરીને દોષિતો સામે કાયદેસરની કાર્યવાહી સુનિશ્ચિત કરશે.