7 રશિયન મંત્રીઓ ડિલનું સિક્રેટ બોક્સ લઇ વ્લાદિમીર પુતિન સાથે આવશે ભારત ! જાણો એ 25 કરાર વિશે

રશિયાના રાષ્ટ્રપતિ વ્લાદિમીર પુતિન 4 થી 5 ડિસેમ્બરના રોજ ભારતમાં મુલાકાતે આવશે. આ મુલાકાત દરમિયાન તે વડાપ્રધાન નરેન્દ્ર મોદીને મળશે અને 10 સરકારી કરારો અને 15 થી વધુ વ્યાપારિક કરારો પર હસ્તાક્ષર કરશે, જેનો કુલ હિસ્સો 25 મુખ્ય કરારો થશે. આ બેઠક દરમિયાન S-400 મિસાઇલ સિસ્ટમ, Su-57 ફાઈટર જેટ, તેલ વેપાર, શ્રમ ગતિશીલતા, વેપાર સંતુલન અને વ્યૂહાત્મક ભાગીદારી જેવા મુદ્દાઓ પર ચર્ચા થશે.

પુતિન સાથે સાત વરિષ્ઠ રશિયન મંત્રીઓ ભારત આવી રહ્યા છે, જેમાં સંરક્ષણ પ્રધાન બેલોસોવ, નાણાં પ્રધાન એન્ટોન સિલુઆનોવ અને રશિયન સેન્ટ્રલ બેંકના ગવર્નર એલ્વીરા નાબીઉલિના નામ જાહેર છે. બાકીના ચાર મંત્રીઓના નામ હજુ જાહેર કરવામાં આવ્યા નથી. આ ઉપરાંત, રશિયાનાં અગ્રણી વ્યાપારી નેતાઓ પણ તેમની સાથે રહેશે, જેમ કે રોશનેફ્ટના CEO ઇગોર સેચિન અને જાણીતી મીડિયા સંપાદક માર્ગારીતા સિમોન્યાન. પુતિન અને સિમોન્યાન ભારતમાં નવી ટીવી ચેનલ RT ઇન્ડિયાના લોન્ચમાં પણ ભાગ લેશે.

વિશેષ ક્ષેત્રો અને કરારો

વિદેશ મંત્રાલયના જણાવ્યા મુજબ, પુતિનની મુલાકાત દરમિયાન કરારોના હસ્તાક્ષર વિવિધ ક્ષેત્રોમાં થશે, જેમાં વેપાર, અર્થતંત્ર, આરોગ્ય, શિક્ષણ, સંસ્કૃતિ, મીડિયા, શ્રમ અને શ્રમ ગતિશીલતા મુખ્ય છે. રશિયામાં કામદારોની માંગ વધી રહી છે, તેથી ભારત અને રશિયા રશિયામાં ભારતીય કામદારો માટે સલામત અને સારી તકો પૂરી પાડવા માટે શ્રમ ગતિશીલતા કરાર કરશે. સંરક્ષણ અને ઊર્જા ક્ષેત્રે ખાસ ધ્યાન આપીને ભારતની વેપાર ખાધ ઘટાડવા અંગે પણ ચર્ચા કરવામાં આવશે.

વેપાર અને વ્યૂહાત્મક ભાગીદારી

રશિયન રાષ્ટ્રપતિ કાર્યાલયના પ્રવક્તા દિમિત્રી પેસ્કોએ જણાવ્યું હતું કે, S-400 મિસાઇલ સિસ્ટમ અને Su-57 ફાઈટર જેટ બંને દેશો માટે મુખ્ય ચર્ચાના વિષયો રહેશે. તેલ વેપારને સરળ અને સુરક્ષિત બનાવવા માટે બંને દેશો સાથે મળીને કામ કરશે. હાલમાં, ભારત-રશિયા વચ્ચેનો વેપાર $63 બિલિયન સુધી પહોંચ્યો છે, અને 2030 સુધીમાં $100 બિલિયન સુધી પહોંચવાનો લક્ષ્ય છે.

અમેરિકાના દબાણનો રશિયાનો પ્રતિસાદ

પેસ્કોએ જણાવ્યું કે રશિયા ભારત પર અમેરિકાના દબાણથી વાકેફ છે, પરંતુ માને છે કે ભારત સ્વતંત્ર અને સાર્વભૌમ દેશ છે અને પોતાના નિર્ણયો પોતે લે છે. તેઓએ જણાવ્યું કે ભારત અને રશિયાના લોકો દાયકાઓથી મિત્ર છે અને રશિયા હંમેશા ભારતની સાથે ઊભું રહેશે. આ મુલાકાત બંને દેશો વચ્ચે વેપાર, સંરક્ષણ, ઊર્જા અને વ્યૂહાત્મક સહયોગને વધુ મજબૂત બનાવશે.