Breaking News : કઈક ભયાનક થવાનું છે, તેહરાન પર જોરદાર હુમલાની ટ્રમ્પની ધમકી

અમેરિકાના રાષ્ટ્રપતિ ડોનાલ્ડ ટ્રમ્પે ફરી એકવાર ઈરાન સામે કડક વલણ અપનાવ્યું છે. બુધવારે ઓવલ ઓફિસમાં મીડિયા સાથે વાતચીત દરમિયાન તેમણે જણાવ્યું કે જો જરૂરી બનશે તો અમેરિકા ઈરાન સામે અગાઉ કરતાં પણ વધુ જોરદાર કાર્યવાહી કરશે. ટ્રમ્પના આ નિવેદનથી મધ્ય પૂર્વમાં ફરી એકવાર તણાવ વધવાની શક્યતા દેખાઈ રહી છે.

મીડિયા દ્વારા પૂછાયેલા એક પ્રશ્નના જવાબમાં ટ્રમ્પે તેમના અગાઉના નિવેદનનો ઉલ્લેખ કર્યો, જેમાં તેમણે કહ્યું હતું કે ઈરાન સોદા સુધી પહોંચવામાં વિલંબ કરી રહ્યું છે અને તેની કિંમત ચૂકવવી પડશે. જ્યારે તેમને પૂછવામાં આવ્યું કે શું અમેરિકા ફરીથી ઈરાન પર બોમ્બમારો કરી શકે છે, ત્યારે ટ્રમ્પે કહ્યું કે તાજેતરની હેલિકોપ્ટર ઘટનાને ધ્યાનમાં રાખતા તેઓ માને છે કે તેમની પાસે આવું કરવાની સંપૂર્ણ યોગ્યતા છે.

ઈરાને અમેરિકન અપાચે હેલિકોપ્ટરને નિશાન બનાવ્યું – ટ્રમ્પ

ટ્રમ્પે આરોપ લગાવ્યો કે ઈરાને હોર્મુઝ સ્ટ્રેટ નજીક અમેરિકન અપાચે હેલિકોપ્ટરને નિશાન બનાવ્યું હતું. તેમણે વધુમાં જણાવ્યું કે પાકિસ્તાનની વિનંતી અને મધ્યસ્થતાને ધ્યાનમાં રાખીને ઈરાનને અનેક તકો આપવામાં આવી છે. ટ્રમ્પે પાકિસ્તાનના ફિલ્ડ માર્શલ આસિમ મુનીર અને વડાપ્રધાન શાહબાઝ શરીફની પ્રશંસા કરતાં કહ્યું કે તેઓ સારા લોકો છે અને તેમની વિનંતીનું સન્માન કરવામાં આવ્યું છે.

ઈરાન સાથે ચાલી રહેલી વાટાઘાટો અંગે ટ્રમ્પે દાવો કર્યો કે ઈરાન સોદો કરવા માંગે છે અને મોટાભાગની ચર્ચાઓ પૂર્ણ થઈ ચૂકી છે. તેમના જણાવ્યા મુજબ હવે માત્ર સત્તાવાર રીતે દસ્તાવેજો પર હસ્તાક્ષર કરવાની પ્રક્રિયા બાકી છે.

તેમણે વધુમાં કહ્યું કે અમેરિકા અને તેના સહયોગીઓએ તાજેતરમાં અનેક તેલ વહન કરતા જહાજોને સુરક્ષિત રીતે પસાર થવામાં મદદ કરી હતી. ટ્રમ્પના જણાવ્યા અનુસાર, આ કામગીરી દરમિયાન જહાજોને ઈરાનના રડારથી બચાવીને આગળ વધારવામાં આવ્યા હતા.

ઈરાનના પરમાણુ કાર્યક્રમ અંગે ટ્રમ્પે ફરી સ્પષ્ટ કર્યું કે અમેરિકા કોઈપણ સંજોગોમાં ઈરાનને પરમાણુ હથિયારો મેળવવા દેશે નહીં. તેમણે કહ્યું, “ઈરાન પાસે પરમાણુ શસ્ત્રો નથી અને તે ક્યારેય હોવા પણ જોઈએ નહીં. અમે મહિનાઓથી આ મુદ્દે કામ કરી રહ્યા છીએ અને હવે ઈરાને સોદા પર હસ્તાક્ષર કરી દેવા જોઈએ.”

ટ્રમ્પે તુર્કીના રાષ્ટ્રપતિ રેસેપ તૈયપ એર્દોગનની પ્રશંસા કરી

આ દરમિયાન એક પત્રકારે ઈઝરાયલ અને તુર્કી વચ્ચે સંભવિત તણાવ અંગે પણ પ્રશ્ન પૂછ્યો હતો. તેના જવાબમાં ટ્રમ્પે તુર્કીયેના રાષ્ટ્રપતિ રેસેપ તૈયપ એર્દોગનની પ્રશંસા કરી હતી. તેમણે કહ્યું કે એર્દોગન એક મજબૂત નેતા છે અને બંને દેશો વચ્ચેના સંબંધો તેમના કાર્યકાળ દરમિયાન સારા રહ્યા હતા. ટ્રમ્પે ઉમેર્યું કે પરસ્પર સન્માનના કારણે તેઓ માનતા નથી કે ઈઝરાયલ અને તુર્કી વચ્ચે કોઈ મોટો સંઘર્ષ સર્જાશે.

ટ્રમ્પના આ નિવેદનો એવા સમયે સામે આવ્યા છે જ્યારે મધ્ય પૂર્વમાં સુરક્ષા અને પરમાણુ મુદ્દાઓને લઈને આંતરરાષ્ટ્રીય સ્તરે ચિંતા વધી રહી છે. હવે ઈરાન તરફથી આ નિવેદનો પર શું પ્રતિક્રિયા આવે છે તેના પર સૌની નજર ટકેલી છે.

24 ભારતીયોને લઈને જઈ રહેલા જહાજ પર ઓમાનના દરિયાકાંઠે હુમલો, ભારતે વ્યક્ત કરી ગંભીર ચિંતા