Dang : સાવધાન ! સાપુતારામાં જોખમી રીતે સેલ્ફી લેશો તો થશે પોલીસ કાર્યવાહી
Dang : દુર્ઘટનાઓને રોકવા માટે ડાંગ જિલ્લામાં કોઇપણ સ્થળે ખાસ કરીને ટુરિસ્ટ સ્થળે સેલ્ફી લેવા પર પ્રતિબંધ લાદવામાં આવ્યો છે.
Dang : જો આપ સાપુતારા કે ડાંગ જિલ્લાના કોઇ ટુરિસ્ટ પ્લેસ પર જાવ છો અને સેલ્ફી લેશો તો આપને ભારે પડી શકે છે. આપના પર પોલીસ કાર્યવાહી કરી શકે છે. ન માત્ર ટુરિસ્ટ પ્લેસ પણ ડાંગ જિલ્લાના કોઇપણ જાહેર સ્થળ પર સેલ્ફી ક્લિક કરવા પર પ્રતિબંધ લગાવવામાં આવ્યો છે, જો સેલ્ફી ક્લિક કરશો તો આપના પર ગુનો દાખલ થઇ શકે છે .
આપને જણાવી દઇએ કે 23 જૂને ડાંગના ડિસ્ટ્રીક્ટ મેજિસ્ટ્રેટ ટી. કે. ડામોર દ્વાર જાહેર સ્થળ પર સેલ્ફી ક્લિક કરવા પર પ્રતિબંધનું જાહેરનામું બહાર પાડવામાં આવ્યું છે. આ ઉપરાંત કલેક્ટર દ્વારા ચોમાસા દરમિયાન પાણીમાં પ્રવેશવા, ન્હાવા તેમજ કપડા ધોવા પર પ્રતિબંધ લગાવવામાં આવ્યો છે. પાણી સાથે જોડાયેલી દુર્ઘટના રોકવા માટે આ પ્રતિબંધ લગાવવામાં આવ્યો છે. ડાંગ રાજ્યનો એવો પહેલો જિલ્લો છે જ્યાં જાહેર સ્થળ પર ખાસ કરીને ટુરિસ્ટ પ્લેસ પર સેલ્ફી લેવા પર પ્રતિબંધ લગાવવામાં આવ્યો છે.
આપને જણાવી દઇએ કે ચોમાસામાં અનેક ટુરિસ્ટ સાપુતારા જતા હોય છે અને કુદરતના સૌંદર્યને નિહાળતા હોય છે. જોકે આ દરમિયાન કેટલાક લોકો બેદરકાર રહીને સેલ્ફી લેતા હોય છે જેના કારણે તેમનો જીવ પણ જતો રહે છે. તેથી આ પ્રકારની દુર્ધટનાઓ ન બને તે માટે સેલ્ફી ક્લિક કરવા પર પ્રતિબંધ લાદવામાં આવ્યો છે.
આપને જણાવી દઇએ કે 2019 માં પણ તંત્ર દ્વારા સાપુતારા-વઘઇ હાઇવે પર સેલ્ફી લેવા પર પ્રતિબંધ લાદવામાં આવ્યો હતો. કોરોનાના કારણે લાગેલા કડક નિયમો હળવા થતા પર્યટકોનો ધસારો સાપુતારામાં જોવા મળી રહ્યો છે. પર્યટકો કુદરતી સૌંદર્ય માણવા માટે સાપુતારા પહોંચી રહ્યા છે.