અમેરિકાના રાષ્ટ્રપતિ ડોનાલ્ડ ટ્રમ્પે, ઈરાન પર મોટા હુમલાની ચેતવણી આપી છે. આ સાથે, અમેરિકાએ તેના નાગરિકોને મધ્ય પૂર્વના દેશ છોડવા માટે તૈયાર રહેવા કહ્યું છે. અમેરિકન નાગરિકોને માટે જાહેર કરાયેલ એડવાઈઝરીમાં જણાવ્યું છે કે તેઓ આ પ્રદેશ ( મધ્ય પૂર્વના દેશ) છોડે અથવા તો છોડવા માટે તૈયાર રહે. તેમાં એ પણ નોંધવામાં આવ્યું છે કે વિવિધ એરલાઇન્સ આગામી દિવસોમાં મધ્ય પૂર્વમાં ફ્લાઇટ્સ રદ કરી શકે છે.

ઈરાને કુવૈતમાં ડ્રોન હુમલા કર્યા છે અને હોર્મુઝ સ્ટ્રેટમાં જહાજોને નિશાન બનાવ્યા છે. આ પછી, ટ્રમ્પે ઈરાન સામે કડક કાર્યવાહીની ચેતવણી ઉચ્ચારી હતી. દરમિયાન, ઇઝરાયલે ગાઝા અને લેબનોન ઉપર પણ હુમલા શરૂ કર્યા છે, જોકે હમાસે અગાઉ યુએસ સમર્થન સાથે યુદ્ધવિરામની જાહેરાત કરી હતી અને તેના શસ્ત્રો મૂકવાની તૈયારી દર્શાવી હતી.

મધ્ય પૂર્વમાં પરિસ્થિતિ ઝડપથી બગડી શકે છે

યુએસ સ્ટેટ ડિપાર્ટમેન્ટે એક સુરક્ષા એડવાઈઝરી જાહેર કરીને, તેમના નાગરિકોને ચેતવણી આપી હતી કે પ્રાદેશિક સુરક્ષા પરિસ્થિતિ જટિલ રહે છે અને ઝડપથી બગડી શકે છે. આ એડવાઈઝરીમાં મધ્ય પૂર્વના દેશોમાં રહેતા અમેરિકનોને અત્યંત સાવધાની રાખવા અને સંભવિત ફ્લાઇટ રદ થવા, એરસ્પેસ બંધ થવા અને મુસાફરીમાં અડચણ સર્જાય તેના માટે તૈયાર રહેવા વિનંતી કરવામાં આવી હતી. તેમાં કહેવામાં આવ્યું હતું કે, “મધ્ય પૂર્વમાં રહેતા અમેરિકનોએ તણાવ વધવા પર પ્રસ્થાન કરવાનું વિચારવું જોઈએ અથવા છોડવા માટે તૈયાર રહેવું જોઈએ.”

ઈરાન યુએસ રાજદ્વારીઓને નિશાન બનાવી શકે છે

આ એડવાઈઝરીમાં વધુમાં ભલામણ કરવામાં આવી હતી કે, હાલમાં મધ્ય પૂર્વના દેશોની બહાર રહેલા યુએસ નાગરિકો મધ્ય પૂર્વમાં મુસાફરી કરવા અથવા ત્યાંથી પસાર થવા પર પુનર્વિચાર કરે. યુએસ સ્ટેટ ડિપાર્ટમેન્ટે ચેતવણી આપી છે કે ઈરાન અને તેના પ્રાદેશિક સાથીઓ વૈશ્વિક સ્તરે યુએસ રાજદ્વારી સુવિધાઓ, વ્યવસાયો અને સંસ્થાઓને નિશાન બનાવી શકે છે. તેહરાને તાજેતરમાં ઇજિપ્ત જેવા દેશોને પણ સામેલ કરવા માટે તેના હુમલાઓનો વિસ્તાર કર્યો છે. યુએસ નાગરિકોને જાહેર પ્રદર્શનો ટાળવા, પ્રાદેશિક સમાચાર અહેવાલો પર નજર રાખવા, યુએસ-લિંક્ડ સાઇટ્સ નજીક સતર્ક રહેવા, કટોકટીની આકસ્મિક યોજનાઓ જાળવવા અને રીઅલ-ટાઇમ સુરક્ષા ચેતવણીઓ માટે સ્માર્ટ ટ્રાવેલર એનરોલમેન્ટ પ્રોગ્રામમાં નોંધણી કરાવવાની સલાહ આપવામાં આવી છે. અબુ ધાબીમાં યુએસ એમ્બેસી અને દુબઈમાં યુએસ કોન્સ્યુલેટમાંથી બિન-આવશ્યક સ્ટાફને સંયુક્ત આરબ અમીરાતમાંથી બહાર કાઢવાનો આદેશ જાહેર કરવામાં આવ્યો છે.

“અમે ફક્ત જીતવા માંગીએ છીએ” – ટ્રમ્પ

રાષ્ટ્રપતિ નિવાસસ્થાને કેબિનેટની બેઠક દરમિયાન, ટ્રમ્પે સંકેત આપ્યો કે, અમેરિકા ઈરાન સામે લાંબા લશ્કરી અભિયાન માટે તૈયાર છે. ટ્રમ્પે કહ્યું કે “અમે ફક્ત જીતવા માંગીએ છીએ”. તેમણે કહ્યું કે જ્યાં સુધી ઈરાન અમેરિકાના હુમલાઓનો સામનો કરવા સક્ષમ રહેશે ત્યાં સુધી અમેરિકા ઈરાન પર સખત પ્રહાર કરશે. વ્હાઇટ હાઉસના પ્રેસ સેક્રેટરી કેરોલિન લેવિટે તેહરાન પર ગયા મહિને હસ્તાક્ષર કરાયેલા સમજૂતી કરારનું ઉલ્લંઘન કરવાનો આરોપ લગાવ્યો હતો જેણે અસ્થાયી રૂપે દુશ્મનાવટ બંધ કરી દીધી હતી. લેવિટે કહ્યું, “ઈરાને અમેરિકા સાથે સમજૂતી કરાર પર હસ્તાક્ષર કર્યા અને પછી તેનું ઉલ્લંઘન કર્યું, વાણિજ્યિક જહાજો પર ગોળીબાર કર્યો અને અમેરિકન સૈનિકોને મારી નાખ્યા. આ બાબતોએ રાષ્ટ્રપતિ ટ્રમ્પ ચૂપ નહીં રહે અને આતંકવાદના આ કૃત્યને વધુ થવા પણ નહીં દે”. જ્યાં સુધી ઈરાન, રાષ્ટ્રપતિ ટ્રમ્પ સમક્ષ અર્થપૂર્ણ રીતે વાટાઘાટો કરવા પાછો નહીં ફરે ત્યાં સુધી ઈરાન પર હુમલા ચાલુ રહેશે.

Breaking News : હોર્મુઝમાં મોટો અકસ્માત! Oil ટેન્કર Sea Mine સાથે અથડાયા બાદ મોટો વિસ્ફોટ