Breaking News : આજે ફરી પાકિસ્તાનના DGMO સાથે વાતચીત થશે, ભારતીય સેનાની ચેતવણી, જો હવે સિઝફાયર તોડ્યું તો મૂકીશું નહી

શનિવારે સાંજે ભારત અને પાકિસ્તાન વચ્ચે સિઝફાયર જાહેર થયાના થોડા કલાકો પછી, પાકિસ્તાને ફરી એકવાર કાયરતાપૂર્ણ કૃત્ય કરીને કરારનું ઉલ્લંઘન કર્યું. જે બાદ સરહદ પર તણાવ છે. જોકે, ભારતીય સેનાએ પાકિસ્તાન દ્વારા કરવામાં આવેલા કેટલાક છૂટાછવાયા ડ્રોન હુમલાઓનો તાત્કાલિક જવાબ આપ્યો હતો, ત્યારબાદ હાલ સરહદ પર શાંતિ છે. દરમિયાન, ડાયરેક્ટર જનરલ ઓફ મિલિટરી ઓપરેશન્સ (DGMO) એ છેલ્લા ચાર દિવસની સમગ્ર ઘટનાની વિગતો શેર કરી છે. જેમાં એ વાત સામે આવી કે ભારતીય સેનાએ કેવી રીતે જોરદાર હુમલો કર્યો, ત્યારબાદ પાકિસ્તાન ઘૂંટણિયે પડી ગયું અને સિઝફાયરની વિનંતી કરવા લાગ્યું.

ભારતીય સેનાની પાકિસ્તાનને સ્પષ્ટ ચેતવણી

ડીજીએમઓએ કહ્યું કે પહેલા પાકિસ્તાનના ડીજીએમઓએ તેમની સાથે હોટ લાઇન પર વાત કરી હતી. ત્યારબાદ સિઝફાયર અંગે વાત થઈ. તમને જણાવી દઈએ કે આજે ફરી ભારત અને પાકિસ્તાનના ડીજીએમઓ વચ્ચે વાતચીત થવા જઈ રહી છે. જે પછી ભારત તેની ભાવિ રણનીતિ નક્કી કરશે. જોકે, ભારતીય સેનાએ સ્પષ્ટ ચેતવણી આપી છે કે જો હવે સિઝફાયર થશે તો તેનો કડક જવાબ આપવામાં આવશે.

સિઝફાયર પાછળની ઈનસાઈડ સ્ટોરી

ઓપરેશન સિંદૂર હેઠળ 6-7 મેની રાત્રે આતંકવાદી ઠેકાણાઓ પર ભારતના મોટા હુમલા બાદ પાકિસ્તાને વળતો જવાબ આપ્યો હતો. આના પર, ભારતે 9 મેના રોજ પાકિસ્તાન પર બદલો લેવા માટે હવાઈ હુમલો કર્યો અને 10 મેના રોજ ભારે ગોળીબાર પણ કર્યો. ભારતના જોરદાર વળતો હુમલો બાદ, યુએસ સેક્રેટરી ઓફ સ્ટેટ માર્કો રુબિયોએ પાકિસ્તાનના આર્મી ચીફ અસીમ મુનીર સાથે ફોન પર વાત કરી. જે બાદ અમેરિકાના વિદેશ મંત્રીએ ભારતના વિદેશ મંત્રી ડૉ. જયશંકર સાથે વાત કરી અને કહ્યું કે પાકિસ્તાન વાતચીત માટે તૈયાર છે.

આ વાતચીત ફક્ત DGMO વચ્ચે જ

માહિતી અનુસાર, આ સમય દરમિયાન ભારતે સ્પષ્ટપણે કહ્યું હતું કે આ વાતચીત ફક્ત DGMO વચ્ચે જ થશે. જે બાદ પાકિસ્તાની ડીજીએમઓએ 10 મેના રોજ બપોરે ભારતીય ડીજીએમઓ સાથે વાત કરવા માટે સમય માંગ્યો હતો. ત્યારબાદ બપોરે લગભગ 3:30 વાગ્યે ભારત અને પાકિસ્તાન ડીજીએમઓ વચ્ચે વાતચીત થઈ. જેમાં પાકિસ્તાની ડીજીએમઓએ સિઝફાયર વિશે વાત કરી હતી. થોડા કલાકો પછી, અમેરિકાના રાષ્ટ્રપતિ ડોનાલ્ડ ટ્રમ્પે પણ ટ્વીટ કરીને ભારત અને પાકિસ્તાન વચ્ચે સિઝફાયરની જાહેરાત કરી. જોકે, આ ટ્વિટ પછી તરત જ, વિદેશ મંત્રાલયે એક પ્રેસ કોન્ફરન્સ યોજી અને દેશને સિઝફાયર વિશે માહિતી આપી.

અમારું લક્ષ્ય ફક્ત આતંકવાદી

ડીજીએમઓએ કહ્યું કે અમારું લક્ષ્ય ફક્ત આતંકવાદીઓને નિશાન બનાવવાનું હતું. તેમણે કહ્યું કે નવ કેમ્પ હતા, જેનાથી તમે બધા હવે પરિચિત છો. અમારી વિવિધ ગુપ્તચર એજન્સીઓ દ્વારા આની પુષ્ટિ કરવામાં આવી હતી. આમાંથી કેટલાક પીઓકેમાં હતા, જ્યારે કેટલાક પાકિસ્તાનના પંજાબ પ્રાંતમાં હતા. તેમણે કહ્યું કે લશ્કર-એ-તૈયબાના ઠેકાણા મુરીદકે જેવા સ્થળો વર્ષોથી અજમલ કસાબ અને ડેવિડ હેડલી જેવા કુખ્યાત આતંકવાદીઓથી ખીલી રહ્યા છે.